Toe fa’afo’i se ali’i Filipino i lona atunu’u pe a magalo mai le toese

Ua poloaina e le Fa’amasinoga Maualuga le toe fa’afo’i o se ali’i Filipino i lona atunu’u, pe afai ae magalo mai o ia i le toese i Tafuna, i le mae’a ai lea ona tuli o lana fa’asalaga fa’a falepuipui e 20 masina, o se tasi lea o tuutuuga o lana nofovaavaaia e 5 tausaga.

O le ali’i o Melchor Alamis, 48 tausaga le matua, o se tagatanu’u o Filipaina, na ulufale mai o ia i Amerika Samoa o se Inisinia. Mulimuli ane tu’uaia o ia e le malo i moliaga mamafa e fa e aofia ai le faiaiga ma se tama’ita’i e laititi i lalo o le tulafono, faia o amioga faasotoma, atoa ai ma moliaga e 3 o lona tagofia lea o itutinosa o se tama’ita’i e le fa’aipoipo i ai.

Ae i lalo o se maliliega na sainia e Alamis ma le malo, lea fo’i na talia e le fa’amasinoga maualuga i le masina na te’a nei, na malie ai le ua molia e tali ioe i le moliaga mamafa e tasi o lona tagofia lea o itutinosa o se tama’ita’i e le fa’aipoipo i ai i le tulaga muamua.

I lona tali ioe ai i le moliaga e pei ona ta’usala ai o ia e le fa’amasinoga, na talosaga ai loa le malo ina ia solofua isi uma moliaga mamafa o lo o totoe ai i le pepa o le tagi sa latou fa’aulu, lea fo’i na talia e le fa’amasinoga.

I le tali ioe ai o Alamis i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le aso 30 Iuni 2017 i Amerika Samoa, sa ia tagofia ai itutinosa o se tama’ita’i e 15 tausaga le matua e aunoa ma se fa’atanaga fa’aletulafono.

Ina ua maua le avanoa o Alamis mai le fa’amasinoga, sa ia fa’atoese muamua ai lava i le aiga o le tama’ita’i na a’afia, atoa ai ma ona matua, ina ia fa’amagalo sona sese i lo latou va. Na taua e Alamis e fa’apea, sa leai sona mafaufau e oo le latou mafutaga ma le aiga o le tama’ita’i na a’afia ma ona matua i lenei tulaga, peita’i, o lona fa’atamala ua mafua ai ona tula’i mai lenei fa’alavelave.

Sa ia fa’atoese fo’i i le Fa’amasinoga, aemaise ai tagatanu’u ma le malo o Amerika Samoa, i lona le usitaia o tulafono a le malo ao aumau ai i totonu o le atunu’u. Na fa’ai’u lana talosaga e ala i lona ta’utino i le fa’amasinoga, afai e tuuina atu se avanoa mo ia, o le a ia usitai i tuutuuga uma o lana nofovaavaaia, atoa ai ma lona le toe solia o se tulafono a le malo.

Na finau le loia a Alamis, susuga Michael White i le fa’amasinoga mo se avanoa e faasala ai le ua molia i se fa’asalaga nofovaavaaia, ina ia mafai ai ona toe fo’i atu o ia i lona aiga i Filipaina. Na faailoa e White e fa’apea, ua leva ona toe fia fo’i le ua molia i lona atunu’u, ae sa onosa’i pea sei aumai se faaiuga o lana mataupu.

Na finau le loia a le malo ia Christy Dunn i le fa’amasinoga, ina ia faasala Alamis i se fa’asalaga nofovaavaaia, e aofia ai lona tuliina o se taimi talafeagai i le toese, ona o le matuia o lana solitulafono sa faia.

Na taua atili e Dunn e fa’apea, o Alamis, o se tagata mai fafo na nofo i le aiga o le tama’ita’i na a’afia, e pei o se isi fo’i totino moni o le aiga. E nofo Alamis i le aiga ae lei fanau le tama’ita’i na a’afia.

Ina ua fanau mai o ia, sa ia ta’uina Alamis o lona uncle, poo lona Tama lona lua fo’i. Sa agalelei le aiga ia Alamis i le tele o tausaga o le latou mafutaga, ma ua pei ai lava o ia o se totino moni o le aiga. Ae o le fa’alavelave na tula’i mai, na lagona ai e le aiga lo latou le toe talitonuina o lenei ali’i, atoa ai ma le latou talosaga ina ia fa’afo’i o ia i lona atunu’u, ina ia aua ne’i toe i ai se avanoa na te toe taumafai ai e fa’afesoota’i le tama’ita’i na a’afia.

Na finau Dunn i le fa’amasinoga ina ua toe fa’afo’i Alamis i lona atunu’u pe afai ae magalo mai i le toese i Tafuna.

Na taua e le afioga i le ali’i Fa’amasino ia Elvis P. Patea e fa’apea, o Alamis, o se tagatanu’u o Filipaina na ulufale mai i Amerika Samoa e tau saili sona lumana’i. Talu mai lena taimi, sa ia nofo ai i le aiga o le tama’ita’i na a’afia mo le tele o tausaga, seia oo ina alia’e mai lana mea sese e pei ona ta’usala ai o ia e le fa’amasinoga.

“Pau le ituaiga faaiuga lea ua sauni le fa’amasinoga e tuuina atu ina ia mautinoa e saogalemu ai le ua molia aemaise ai le tama’ita’i na a’afia, o le taofia lea o le ua molia i le falepuipui, a magalo, ona ia tuua lea o le atunu’u ae toe fo’i atu i le atunu’u na malaga mai ai o ia”, o le saunoaga lea a Patea.

O se tasi o tuutuuga o le nofovaavaaia a Alamis, o lona tuliina lea o masina e 20 i le toese i Tafuna. A o i ai o ia i le toese, e le mafai ona avea o ia o se “Pagota Faatuatuaina” (trustee status) i le toese. E tatau ona lesitalaina lona igoa i le lisi o i latou uma ua ta’usala i le faia o uiga mataga i fanau tama’ita’i, ma ia faia se suega i lona tino ina ia mautinoa ai na te le o tauaveina le siama o le fa’ama’i o le HIV.

Ua poloaina e le Fa’amasinoga le tuuina atu o le kopi o lana faaiuga i le Pule o le Ofisa o Femalagaaiga, ina ia mautinoa e aofia ai le igoa o le ua molia i le lisi o tagata e le fa’atagaina ona toe ulufale mai i le teritori.

Na faailoa e Patea ia Alamis, o le faaiuga ua tuuina atu mo ia, o le faaiuga sili lea mo lona saogalemu, ae sili ai le saogalemu o le tama’ita’i na a’afia i lana solitulafono.