11 ‘au fa'au'u tausima'i pasi mai le Kolisi Tu'ufa'atasi a Amerika Samoa

E to'a 11 tama'ita'i Tausima'i Pasi ua mae'a fa'apine i le afiafi o le aso Gafua na te'a nei, aua ua pasia e i latou su'ega a le Malo Tele e fa'ailo ai lo latou avea o Tausima'i Pasi i so'o se setete ma teritori o Amerika.

Mai le to’a 11 o i latou nei, e to'a 9 i latou o Licensed Practical Nurse (LPN) ae to'alua o Registered Nurse (RN). O le 'auga fo'i mo le fa'apinega fa'apea ma le latou fa'au'uga lea o lo ua toetoe taunu'u i le aso Faraile, "O le Ala moni e te silafia ai lou tagata, o le fa'amaumau o lou ola i lau tautua mo isi!"

O lea se mau autu o le tautalaga a le Fa'afeagaiga Rev. Manuele Mata'afa mai Poloa EFKAS lea sa ia ta'ita'ia le sauniga. "Ia tatou iloa, o lenei le auaunaga e matele ina le amana'ia i le tele o taimi, peita'i e leai se tasi e le fia mana'omia lenei auaunaga e faia ma le alofa i so'o se taimi e pagatia ai i gasegase po'o fa'alavelave faafuase'i e toe taumafai ai e lavea'i mai le ola ma toe fa'afailele ia malosi atoatoa. Fa'afetai mo la outou tautoga ina ia fa'ataunu'u nei tiute i lo outou soifua talavou."

Saunoa le Peresetene o le ASCC Rosevonne Pato, ma ia fa'afetaia lea vasega o Tausima'i Pasi ona vaega e lua o le taumafaiga ia atoatoa tomai e mo'omia mo lenei faiva, ma ia fa'alauiloa ai, "Mai le to'avalu o i latou na su'e i le suega a le Malo Tele mo Tausima'i uma ina ia papasi, e to'avalu i latou ua mautu mai ua papasi, ae to'atasi o lo'o tatalia nei, peita'i ua fa'ailoa mai e mautinoa fo'i e ausia ia lea matatia. O se taimi muamua lenei i le tala'aga o lea ituaiga kosi fa'atausima'i ua ausia ai e le vasega atoa na su'e lea tulaga, ae fa'aopoopo i ai, ua papasi ma togi maualuluga uma lava."

O i latou ua maua togi nei e avea ai ma LPN ua aofia ai: Ruby Salome Fia; June Musu Fuiava-Fa'apue; Toetu'ua Iosefa; Tualupetu Lauina; Sweetheart Natalie Nua; Mautumua Bryanna Maulupe; Ferila Jacqielynn Metuli; Kristal Inise Tautolo; ma Kimberly Pualani Ueligitone.

Mo le fa’ailoga o le RN, e to'alua i la'ua: Ria Su'esu'e Lefiti ma Tiffany Frieda Taumua.

O le fofoga fa'apitoa sa tima'ia i latou o se tasi sa avea fo'i ma faia'oga, o se tamaitai Tausima'i Pasi ma ua loa lana tautua i le tatou atunu'u, fa'apea ma lona fo'i nu'u i Amerika na soifua ma amata ai lana auaunaga fa'atausima'i, le tina, a'o le tausima'i pasi Sylvia Tauiliili MPH,RN.

Na toe fa'atepa e ia Tausima'i pasi i le auaunaga ma le fatu o lea faiva, "E afua mai lau tautua i le alofa. E i ai ma lou agalelei, e laei i le onosa'i i mea e tiga ai, ae fa'apalepale i e gasegase ma mana'omia lau fesoasoani ina ia toe fo'i mai le malosi. E ia te oe le agamalu e avatu ma foliga fiafia i aso uma mo i latou, aua ne'i mate lau lamepa o le mataala i taimi uma, tusa po'o tofafa i latou, ae sau mala e atia'e, e avea ma lape i le tautua pe a e fa'atamala. E tausuai i au a'oa'oga fa'aauau ia fa'ateleina lou atamai e te tautuaina ai tagata uma e i lalo o lau va'ava'aiga mau. Ia e tumau i le fa'amaoni i ou tiute uma, aua e te fa'avaivai ae loto tele."

I le avanoa o le afioga le Sui Kovana Lemanu Peleti Mauga, sa ia fa'ailoa ai, "E le fa'atauagavale le Malo i lona sao ina ia fa'ateleina i latou e tau'avea lenei kosi i le tatou Kolisi Tu'ufa'atasi ma ia fa'atauanau ina ia fa'aosofia le fanau e avea ma Tausima'i. Aua a o'o mai aso leaga i o tatou soifua ma'ale'ale, o i latou nei e tua atu i ai fa'atasi ma ali'i ma tama'ita'i Foma'i, e toe fa'asaoina mai ai le soifua! O la outou galuega e feso'ota'i lelei ma le alofa fa'aola o le Atua lava ia! E le gata i lea, ua outou si'i le tatou Kolisi ma tu'u i luga o le ma'a salafa. Ua outou fa'aea la tatou Kolisi aua ua outou papasi ma togi maualuluga. Fa'afetai mo le matati'a lea."

Sa ia fa'afetaia fo'i le vasega o faia'oga ma le Pulega a le Kolisi.

E to'alua na fa'amau fa'ailoga taumafaiga silisili mai nei vaega o Tausima'i Pasi na fa'apine, ma na maua lea e Sweetheart Nua le togisilia i le Theory ma le Practical, ua lua ai ana fa'ailoga mai le vaega na maua tusi pasi LPN.

O le tama'ita'i na maua fa'ailoga o le togisilia i le RN, le fa'ailoga sa tapena e le Tina Tausima'i Lauiloa o Fa'au'uga Su'esu'e Achica, ua maua lea e Tiffany Frieda Taumua i le Theory ma le Practical. Ae o le fa'ailoga mulimuli sa taua'aoina fa'apitoa e le Aiga o le isi fo'i Tina tausima'i o Amerika Samoa, Iva Pisia na taua'aoina lea ia Tiffany ma o se sikolasipi lea fa'ailoga e fesoasoani i pili o ana a'oa'oga o lumana'i.

I le toega o lea afiafi ma lona fa'amoemoe na tulei saunoa ai le fa'auluuluga o Kosi Fa'aTausimai i le ASCC Lele Ah Mu, BSN,RN ma sa ia fa'afetaia aloa'ia ai lava le susuga le Fa'atonu o le DOC Keniseli Lafaele ma lana fesoasoani malosi o le tupe e totogia ai le polokalama mo fanau nei e tausailia ai latou tusi pasi ua mautu nei. O le isi fesoasoani o le fale o le susuga le Faipule ia Toeaina Faufano Autele mai Ofu lea sa fa'amautu i ai i latou ma le fanau a'o faia latou galuega su'esu'e i lea afio'aga o le Manu'atele.

O lana toe upu i le vasega fa'aiuaso o tama'ita'i tausima'i pasi, "Ia fa'amutele la outou lamepa ma tu'u i luga i le tu'ugalamepa, ia iloa e tagata uma lo outou naunau e faia lo outou faiva ua outou tauto ai nei e fa'atino, ia soifua laulelei tagata uma e i la outou va'ava'aiga ma la outou tausiga."