Uilaolesami Bruchner Chase - "Sau e fai so'u aoga...."

Ua mae'a folasaga a le ali'i ua lauiloa i le lalolagi i ona ata e fa'aauau i le gataifale, ae maise ai o le gataifale o Amerika Samoa, le tofa Uilaolesami Bruckner Chase.

I lana lea folasaga, i le aso ananafi i le Ofisa o Mataupu Tau Samoa, sa ia saunoa ai e tusa o le auau o lona fa'amoemoe, "O se polokalama o lo'o sapaia malosi e le Matagaluega e Puipuia le Gataifale ma le Vaomatua, fa'apea le Matagaluega o le Initeria a le Malo tele, le Matagaluega o Fefa'ataua'iga atoa ma le tatou Ofisa Va'ai Tau ina ia tula'i mai se aoga i le lumana'i, ua gafatia e tagata ona fa'asaoina le soifua o nisi ua pagatia i le sami ona o le sousou, po'o le Tsunami fo'i lea na matua le mafai ona fa'asaoina le soifua o le to'atele, aua ua lutaluta le gataifale."

Ua fa'alauiloa lona naunauta'iga, "O Amerika Samoa le atunu'u muamua ua ou o'o mai i ai, ma iloa ai lo latou naunau e fa'asao ma fa'aaloalogia le foafoaga a le Silisiliese i le gataifale! Ua fa'amanuia fo'i le Atua i le sosia ua ia foa'i i le gataifale o lo'o fa'asao e Amerika Samoa."

O se tasi lea o vaega ole tautalaga a Chase a'o fa'afofoga le pa'ia maualuga o le Ofisa o Mataupu Tau Samoa i lona pulega seia o'o i le vasega o Pulenu'u ma Leoleo i afio'aga ta'itasi na auai.

O lona fa'amoemoe ua fa'alauiloa, "O lo ua tapena i ma'ua ma lo'u to'alua i talosaga mo se vaega tupe toina mai e fa'atino ai la'u auaunaga mo Amerika Samoa. Ua mae'a faia se isi vaega muamua e fa'alauiloa atili ai le lalelei ma le matagofie o Amerika Samoa i Eleni, Italia, Polani, Siamani ma Ausetalia. O le to'atele o malaga mai e asia le teritori, o e tafafao mai na atunu'u, aua ua mae'a maimoaina e le faitau miliona o tagata i luga o ala o ata fa'asolo i le Initeneti, le ata o le gataifale o Amerika Samoa ma ona sosia sa ou fa'alauiloaina."

Na ia tima'ia le vasega o Pulenu'u ma Leoleo i afio'aga, "E tatau ona iloa e i tatou ona fa'asao oe fa'atasi ai ma le isi ua e taumafai e sefe mai le malemo ma maliu ai. Afai e le gafatia e oe ona fa'asao se isi, ua le aoga lava i le ua vala'au mai i le fia ola sau gaoioiga."

Na ia fa'apupula atili, "E to'atele nisi e fai o latou manatu i lenei auaunaga, e fa'apea o le mea e masani ai i tatou iinei, e iloa a'au, peita'i, o i latou ua feiloa'i atu i ai, e le mamao se mea e a'au ai ae magoto loa. Pe le mafai fo'i e i latou ona a'au ma aumaia se isi i uta pe afai ua tafea. O mea na e taumafai ai lenei tautua."

E le gata i lea, ua fa'ailo mai talosaga mo ni tupe maua e fesoasoani i le fa'aoaina o le polokalama lea ma le isi fo'i vaega lua o le polokalama, "Ia to'atele nisi o talavou o le atunu'u e avea fa'agatama i le tai ma nisi o ta'aloga e fa'atauva ai. E le na'o le tu'uga fautasi, ae o tu'uga a'au, tauvaga Maulu, isi lava fa'agatama e faia i le tai ae ta'a'alo ma le mautinoa ua i ai le to'a aua ua lava le iloa a'au po'o le a'ao fo'i ma fa'asao mai se isi ua oso se ma'i i le sami, ua mafua ai ona tau malemo."

Na ia fa'amautu mai sona taofi, "O lou iloa lelei o le sami tele, o lou iloa ona a'au ma fa'aaoga lelei, o le isi lea vaega tele o lou gafatia ona tauva i ta'aloga i le tai. E te ta'alo ma lou mautinoa afai ae tutupu mai ni fa'aletonu i le va'a, po'o lau 'au ta'a'alo, a'o o lo'o e gafatia ona fesoasoani atu i se tasi, ma e fa'asaoina lava e oe lou ola. E leai fo'i se popole ma le le mautonu i lou loto."

"O le lumana'i lena o lenei taumafaiga, 'ia to'atele nisi o tama ma teine Amerika Samoa e ta'a'alo fa'atauva i ta'aloga i le tai ma le to'a, o le ala fo'i lena e manumalo ai i latou. Ua mae'a faia ma fa'atulaga e le tatou Malo ma le Aganu'u a Samoa le uiga fa'aaloalo i le Tai, e tatau lava ona to'atele i latou e manumalo mai fa'agatama i le tai mai le tatou nei malo,” o sana toe upu lea e fa'ailoa ai, lona naunauta'i ia maua le avanoa lelei, na te tapena ai tupulaga o Amerika Samoa ina ia to'atele e fiafia i fa'agatama i le tai i le lumana'i.

Ua amatalia le taumafaiga i le afio'aga o Leone, lea ua mua'i fa'atulaga ai le aso Faraile, Aso To'ona'i ma le aso Gafua Me 21, 2018 e fa'atautaia ai le ulua'i vaega o le polokalama: "Ia iloa ona a'au ma fa'asaoina se tasi ia tofu saogalemu uma oulua!"

Ua i ai fo'i ana auupega fesoasoani sa taulimaina ma fa'alauiloa, e agatonu ona fa'aaogaina mo sui uma e fia lavea'ia se tasi mai le malemo i le tai sousou.

"O le Maea e togi atu i le sui o vala'au mai le fia ola!, O le ofu a'au e fa'aopeplea fa'atasi mai ai oulua i uta ma le sui ua e taumafai e lavea'i, o le fa'aili e avea ma se vala'au mai i uta mo nisi e iloa atu ai le galuega o fia faia, fa'atasi ai ma mea manava e fa'aaogaina ina ia e le malemo atu ai i lau taumafaiga."

O nei mea uma sa ia fa'ailo, "A'o e fa'atali laititi ae tapena lau taumafaiga e fa'asao se tasi o le a malemo i le tai sousou, o le avanoa lelei lea e te faia ai gaoioiga nei. Peita'i, o le fa'atali e faia e se tasi e le o fa'aauupegaina i le iloa lelei ona a'au malosi, fa'asao lou malosi ia gafatia ai ona e fa'aolatia le o lo'o tau malemo fa'atasi ma oe le lavea'i."

Ona o le taumafanafaua ma le tu'uagaina umi o a'oga lea ua fotua'i mai, o se vaitaimi tatau fo'i lenei mo le polokalama i Leone o le a amatalia. Ua to'atele fo'i afio'aga ua fa'aulu lo latou mana'o, ae maise ai le afio'aga o Pago Pago i le afioga le Ma'oputasi Mauga Asuega sa ia fa'ailoa, "Afai na e a'au mai le sami e afua mai Aunu'u ae e te ea ane i Pago Pago, e tatau lava ona e fa'amuamua Pago Pago. Ua tatau ona iloa e i matou fa'asao le soifua o nisi i vaitaimi o galulolo tetele e pei ona lutia ai le fagaloa."

Ua fa'aulu fo'i le mana'o o le Papafa'ase'e i Le'ala, Taputimu, Vailoa, Vaitogi ma Futiga, peita'i ua iloga e Chase, e moni lelei lea mana'oga, aua o le to'atele o lo'o maliliu i le sami i le Tualatai.