E LE O OE O SE SULI MONI

Vaega 119

“O le a sau vaavaai i le Tina meauli ma lana fanau e to’alua o loo totoe, e i ai se avanoa e mafai ai ona toe fa’asaoina mai i latou mai ‘auga mata’utia o le fa’ama’i oti lea ua a’afia ai i le taimi nei.” O le fesili tuli tatao atu lea a Meki i le Foma’i sili o loo la talanoa i luga o le telefoni. Na va i ni nai sekone talu ona mae’a le fesili a Meki, ae le o fa’alogoina lava se tali mai le Foma’i Sili. “Fa’amolemole lau susuga a le Foma’i Sili, o lea e fia maua e lo matou ofisa se tulaga sa’o o le Tina meauli ma lana fanau, ina ia fuafua atu i ai a matou su’esu’ega o loo faia i le taimi nei, ina ne’i tuai ona maotu fesiligia o ia ae vave ona tula’i mai se fa’alavelave matuia, ona le toe mafai lea ona maua se isi avanoa e fesiligia ai o ia”. Na fiu Meki e fa’atali se toe tali ane a le Foma’i Sili, ua leai se isi. Na tuu i lalo e le tamaloa o Meki le telefoni, ona tu lea ma pupula to’a i luga o lana laulau o loo tu’u mai ai le ata o si ona to’alua o Lucy, ae o le isi itu o le laulau o loo ta’atia mai ai le ata o si ona afafine o Ianeta ma lona to’alua o Laneselota, i le taimi fa’atoa uma ai lava le la fa’aipoipoga. Na ona savali atu lava o le tamaloa ua piki mai lana telefoni feavea’i sa i luga o le laulau, piki mai ai ma le ki o lana ta’avale, uu loa ma le fusipa’u leoleo lea e fa’apipi’i uma i ai mea faigaluega e aofia ai ma lana fana ma savali ese loa ma le ofisa ae aga’i atu i lana ta’avale ma alu loa i le fale. E le i umi ona alu ese atu Meki mai le ofisa ae tatagi lana telefoni feavea’i, ma le vaai atu, o lona afafine lea e vili atu. E tago atu loa Meki o le a tali lana laina ae ee atu fo’i ma le uaealesi o lana ta’avale, o lana vaega lea ua valaau atu.

“BOSS! BOSS!, o e maua mai”. Na ona tago atu lava o Meki oomi le ki lanu meamata o lana telefoni ona faapea atu lea i lona afafine, “Ianeta si o’u afafine pele, se’i uma ona ou talanoa i luga o le uaealesi ona ou toe valaau atu lea ia te oe”. Na ona uma lava ona talanoa o le tamaloa i lana telefoni, ona ia tago loa lea ua tape ae oomi le ki o le uaealesi o lana ta’avale ma faapea atu i lana vaega, “O lea ua ou fa’alogo atu”. Fa’apea mai loa ma le isi sui o lana vaega, “BOSS, o lea ua matou taunu’u i totonu o le fanua, o loo paka a matou ta’avale i le isi itu o le vai e mamao ese mai ma le fale. Ae o lea ua matou vaavaai atu e tolu Van lanu uli tetele lea ua paka mai i luma o le fale a le ulugali’i o Mekala ma Pulusi. Ua tusa ma le 3 minute talu ona paka ia Van i luma o le fale, ae le o i ai lava se isi o sau i fafo. Matou te le o toe gaioi lava fo’i i se mea e tasi, ae o lea ua matou nonofo sauni uma ma a matou a’upega i le isi tulimanu o le pa, e sauni ai mo se osofaiga e ono tulai mai, pe afai ae aga’i mai ni tagata i le vaega o loo matou i ai. Ae afai e i ai se isi manaoga, ona matou toe valaau atu loa ia te oe, ae tatau ona i ai se vaega fa’aleoleo e fa’alatalata mai i le nofoaga o loo matou i ai nei, ina ne’i tula’i mai se fa’alavelave ae tuai le aga’i mai”. O le ripoti ane lea a le vaega a Meki e tusa ai o le tulaga o loo i ai le latou suesuega faapitoa o loo fa’atinoina i le taimi lea.

“Ua lelei, fa’afetai mo le fesootai mai, ae o le fautuaga, ia tapena uma a outou a’upega ma sauni i soo se faalavelave e ono tula’i mai. Ia tofi se to’atolu e pito i luma i le vaega e aga’i atu ai ‘au a le fili, ae vaai le isi to’atolu e sauni mai i le pito i tua, ma se to’atasi e fa’agaioi le siakiina o le vaega o loo tanumia ai le Tamaloa meauli o loo tau sailia, ina ne’i misi lo tatou avanoa ona fai lea ma lape o le tatou suesuega o loo faia i le taimi nei”. O le fa’atonuga lea na tuuina atu e Meki i lana vaega. Na ona mae’a lava o le talanoaga a Meki ma lana vaega, aapa atu loa ma le ali’i i lana uaealesi faaleoleo ma valaau ai loa i le Ta’ita’i o le Vaega o Leoeo Su’esu’e a le malo. “Talofa, o le Ta’ita’i lenei o le Vaega o Leoleo Su’esu’e a le malo”. O le tali ane lea a le ta’ita’i. “Taloafa, o Meki lea, le Ta’ita’i o Leoleonana, fa’amolemole, ua mana’omia lau fesoasoani, mo ni Leoleo fa’aaupega e tapena ma fa’aleoleo e fesoasoani i le su’esu’ega a la’u vaega o loo fa’atinoina i le taimi nei”.