Ioe se ali’i talavou sa ia fa’atauina atu mariuana to’atele o tagata

O le ali’i lea na pu’e fa’apagota mai e Leoleo i le tausaga na te’a nei ina ua maua o lo o ia tulei ma fa’atau atu mariuana i ni isi o tagata faigaluega a le kamupani o le StarKist Samoa, sosoo ai ma le tuuaia o ia i lona umia fa’asolitulafono o fualaau fa’asaina, ua ia ta’utino i luma o le Fa’amasinoga Maualuga i le vaiaso nei, e fa’amaonia uma lava tu’uaiga fa’asaga ia te ia.

O PauloPaulo Jr, 21 tausaga le matua o lona soifua na ulua’i tu’uaia e le malo i moliaga  mamafa e 2, le moliaga o le umia fa’asolitulafono o vaega o le laau fa’asaina o le mariuana, ma le fa’amoemoe e tulei pe fa’atau atu i isi tagata, atoa ai ma le moliaga mamafa o le umia fa’asolitulafono o vaega o le laau fa’asaina o le mariuana.

Ae i lalo o le maliliega na sainia e Paulo Jr ma le malo, lea fo’i na talia e le fa’amasinoga maualuga, ua malie ai le ua molia e tali ioe i le moliaga o le umia faasolitulafono o mariuana, ae solofua le moliaga o le umia faasolitulafono o mariuana ma le fa’amoemoe e tulei ma fa’atau atu i isi tagata.

I le tali ioe ai o Paulo Jr i le moliaga e pei ona ta’usala ai o ia e le fa’amasinoga maualuga, sa ia ta’utino ai e fa’apea, i se taimi o le aso 22 Setema o le tausaga na te’a nei i Atuu, le nofoaga o lo o i ai le kamupani tu’uapa a le StarKist Samoa, sa ia umia ai faasolitulafono vaega o le laau fa’asaina o le mariuana.

Na ta’utino le ua molia, e 24 sikaleti mariuana sa i totonu o se tama’i ato sa ia te ia ina ua pu’e fa’apagota o ia e leoleo.

Na fesili le afioga i le Fa’amasino Sili ia Paulo Jr, poo fea na ave i ai sikaleti mariuana sa maua i lana ato, na tali le ua molia, na ave e Leoleo.

Na toe fesili Kruse pe na o le pau ia o sikaleti mariuana sa ia te ia, na tali le ua molia e leai, o isi sikaleti mariuana ua uma ona fa’atau i isi tagata faigaluega, ae o sikaleti na totoe e 24 na ave e leoleo.

O Paulo Jr na pu’e fa’apagota e leoleo i luma o le kamupnai i’a i Atu’u, i le mae’a ai lea ona maua e Leoleo o ni ripoti mai ni isi o tagata faigaluega a le kamupani, e fa’atatau i se ali’i o lo o fai ma ana masani le tulei o fualaau fa’asaina i tagata faigaluega.

Na taua i fa’amaumauga a Leoleo e fa’apea, o se tasi o ali’i sa fa’atau ana sikaleti mariuana ia Paulo Jr, o ia lea na logoina Leoleo e uiga i lenei mataupu, ina ua tele lana tupe na alu i le fa’atauina o fualaau fa’asaina, ae avatu fualaau fa’asaina e le tau ai lona loto.

O ia la lea sa avea ma molimau a le malo i lenei mataupu. Ina ua mae’a ona logo e lenei ali’i Leoleo, sa aga’i atu loa leoleo ma latou molimauina se alii o loo fealua’i ma sana ato i luma o faleoloa i le isi itu o le kamupani i’a.

Na alu i le atoa le ua molia ina ua ia iloa mai Leoleo, ma fai ai loa a latou tuliga ma Leoleo seia oo ina maua o ia. Na saili e Leoleo le tino o le ua molia ma latou maua ai se tama’i ato o lo o i ai se pepa i totonu. I totonu o lea pepa o loo afifi ai sikaleti mariuana e 24. Na fa’ailoa e le ua molia i Leoleo i le taimi na pu’e fa’apagota ai o ia, o le tele o sikaleti mariuana ua uma ona fa’atau atu i isi tagata.

O se tasi o tuutuuga o le maliliega a le ua molia ma le malo, o le talosagaina lea o se fa’asalaga faanofovaavaaia mo ia, peita’i ua malamalama le ua molia, tusa lava pe finau loia mo se fa’asalaga faanofovaavaaia, e pule le fa’amasinoga pe talia pe teena.

Ua ia malamalama fo’i, e le mafai ona toe suia lana tali ioe ua tuuina atu i le fa’amasinoga, pe afai e tuuina mai se fa’aiuga a le fa’amasinoga ae le tusa ai ma lona mana’o.

O lo o taofia pea Paulo Jr i le toese i Tafuna e fa’atali ai le aso 31 Me lea ua fa’atulaga e lau ai lana fa’asalaga.