Tele fesili i ali’i faifaiva ua le toe galulue i luga o va’a fagota

O le alia’e mai ai pea o le fa’afitauli i tagata mai atunu’u eseese e ulufale mai i Amerika Samoa e galulue i luga o va’a fagota, ae mulimuli ane ua le toe galulue i latou i luga o ia va’a fagota, o le pogai lea o le tele o fesili na fesiligia ai e le Fa’amasinoga Maualuga le Pulesili o le Ofisa o Femalagaaiga i le vaiaso na te’a nei, po o fea la ua aga’i i ai nei tagata.

O nei mau fesili na mafua mai i le mataupu a se ali’i mai Fiti na malaga mai i le 2015 e galue o se ali’i faifaiva i luga o se va’a fagota e pulea e le kamupani a le Manuia Fisheries, ae emo mulimuli ane le ata ua le toe galue lea ali’i o se tagata fai faiva, ae sosoo atu ai lava ma le taofia faapagota o ia e leoleo ina ua ia soli tulafono a le malo, e ala i ona talepeina o se faleoloa i Faleniu ae gaoi meatotino sa i totonu.

O le afioga a Peseta Dennis Fuimaono na poloaina e le afioga i le ali’i Faamasino ia Elvis P. Patea ina ia oo atu e molimau e fa’atatau i le ali’i faifaiva ia Rusiate Tabete, pe aisea na le toe galue ai o ia i luga o le va’a fagota sa ulua’i galue ai.

O le vaiaso na te’a nei na fa’asalaina ai e le fa’amasinoga ia Tabete e nofosala i le toese mo le umi e 28 masina.

E tusa ai ma fa’amaumauga ua i luma o le fa’amasinoga, o le taimi lava na leaga ai le va’a fagota a le kamupani o le Manuia Fisheries lea galue ai Tabete ma isi alii faifaiva, o le taimi fo’i lea na tau fai taape solo ai i latou, ma e oo mai i le taimi nei e le o iloa poo fea o i ai i latou uma nei.

Na taua e Peseta i luma o le fa’amasinoga e faapea, o le tiute tauave masani lava a le pule o le kamupani a le Manuia Fisheries, le tagata e suafa ia Mr. Kim, o lona fa’ailoa lea i le Ofisa o Femalagaaiga o soo se suiga e faia i lana au va’a.

Na fesili Patea poo fea uma isi tagata sa galulue i le va’a fagota a Mr. Kim pe afai ua le toe lelei le va’a fagota, ae na tali Peseta latou te le iloaina fo’i le tali o le fesili lea, ona e le i faailoaina atu e Mr. Kim i le latou Ofisa poo fea uma alii faifaiva sa galulue ia te ia.

“E le tatau ona tuua faapea lea mataupu, e tatau lava ona saili poo fea uma o i ai tagata nei, aua e le o i ai ma se isi o i latou nei e aofia ai ma Tabete e agava’a ona nofo pea i Amerika Samoa”, o le saunoaga lea a Patea.

“Pe afai e sa’o la’u fa’alogo atu i lau molimau Peseta, e foliga mai soo se tagata mai fafo e ulufale mai i Amerika Samoa e galulue o ni ali’i faifaiva, o le taimi lava e le toe galulue ai i latou i le va’a fagota, o le taimi fo’i lea e tatau ai ona toe fo’i i o latou atunu’u”, o le saunoaga lea a Patea na ioe i ai Peseta.

Soo se tagata mai fafo e ulufale mai ma le fa’amoemoe e galue i luga o va’a fagota, latou te umia le ituaiga ID o le “P.30”. E le mafai ona e soo se tagata e umia lea ituaiga ID ona galue i se isi lava galuega i Amerika Samoa. O le taimi lava e le toe galulue ai i latou nei i luga o va’a fagota, ona toe fo’i loa lea i o latou atunu’u na malaga mai ai.

Ua talosagaina e Patea loia a le malo ia Christy Dunn, ina ia faia se galuega a le malo e sailia ai alii uma na galulue fa’atasi ma Tabete i luga o le va’a fagota a le Manuia Fisheries lea ua leaga, ina ia mautinoa e toe fo’i uma latou i o latou atunuu.