Fesiligia Kruse mafua’aga o le malaga a le Loia Fautua i fafo

Ua fesiligia e le afioga i le Fa’amasino Sili ia Michael Kruse le mafua’aga o le malaga a le Loia Fautua mo tagata lautele ia Douglas Fiaui i fafo o le 12 vaiaso, lea ua mafua ai ona toe tolopo taimi ma aso sa fa’atulaga e fa’ataunu’u ai fa’a’masinoga autu a ni ali’i se to’alua o lo o ia tauaveina a laua mataupu.

O le tula’i mai ai o lea fa’aletonu i ni nai vaiaso e le i mamao atu, ua poloaina ai loa e le Fa’amasino Sili le faatulaga o se iloiloga faapitoa ma Fiaui, se’i fesiligia ma iloilo pe ono tuuina atu se fa’asalaga ia te ia i lona le usitaia lea o le poloaiga a le fa’amasinoga.

O le poloaiga a le fa’amasinoga e pei ona manatu Kruse ua le usitaia e Fiaui, o lona iloa lea o le aso ua fa’atulaga mo fa’amasinoga autu a i laua e toalua o lo o ia fautuaina, a o lea lava ua fa’aauau lana malaga i fafo, ma ua avea ma itu ua le mafai ai ona fa’ataunu’uina galuega a le fa’amasinoga.

E to’alua ali’i o lo o tauaveina e Fiaui a laua mataupu ua toe tolopo a la fa’amasinoga autu, e mafua mai ona o lo o toesea le la loia mo le 12 vaiaso.

I le 2 vaiaso talu ai, na talosagaina ai e le ali’i loia ia Ryan Anderson le fa’amasinoga o se avanoa e toe tolopo ai le fa’amasinoga autu a Sefo Mika lea fa’atulaga mo le aso 23 Aperila, ona o loo malaga Fiaui i fafo.

Na fesili Kruse ia Anderson poo fea o i ai Fiaui, ae tali le ali’i loia, o Fiaui o loo toese mo le 12 vaiaso. Na vaaia le le fiafia o le afioga i le ali’i Fa’amasino Sili, ma ia fesiligia ai Anderson pe aisea ua umi ai le taimi o le malaga a Fiaui. Na tali le ali’i loia ia Anderson, e le o o i ai lona malamalama i le tulaga lea.

Na talia e Kruse le talosaga ma toe fa’atulaga ai loa le fa’amasinoga autu a Mika mo le masina o Oketopa. O Mika, lea o lo o tatala i tua, o loo molia i moliaga mamafa e lua o le talepe fale i le tulaga lua atoa ai ma le gaoi.

O le vaiaso na te’a nei na toe talosagaina ai fo’i e le Ofisa a le Loia Fautua le fa’amasinoga ina ia toe tolopo le fa’amasinoga a se isi fo’i ali’i o lo o tauaveina e Fiaui lana mataupu.

O le susuga a Siona Maila o lo o molia i le faia o uiga mataga fa’asaga i se tama’ita’i talavou i le 2016.

Na talosagaina e le ali’i loia ia Michael White le fa’amasinoga ina ia toe tolopo le faamasinoga autu a Maila lea na fa’atulaga e faia i le taeao nei, aso Gafua, aso 7 o Me.

Na vaaia le le fiafia o Kruse ma ia saunoa ai e fa’apea, o le fa’alua lea ona toe tolopo fa’amasinoga autu ua uma ona fa’atulaga e faia ona o le toesea o Fiaui. Sa fia iloa e Kruse poo malaga Fiaui i se maliu a lona aiga, poo alu fo’i e tau saili se ana galuega i fafo.

Na tali White na te le iloa le tulaga lena, pau le tulaga na te mautinoa e le o alu Fiaui e saili se isi ana galuega i fafo.

Na taua e le loia a le malo ia Robert Morris le sauni o le malo mo le fa’amasinoga, ae afai ae finagalo le fa’amasinoga e talia le talosaga e toe tolopo ai le faamasinoga autu a Maila, ona fa’atulaga lea i se isi aso talafeagai.

Na fa’ailoa atili e Morris e fa’apea, ua mae’a ona fesootai le malo ma le aiga o le tama’ita’i o lo o a’afia i lenei mataupu, lea o lo o alala nei i Amerika, ma ua fa’ailoa ane e lona Tina, ua mae’a ona ia totogi le pasese a lana tama e malaga mai ai i Amerika Samoa e auai i le fa’amasinoga.

Na talia e Kruse le talosaga e toe tolopo ai le aso o le fa’amasinoga a Maila. Ua fa’atulagaina fo’i le aso e faia ai le iloiloga ma Fiaui, pe alaga tatau ona fa’asala o ia i lona le usitaia o le poloaiga a le fa’amasinoga.