Tala I Vaifanua

FA'APIPI’I KOLUSE MUMU "FA'AILO O LE MU” I FALE O AIGA

O se tasi o galuega tele ua fa'agaoioia e le Koluse Mumu, o le fa'apipi’i lea o Fa'ailo o se Afi (smoke alarm) e afaina ai se fale. O le 'ausa o le afi e mafai ona fa'agaoioia ai le sailini o le fa'ailo ma tatagi loa ina ia nofouta ai tagata i le fale o se aiga.

"O le galuega lenei, ua manatu ua tatau fo'i ona amatalia e le Koluse Mumu i Amerika Samoa nei, o le kemupeni lea ua mae'a fa'atautaia i le lalolagi atoa ma na afua mai ia Aperila 20, 2018 ma e fa'amuta fo'i ia Me 13, 2018 i totonu o le Iunaite Setete atoa,” o se talanoa mai lea a le ali'i pule o le Koluse Mumu i Amerika Samoa, Val Tuilefano.

Ua atoa le 234 aiga ua mae'a o'o atu i ai lea galuega a le Aufaigaluega Volenitia a le Koluse Mumu i le teritori, ua fa'apipi'ia le 600 o sailini fa'ailo o le mu i totonu o fale o nei a'iga na asia. E iva afio'aga ua mae'a asiasia ma faia ai lenei auaunaga.

O le aso To’anai ua te’a na fa'aauau atu ai pea le galuega lenei a le Koluse Mumu i nisi o aiga.

O lo ua latou filifilia nei le afio'aga o Malaeloa Ituau ma Malaeloa Aitulagi e fa'apipi'i ai nei sailini fa'ailo o mu. Pe afai ae totoe mai ai nisi sailini fa'ailo o le a fa'atulaga se aso patino e toe fa'aaoga ai i se isi afio'aga o le falelima i sasa'e. Peita'i o le a fa'alauiloa muamua atu lava lea aso.

"Pe afai e va'aia e outou le o'o atu o ni ta'avale a le Koluse Mumu i o outou lumafale, fesoasoani ane ane i ai, aua e le mailoa, o lenei fo'i se avea'i alofa ua afea lou aiga i lea aso, ona e ono aoga i lou lotoifale lea sailini fa'ailo mu, i se taimi e le o toe mamao,” o se tima'i mai lea a Tuilefano.

"Ua le fa'atulagaina ni aiga e asia ma fa'auia i ai lenei fesoasoani a le Koluse Mumu, ae ua fa'asalafa mo aiga uma o le a afea e i latou. Fa'amoemoe o le a fa'autagia mai lea fo'i taumafaiga ia au, ma aoga mo aiga ta'itasi uma, ae maise i taimi e le ma'alofia ai le o'o atu o le mu i lou maota."

I setete ma isi teritori o Ameika ua fa'atula'ia mai ai le lu'i lenei i le Koluse Mumu, ia mautinoa ua mae'a fa'atutuina le miliona o sailini fa'ailo o mu i totonu o fale nofo o aiga. E le gata ina fa'apipi'i nei sailini fa'ailo, ae ia mae'a fa'amatalaina fo'i i aiga le aoga o nei fa'ailo, ma le fa'amoemoe tupito lava, ia taofi le to'atele o tagata o aiga e malilu ona o le mu fa'afuase'ia o latou fale, ae o lo'o momoe filemu i latou e le iloa se mu ua lutia ai le latou lotoifale.

I lipoti o mu e tutupu i Amerika ma ua maumau ai le tele o soifua o tagata sa i totonu o nei fale na mu, ua fa'ailoa ai fa'amaumauga iloga e fa'apea, "E na'o le tolu minute e fa'alogo ai i lea sailini fa'ailo ona tatau lea ona e o'o i fafo o le fale ua e fa'alogo ai i lea sailini. O le vave e mana'omia ona e alu ese mai ai i totonu o lea fale ua tatagi lona sailini fa'ailo o le Mu."

LE TALI MAI HAWAIIAN AIR FA'ASEA TAGATA MALAGA

Ona o fa'aletonu o le Malaeva'alele i Tafuna lea e va'aia e le FAA ua le mafai ai ona toe tulaueleele mai va'alele a le Hawaiian Air i le taimi sa masani ai le atunu'u, ae maise o le taimi na fa'atulaga mo femalaga'iga ua mae'a ona fa'atau ai nofo i le va o Honululu ma Pago Pago nei, a'o le'i alia'e lenei fa'aletonu i le malae va'alele.

Po'o le a lava le fa'aletonu, ae ua mautinoa, ua i ai fesuia'iga e ao ina faia mo i latou ua mae'a fa'atauina nofoa i malaga a'o le'i o'o mai.

Na fa'alauiloa mai muamua o le a leai ni totogi o fesuia'iga o avanoa i so'o se femalaga'iga e a'afia i lenei suiga a le Hawaiian Air, peita'i e fa'ailoa atu i aiga na totogi pasese mai fafo ina ai vave faia suiga a'o le'i mae'a le 14 aso talu ona toe suia taimi to'ai mai ma tu'uva'a ese atu o va'alele a le Hawaiian Air, ae fa'ailoa mai e Ofisa va'alele i SeaTac ma Kalefonia, "E leai ni suiga o faia i a latou femalaga'iga, e le suia fua taimi o lo ua mae'a fa'atulaga e i latou."

Peita'i e le'i mae'a lena aso, ae toe fa'ailoa ane i fanau na totogia pepa malaga i Uosigitone ma Kalefonia, ioe ua i ai suiga e ao ina faia mo pasese uma e tuai ona taunu'u atu i Honolulu mai Amerika Samoa, ona ua suia taimi e taunu'u ai na malaga a i Honolulu. Peita'i ua fa'ailoa ane, e totogia nei suiga."

E moni ua tuai ona malaga sa'o i luga isi pasese, ae afai e le o ni fonotaga ma nisi mea e tatau ai ona va'ai toto'a i le taimi, ua tatau ona fa'aaoga pepa malaga a le Hawaiian Air e malaga ai sui na i nisi va'alele ia to'ai i le taimi e tatau ai mo fonotaga.

O na ituaiga fa'amoemoega ua leai se tali e mafai ona o'o mai, mai le tapulega a le Hawaiian Air.

Ona o lo'o i ai se poloketi mo le tamaoaiga tausi o le to'atele o aiga lea ua agava'a ai fanau e malaga e faigaluega i fafo e ala i le fesoasoani mai a le PEC ma ua fa'auia mai talosaga a tupulaga talavou na soifua a'e i Amerika Samoa po'o Amerika ma isi setete uma, ua fa'ailoa mai ai e Ashley, le sui sa malaga mai e fa'atulaga uma le fanau e malaga atu i le Kamupani Va'alele a le Hawaiian Air mo nei avanoa faigaluega, "Ua faigata tele ona matou galulue fa'atasi ma le Hawaiian Air. Ua fa'aletonu uma le tele o avanoa sa fa'atulaga ia o'o mai uma le to'a 100 o fanau Amerika Samoa ina ia faigaluega i Texas, South Carolina ma Utah."

O pasese uma o le to'a 100 tamaiti ua mae'a talia i galuega nei, ua totogia mai e le Kamupani a le PEC.

"Ua na'o le 35 tamaiti ua mafai ona malaga i le aso Faraile Me 4, 2018, peita'i o le a taumafai lava e fa'asolosolo ia uma lelei mai le to'a 100 ua mae'a taliaina e galulue." Sa fa'ailoa mai e Ashley.

"O le faigata ua faia nei e le Hawaiian Air e tauau e motusia ai lea avanoa lelei mo tupulaga talavou ua naunau atu le PEC e aumai e fa'afaigaluega ma manuia atu ai o latou aiga."

I konekarate faigaluega a le fanau o malaga atu i fafo, e totogia e le PEC le fanau i o latou pasese ma ofoina fo'i nofoaga lelei e nonofo fa'atasi ai i fafo ma faigaluega se'ia mae'a le 6 masina ona toe taliu mai lea ma latou totogi i o latou matua ma aiga.

Afai e toe fia fa'aauau ona faigaluega i lea lava avanoa nei fanau, e talosaga o ia, ma o lana galue i lea vaitaimi muamua na fa'afaigaluega ai, e mautinoa ai le toe talia o ia, pe leai mo le isi fo'i ono masina.