E LE O OE O SE SULI MONI

“ .. ao fa’agasolo pea aso o le matou mafutaga, sa fa’afuase’i ona ma’i tigaina le Tama o le aiga, ona alu ese ai loa lea o ia ae nonofo ai pea na o le fafine meauli ma lana fanau i lo ma aiga. Ua alu aso ae sau aso o le mafutaga, ma ua amata fo’i ona tutupu lagona fiu o le fafine ma lana fanau e nonofo pologa i lo ma aiga, ma ua toe fia fo’i i le nu’u na o mai ai, ae paga lea, e leai se isi o le nu’u na manana’o e toe fo’i atu o ia ma lona aiga, o le mafua’aga lea o lo matou nonofo ai pea iinei”. O le fa’amatalaga fa’aumiumi lea a le fafine o Mekala ao fa’alogologo pea ma le toto’a le tamaloa o Meki ma ana Leoleonana e teo’alua. “O fea na toe alu i ai le Tama o le aiga ina ua ma’itigaina o ia”, o le fesili fiailoa lea a Meki. Sa nofo Mekala mo se taimi umi ua le gagana. “E foliga mai e te le o tautala sa’o mai i lau molimau. O lea sa e fa’apea mai na toe fo’i le Tamaloa ina ua ma’i, o lea matou te fia iloa poo fea na toe fo’i i ai le Tamaloa ina ua ma’itigaina, ae aisea fo’i na toe fo’i ai ao lea ua ma’itigaina”. Na punou Mekala i lalo mo se taimi umi, ona ea lea i luga ma fa’apea atu ia Meki ma ana Leoleonana, “Na toe fo’i o ia i lona nu’u, ae ou te le iloa poo fea lona nu’u”. Na leai ma se isi na toe gagana i totonu o le potu o loo faia ai le fa’atalatalanoaga mo se taimi umi. Ae o Meki i le taimi lea, ua na o le nofo lava ma faataupupula atu i foliga o le fafine o Mekala, ona ia fa’apea atu lea i le fafine ma lona leo malu, “Mekala, o lea matou te iloa e te le o tautalasa’o mai i lau molimau. Ae o ripoti ua matou maua, o le Tamaloa e pei ona taua na toe fo’i i lona aiga ina ua ma’i, e le sa’o lea ripoti, ona o le Tamaloa lea na maliu ma tanu i lalo o se tasi o laau tele lava i totonu o le lua fanua e oo mai lava i le taimi nei”. O le fa’amatalaga lea a le tamaloa o Meki na vaaia ai le nofo sa’o i luga o le fafine o Mekala ua te’i, ona fa’apea atu lea o lana tala, “E moni lelei lau susuga a le Leoleonana, ae ma te lei fasiotia o ia, sa ma’i tigaina ma i’u ai lava ina maliu ma faia ai loa le tonu e tanumia o ia i lalo o se laau tele i totonu o le fanua”. O le tali atu lea a Mekala i Leoleonana ma lona manatu o le a mafai ona fesoasoani atu ali’i Leoleonana ia te ia ina ia fa’a faigofie lana mataupu.

“Vaai oe Mekala, o lea ua i ai faamaoniga o le solitulafono sa oulua faia ma lona to’alua o Pulusi, o le fa’a pologaina o tagata pologa i se auala e sili atu ma le tulafono e tatau ona i ai. E le gata i le fa’apologa ma faia i ai sauaga, ae ua faaufiufi fo’i mea sa tutupu e pei o le tanu faalilolilo o le Tamaloa ina ua oti e aunoa ma le logoina o le falema’i poo Leoleo. O tagata pologa, e i ai fo’i le tulafono e puipuia ai o latou aia i le atunu’u. Sa tatau ona ave le Tamaloa i le falema’i ina ua gasegase o ia, ao lea ua manino mai i ripoti, e silia i le 6 masina na ma’i ai le Tamaloa, ae sa e musu e ave i le falema’i, seia oo lava ina oti o ia. E oo fo’i i isi ana fanau ma lona to’alua, ana leai Tama’ita’i Tausima’i na asiasi faafuase’i atu i ai semanu e maliliu uma fo’i i latou i le siama mata’utia lea ua salalau solo, o le mea lea, o lea ua i ai mau faamaonia o le solitulafono sa oulua faia ma lou to’alua, ma ua mana’omia sa oulua fa’amatalaga e tuuina mai i lenei taimi”. O le fa’amatalaga lea a le tamaloa o Meki na vaaia ai le punou i lalo o Mekala ua matua mata faanoanoa lava.

Ua ea i luga le fafine ma fa’apea atu i Leoleonana, “E moni lava, sa maua agaleaga i le Tamaloa meauli ma lona aiga, ona o lo ma talitonuga o i latou uma lava o tagata pologa, ma e tatau fo’i ona faia i latou e pei lava ona pologa, ae afai ua avea o se solitulafono mo i maua, ma te talosaga atu ina ia tuuina mai se avanoa mo i maua”. O le talosaga lea a Mekala, peita’i na fa’ailoa i ai e Meki, e le o se latou galuega le tuu atu o le avanoa mo laua, o le tiute lena a le Fa’amasino pe afai ae mautu ripoti e lagolagoina ai moliaga fa’asaga ia tei laua, ae tatau fo’i ona saili loa se la loia e fesoasoani i le la mataupu.