Tala I Vaifanua

FA'ALETONU FUA O FA'AELEELEAGA - FOFOGA TAUMAFA ATUNU'U

I le taimi nei i le Maketi i Fagatogo fa'apea fo'i autafa o le alatele, ua va'aia lava le seasea ona maua o se talo lapopo'a lelei, ua va'aia na'i fuauli lava e aoga mo le 'aiga a le aiga, ae o lo'o tumau pea le tau i le ta'i $10 i le fa'aputuga uli e na'o le 9 pe 10.

"O le taimi nei, o le fafai lava o nai uli e toe polili ai ma toto ma'umaga fou, o le aumai fo'i lena o fuauli e fa'atau mo se seleni a lenei faifa'ato'aga laititi. Ou te le'i sapalaia lava le polokalama a le SLP po'o Me'ai a le fanau a'oga, ae o lea e na'o na aumai lava e maua ai sa'u seleni e fa'amalosia atili ai le naunau e toto lo'u maumaga aua le lumana'i,” o se tala lea a le ali'i e ona le fa'ato'aga lea e aumaia ai le fuauli mai Mapusaga.

O le tele fo'i o le fa'i papalagi, ua leai se mea ua toe va'aia i le Maketi. O le taimi fo'i e masani ona o'o ane ai fale'aiga mo fa'atauga o mea a'ao, ua le toe va'aia le fa'atauina o se talo, ae ua alu aga'i i le fa'i pe afai fo'i e maua.

"O le taimi nei, ua leiloa se taimi e asiasi mai ai i le maketi, ua taumafai fo'i ona oka sa'o lava i faifa'ato'aga le talo ma le fa'i aua le fofoga taumafa o le atunu'u e gasolo atu i le matou fale'aiga. Peita'i o le niu lava latou e usu po mai i ai aua e to'atele i latou e alumia ai i luga o le tafa pe a folasia loa,” o le tala lea a Feagai Unasa, sa alu atu mo le fa'atauga a le DDW, lea e fa'aaogaina lava le Maketi i ana fefa'ataua'iga o fua o fa'aeleeleaga mo le faleaiga i Utulei.

Ina ua fesiligia le Ofisa Autu o mea'ai a le fanau a'oga i Tafuna, sa fa'ailoa mai e le tama'ita'i o Lei, lea e tau atu i ai le sapalai a faifa'ato'aga, "O le taimi nei, ua tau leai se talo ma le fa'i ua aumaia, aua e fuafua lava i le malosi o le faifa'ato'aga latou ona aumaia lea o le sapalai. Ua vaivai i le taimi nei, ua le pei o le tauvaga lea sa masani ona faia mai i tausaga ua te'a, ua va'aia lava ua afaina le tatou lea sapalai."

Ua o'o lava fo'i i fua o esi ma le fa'i pula ua fa'apena ona vaivai i le taimi nei. Peita'i ua fa'aaogaina lava la fuala'au aina mata ua mae'a tu'uapa mo le fanau a'oga i lenei vaitau, aua ua masani le tatou atunu'u i afaina e o'o i ai pe a tuana'i taimi o pagatia i afa i le atunu'u.

O se va'aiga i le Maketi i Fagatogo, ua na'o fuauli na fa'atau ai i le taeao o le aso Lua, tasi le taufai ma le taufai Samoa e taulia ai lea taeao. O le fa'atauga a fale'aiga, ave uma fa'i alu atu ai ma talo, ae tu'u ai na'o tau fuauli e talia le mamalu lautele. E tasi lava le tau ufi na va'aia o i ai.

Ua to'atasi lava le faifa'ato'aga na fa'atau ana ulu, ae le tele fo'i nao le fa lava tauulu ma e le'i umi fo'i ae leai se mea na totoe i lea taeao. Leai ma ni fuala'au 'aina mata e aofia ai le esi, faipula ma le fala.

POLOKALAMA TAOA - FA'AMALOSITINO MA AUAU

Ua tatala le masina o Me 2018, e fa'ataua aloaia ai le vasega o Matua Matutua o le Atunuu, i le faia o latou lesona mo fa'amalositino e faia ma 'au'au i le sami po'o le vaita'ele mo le mamalu lautele o le atunu'u i Pala Lagoon, Paka Liona I Nuuuli.

"O lenei fa'amoemoe, ua amata ai ona toe fa'afo'i le aotelega o mafaufauga o matua, e le o toe i ai se mea e taofiofia mai i latou i le fa'afiafia ma sa’oloto latou mafaufau mai le tele o mea e taofiofia ai le sa'olotoga e soifua fuafua i aso uma ua alafa'i mai ai i manuia o le Atua, ae maise ma le ola fou,” o se tala lea a le Fa’atonusili o le TAOA, Evelyn Lilio Satele.

O le taumafaiga ina ia fa'aaoga taimi tatau e faia ai faamalositino i le vaita'ele, e le gata ina aoga tele i le tino le ta'ele i le sami ma 'au'au aua e pei lava o tamo'e, ae o le fiafia fo'i aua o lo'o 'au'au fa'atasi ma isi a latou uo.

"O se taumafaiga fai to'atele, e sili ona fiafia ai tagata nai lo lou taumafai to'atasi, ae musu atu lava, ua leai se isi e toe fa'amalosia mai lou loto i lena mea sa e taumafai e fa'atino. E sili le matalalaga faitele nai lo le faia to'atasi,” o se isi lea fa'aopoopo a Satele i lea tulaga ua amatalia nei.

I lenei masina o le 'au'au o le TAOA mo latou polokalama fa'atino uma lava "Po'o le a Lou Matua, O'o i ai!" po'o le "Engaged at ALL Ages." Ua va'aia nisi o matua, e fa'afaigata ona auai i 'au'auga ma fa'amalositino i totonu o le Ta'elega i le Pala Lagoon ona o laei e tatau ona latou la'eia, ae o le isi vaega, ua o'o lava i ai, tusa po'o le a!

O nei fa'amalositino ma 'au'auga ua fa'atautaia e le tama'ita'i o Nua fa'atasi ma Loso I'aulualo.

"I le taimi nei, ua amata ona manatu matua matutua ua le toe aoga ona faia e i latou nisi o fa'amalositino ma galuega sa masani mai ai a'o talavou, ua mou atu fo'i le malosi, peita'i, e le tatau ona manatu fa'apea i latou, e ala ona e fa'avaivai e le faia na mea uma, ona o lou mafaufau i ai, ae o lo'o i ai pea le malosi, a fa'aaoga e fa'aumiumi lava ona maua pea le malosi o lou tino, e te savali ai, au'au ai ma faia fa'amalositino eseese. E te maofa i nisi o mea e mafai ona e faia i lou tino matua ua i ai nei,” o se toe fa'amalosi mai lea a le fa’atonusili.

Mo le masina atoa lenei, o le a fa'aauau ai pea ona faia latou fa'amalositino ma 'au'auga i le Vaita'ele mo le Lautele i Pala Lagoon.

“O Me 21-25, ua fa'atulaga mo le vaiaso fa'apitoa mo Tagata Matutua o le tatou atunu'u, ma e faia mea eseese lava e fa'afiafiaina ai i latou i le Nofoaga Autu i Pago Pago mo le TAOA. Ua talo atu ai ma le fiafia i tagata matutua uma ina ia fa'atasi ane i ai, ua mafai fo'i ona faia latou Bingo, Aso Fa'asamoa, o latou ta'aloga fa'asamoa na masani mai ai i tausaga a'o talavou, ma isi mea uma ae sami ai i le aso mulimuli e vala'aulia ai loa tagata matutua uma i le atunu'u ma fa'atasi atu ai fo'i ma le mamalu o le faigamalo e fa'atautaia le polokalama o lea aso fa'apitoa mo lenei tausaga,” o se tala lea a le fa’atonusili.