Molia Tuatoo i Uosigitone ona o tu’uaiga i lona fa’aoolima lona to’alua

Ua molia nei le ali’i o Steven Tuatoo i le Fa’amasinoga i King County Superior Court i Setete o Uosinitone i le moliaga mamafa o lona le usitaia lea o le poloaiga a le Fa’amasinoga sa tuuina atu ia te ia.

Na faamaonia mai e se sui o le Ofisa a le Loia Sili i King County i le Samoa News, le maea lea ona faila o le moliaga mamafa e tasi fa’asaga ia Tuatoo, ma ua taofia nei o ia i totonu o le falepuipui sei vagana ua ia totogi le $185,000, e fa’atalitali ai le isi ana iloiloga lea ua fuafua mo le aso 10 Me.

I faamaumauga a le fa’amasinoga i King County o lo o taua ai e fa’apea, o le aso 21 Mati 2018 na molia muamua ai Tuatoo i luma o le fa’amasinoga, e mafua mai i lona fa’aoolima i lona to’alua.

E $25,000 le tupe na totogi ma tatala ai o ia i tua ina ua mae’a lana fa’amasinoga. O tuutuuga na tatala ai o ia i tua, e le tatau ona ia toe faafesootaiina lona to’alua. Sa poloaina fo’i e le fa’amasinoga le le tatau lea ia Tuatoo ona ia toe latalata i lona to’alua - mo le 10 tausaga - amata atu i le aso 21 Mati 2018 seia oo atu i le aso 21 Mati 2028.

O le taeao o le aso 12 Aperila ina ua tuana’i ai vaiaso e 3 talu ona tatala Tuatoo i tua, ae toe pu’e faapagota ai loa o ia e leoleo ma molia i lona le usitaia o le poloaiga a le fa’amasinoga, e mafua mai ina ua toe ripotia e lona to’alua le fa’aoolima o Tuatoo ia te ia i le masina na te’a nei.

O le mataupu fou e pei ona tuuaia ai Tuatoo e le malo, na mafua ai loa ona talosaga le malo i le fa’amasinoga e faaopoopo le tupe e tatala ai o ia i tua mai le $25,000 i le $100,000. Na talia e le fa’amasinoga le talosaga a le malo ma fa’atulaga ai loa i le $185,000 le tupe e totogi ona fa’atoa mafai lea ona tatala le ua molia i tua.

Na taua i faamaumauga a le fa’amasinoga e fa’apea, pe tusa o le itula e 9:00 o le taeao o le aso 12 Aperila na te’a nei, na aga’i atu ai Tuatoo ma lona to’alua e momoli le la tama i le aoga.

Ina ua toe fo’i le ulugali’i i le fale, na amata ai loa ona tuuaia e Tuatoo lona to’alua i le faia lea o se la faanunumi ma se isi tamaloa. Na avea lea finauga ma itu na ita ai Tuatoo ma i’u i lona fa’aoolima i lona to’alua i totonu o le ta’avale.

Na taunu’u le ulugalii i le fale ma toe fa’aoolima ai foi Tuatoo i lona to’alua e ala i lona tu’i o ona foliga ma tafe mai ai le toto i lona isu.

O le tuafafine o Tuatoo sa i ai o ia i le foga fale i luga o le fale, sa ia lagonaina mai le vevesi ma tamo’e mai ai loa i lalo e vaai. E taunu’u mai o ia ae vaaia loa le ulufafo o Tuatoo ma le faitoto’a o le fale, ma aga’i atu ua oso i le ta’avale ma alu ese loa.

Ina ua mae’a ona fesiligia e Leoleo le fafine ma le tuafafine a le ua molia, na aga’i atu ai loa leoleo e saili mai le ua molia. Na maua ma auina atu o ia i le ofisa mo suesuega.

Ina ua fesiligia o ia, na tete’e Tuatoo i tuuaiga sa ia fasi lona to’alua i totonu o le ta’avale, peita’i sa ia ioe i tuuaiga sa ia fasi ia te ia i totonu o le fale. Sa ia tautino i leoleo e faapea, sa faapea lava o ia o ni mea pepelo o loo ia faia, ae na te’i ina ua tau lana tu’i i le isu o lona to’alua ma ia vaaia ai le tafe mai i lalo o le toto.

E le o mautu mai i le taimi nei poo i ai ni talanoaga i le va o le ofisa o leoleo i King County ma le ofisa o leoleo i Amerika Samoa nei, mo se avanoa e toe fa’afo’i mai ai Tuatoo e tali i ona moliaga i luma o le fa’amasinoga maualuga a Amerika Samoa.