Tala I Vaifanua

VAIASO FA'ATAUA AI FAIA'OGA AMERIKA SAMOA

Ua pisi atoa le vasega o fanau a'oga, e tauanau o latou matua i se meaalofa po'o se ula matagofie mo latou Faiaoga. Ia manatua Matua, "O le taimi nei e te fa'afetaia ai le galuega fa'amatua i le potu a'oga, ae maise o le galuega a'oa'o a le faia'oga o lo'o fa'atino mo tatou fanau i aso ta'itasi."

Ua iloga galuega a faia'oga. E ui i latou fo'i mafatiaga i aiga ma latou fa'aletonu e ono lutia ai o latou loto i le galuega a'oa'o o fanau, ae o lo'o fa'atino lava.

"Ua le o se galuega e faia mo le totogi, aua e mafai lava ona fa'apea e suia le galuega, ae saili se galuega e le tiga ai le mafaufau, ae maise o le onosa'i e taumafai ai ona fa'ato'afilemu lagona, ae a'oa'o fanau. O se tiute ua ofo e fa'atino, ae a se lelei o tupulaga a taeao o aiga, nu'u ma le atunu'u,” o se tala lea a se tasi o tina faia'oga, ua iloga ua matua, ae le o fia malolo ai lava!

O lea tina sa ia amatalia le ECE i Nuuuli, i le tama'i fale fa'asamoa lea e soso'o ma le Shoe Tree i Nuuuli lava. Ua leva tausaga ua gasolo atu fanau i lena vaitau, ma ua mae'a fa'au'u, o nisi ua amatalia aiga ma ua faigaluega, o nisi o lo'o i le vaega au ma ua amatalia fo'i aiga, ae le mafai ona misia i le va'ai a Etevise i latou sa ia aoaoina a'o ta'i 3, 4 ma le lima tausaga.

"Na ou alu i Amelika, ae ou te fia nofo ai, ou te le masani fo'i i le leai o se mea e fai. Na ou toe vala'au mai lava i le Ofisa Autu o le ECE, taofi atu lo'u avanoa, o lea ou te fia galue lava. E le'i avea fo'i maeaalofa taua a le Atua ia te a'u, o le mafaufau tonu ma le onosa'i e a'oa'o le fanau."

O Eletise ua 79 o tausaga o lona soifua, ua sauni lava e faia vasega a le fanau, pe a o'o ina mana'omia i totonu o le Center a le ECE. O lo'o malaga mai lava o ia i le Pasi i taeao ta'itasi ma nofo e tuli lana fa itula i lea Ofisa ae tuli le isi 4 itula i le Polokalama a le TAOA.

"E le mavae le lagona, a'o tu'u mai pea e le Atua le malosi ma le mafaufautonu ae la'ei i le onosa'i i mea uma, ua mafai ona faia le tofi o le a'oa'o o fanauiti, ia tutupu ma ia soifua tausaili ma le mata'u lava i le Atua."

Fa'afetai mo lea tina faia'oga, e mautinoa e leai se isi tina sili atu ona matua nai lo ia i le matagaluega o A'oga, peita'i o le tina fo'i o Iutita Savali na ia amatalia lea itu o le a'oa'oga fa'apitoa mo fanauiti, o le isi lea tina sa umi fo'i lana tautua ma o'o lona soifua i lea matua, a'o tautua lava.

Mo faia'oga uma o le atunu'u, "Fa'afetai mo lo outou titifaitama, fa'afetai mo lo outou faiva i aso ta'itasi o le a'oa'o o le fanau ia popoto ma atamamai, ia latou naunau i le soifua tausaili i manuia o le Atua, ma ia latou ola matata'u i Le e ona mea uma e aofia ai ma le atamai lautele ma le tamaoaiga. Ona o lo outou faia o outou faiva, ua manuia ai le lumana'i o le atunu'u ae maise aiga ma le galuega fo'i a le Atua i lo tatou atunu'u nei. Ia outou maua le taui mai le Atua."

FAIAOGA TAUSAGA 2018 - ULUFALE I LE FALEPA'EPA'E

"Talofa i o'u uso faia'oga uma i Amerika Samoa, manatu o lo'o manuia le tatou vaiaso ua fa'atauaina ai i tatou e le atunu'u atoa. O lea ua ou tulaueleele nei i le Maota Pa'epa'e ma ou va'ai patino ia Peresitene Trump o le tatou malo. O se mea ua matua fa'afiafiaina atili ai lo'u nei sui faia'oga fa'atauva'a, ae ua fa'aeaina i lenei tausaga e le tatou matagaluega o A'oga, e avatu ai sa'u fa'afetai,” o le tala lea ua fa'ao'o mai a Rosalee Tela Shoulders mai le laumua i Uosigitone DC. O Shoulders o le Faiaoga o le Tausaga 2018 a Amerika Samoa.

Taua e Shoulders na mua'i faafeiloa'ia i latou uma ma isi faiaoga i le Laumua ma asia ai le Falepa'epa'e ona o le sauniga aloaia fa’apitoa a Trump mo faiaoga uma o le tausaga mai setete ma teritori. O lea saunia sa fa’alauiloa ai le faiaoga o le tausaga mo Amerika atoa mai le setete o Uosinitone.

I le aso ananafi, na fa'aauau le maimoaga i le nofoaga o le US Naval Observatory, lea o lo’o i ai le maota o lo’o alaala ai le Sui Peresetene Mike Pence ma lona faletua. Sa mafai ona feiloai ma Pence ma pu’e ata ma faiaoga, e aofia ai Shoulders.

"O galuega uma sa fa'atino mo le fanau i potu a'oga, ua matua fa'amalieina lo'u nei sui faia'oga i le taui ua ou maua mai ai. O se taui e le faigofie ona ausia, ma atonu e uma lava le olaga galue e le au maua, pe ana le fa'aeaina a'u i lenei avanoa. O le fa'afetai lea e fa'auia atu i le fa'auluuluga o le Matagaluega o A'oga, Dr Ruth Matagi-Tofiga ma le taupulega atoa, ona o lo outou naunau ia tofu maua nei avanoa e faia'oga uma ua filiga i tiute tau le a'oa'o o fanau,” o se tala lea a Shoulders.

TAMA TAMO'E TAUVA AFELETI A LE OCEANIA VANUATU 2018

E toatasi le alo o Amerika Samoa ua auina atu nei mo ta'aloga afeleti po'o tu'uga tamo'e a le Oceania i Vanuatu. O ia lea o Iosefa Mauga Jr. mai le Aoga Maualuga a Nuuuli VocTech High ma o lo’o malaga ma lona Faia'oga i Ta'aloga Afeleti, Valusia Talataina, e ui atu i Apia ma Fiti.

E tasi le vaiaso o lea malaga i Vanuatu ma e toe taliu mai i le atunu’u ia Me 12.

"Ona o lenei fo'i fa'agatama e le faigofie ona maua ai nisi o tatou fanau e fia tauva ai, ae o lo'o fa'atautaia lava ta'amilosaga e le susuga le ali'i peresetene o Ta'aloga Afeleti Don Fuimaono, fa'apea fo'i le Failautusi Deanna Fuimaono i tausaga ta'itasi, ina ia mautu nisi o tatou fanau e tauva i nei fo'i fa'agatama,” o se tala lea a Talataina e tusa o le fa'afesili fo'i tau Taaloga Afeleti i le atunu'u.

I le masina o Aperila na tauva ai Mauga Jr. i Apia i se tauvaaga ma sui o Samoa.

Na amata mai ona koleni fa'apitoa Mauga i le masina o Novema 2017 se'ia o'o mai lava ina fa'atauva i Samoa ma ua tapena ai nei pe tua ma ni a lana taumafaiga i le Oceania fa'atasi uma ai ma e tamomoe mai Fiti, Niu Sila ma Ausetalia.

Ua talosaga mai le ali'i faia'oga, "Amerika Samoa tatalo mo se taumafiaga a lenei fo'i alo o le atunu'u pe tua mani a. Fa'afetaia fo'i le aosi a le Track & Field Athletics fa'atasi ma le Matagaluega o A'oga i le vasega a le OCI ona o le sapasapaia o lea fa'amoemoe lelei mo tatou fanau i le lumana'i, a'o se 'ai fa'avaomalo fo'i mo le tatou atunu'u.”