Liutofaga fitafita o le fuava’a a Niu Sila mai Satala

O le ali'i fitafita o le Fuava'a a le Malo o Niu Sila - Russell James Moore ua amatalia le galuega toe liutofaga ai o ia mo le tu'uva'a atu i Niu Sila, ae ua silia ma le tausaga talu ona fa'agaoioiga pepa ma aiaiga uma ina ia mafai ona fa'atino lea tulaga i le va o Amerika Samoa ma le Malo o Niu Sila.

O lenei fitafita na tu'umalo ia Iulai 9, 1956, ua na o le 19 ona tausaga, ma na maliu i se fa’alavelave le maalofia ma taoto ai lona tino maliu i le fanua tanu a le malo i Satala, o se tala lea mai le vaega  a le militeri i New Zealand.

Ua mae'a sailia uma le to'a 37 o Fitafita o le Fuava'a ma le Eafosi a Niu Sila ua tanumia o latou tino maliu i eleele o isi malo, ina ia toe fa'afo'ia i o latou aiga i Niu Sila.

O Andrew Morrison, le so’oupu a le "Royal New Zealand Air Force" sa malaga mai mo le tapu'eina o ata, ae maise fo'i o le fa'amaumauina o aiaiga uma na fa'atino ina ia mafai ona liutofaga lenei fitafita talavou a le latou malo mai lona fanuatanu o lagomau ai i Satala.

Na fa'ailoa e Morrison, "E to'a 37 i latou ua mautinoa e tatau ona ave'esea mai eleele o isi malo o lo'o ua mae'a lagomau ai, e ono malo nei, ae 9 fanuatanu e a'afia ai."

E to'alua fitafita o le Eafosi a Niu Sila sa lagomau i Suva, Fiti i Laucala Bay, le nofoaga ua fa'atuina ai nei le University of the South Pacific. Peita'i o le fanuatanu lea i lena a'ai ua lagaina ma liutofaga ali'i fitafita e to'alua ma ua mae'a lena galuega tele, ae o lea ua fa'asolo mai ai i Amerika Samoa nei.

Ua fa'akonekarate e le Fuava'a a Niu Sila le Kamupani a le Island Funeral Services a Sa “Loma" Iosia i Nuuuli latou te galulue feso'ota'i ma i latou, fa'atasi ai ma le US Amry Reserve i Tafuna ma le Ofisa o le Lutena Kovana Lemanu Peleti Mauga, atoa ma le Matagaluega o Paka Ma Malae Ta'alo a le tatou Malo, i le tapenaga o lenei fa'amoemoe.

"Ona o le galuega e fai lava se umi o aiaia mai, ina ia usita'ia atoa tulafono a le tatou Malo tau tagata e toe liutofaga, o lea ua fiafia ai fo'i, aua e pei lava na'o tatou tagata Samoa lava e masani ona faia lea fo'i tu ma aga i le tele o taimi, ae o lea ua tapena mai lea Militeri a Niu Sila i lea tulaga, e matua mae'ae'a lava latou gaoioiga ma le latou tapenaga ia leai se mea e tasi e sasi ai le fa'ataunu'uina ma fa'amalie tulafono uma e tau i le fa'amoemoe,” o se tala lea a le Fa'atonu sili o Paka ma Malae Ta'alo, Ken Tupua, lea fo'i e nafa ma le vaaiga o le fanuatanu a le Malo i Satala.

"O le mea muamua lava sa tapena ia mama le nofoaga, ua lelei fo'i ua faia i le amataga o le masina mo le tapenaga fo'i o fanua mo pelega a le atunu'u o lo ua ma'ea lagomau i ti'asa. O lea ua amata ai ona fa'amama le vao ma va'ai toto'a fanua uma ia mautu ona fa'apae lelei, aua e tele tu'ugamau ma'a o aofia i le fanuatanu lenei i Satala,” o se fa’amatalaga lea a Tupua.

O le ta'ita'i o le aumalaga a le Royal New Zealand Air Force o le ali'i Group Captain Carl Nixon, ma o ia lea sa ia fa'amatala, "O le galuega lenei, e faia lava suesuega ina ia fa'amaonia le sui ua tanumia, o le susuga tonu lea ia Russell James Moore. Afai ae le tonu e tusa o suesuega o ponaivi ma nifo, lea ua malaga mai ai foma'i fa'apitoa nei, o le a toe tanumia lava, e leai ma se mea e tasi e ave'esea e i matou. Ae o le tulaga ua i ai nei, e le o masalomia le tonu o le fa'ailo o lona tu'ugamau lea, peita'i e ao ina mautinoa ua tonu mea uma."

Na ia fa'ailoa mai fo'i sa fa'apea fo'i ona faia mo sui e to'alua o le NZ Air Force lea ua mae'a liutofaga i Fiti ma fa'afo'i i Niu Sila.

O i latou e malaga atu i Niu Sila ma le Sa o le fitafita ua toe liutofaga e to'afitu mai le Royal New Zealand Navy, ma e to'atasi le alo e tupuga atu i Samoa o lo'o auai ai, le tama'ita'i lea o Irene Taua'i.

Na soifua a'e o ia i Tauranga Bay of Plenty, ma ua ia fa'ailoa mai, "O lo'u fa'ato'a o'o mai lava lea i Samoa ma Amerika Samoa. E matua matagofie tele motu na sofua a'e ai o'u matua. E i ai le uso o lo'u tama o lo ua ia fa'ailoa mai, o lo'o alaala i Tutuila nei, o Taua'i fo'i lona fa'ai'u."

O le to'afitu lea, e faia e i latou pesepesega ma le lotu i taeao ta'itasi uma lava o le a latou fe'avea'ia ai lenei pusa maliu. O se tu ma aga ia fa'a-aganu'u a Maori i Aotearoa, ma e malaga fa'atasi fo'i i latou i le va'alele a le Eafosi e tulaueleele mai i le aoauli o le aso To'ona'i nei, ae fa'ato'a tu'uva'a ese atu i le itula e 6:00 i le taeao o le aso Sa mo Niu Sila.

I le sauniga na fa'atautaia, sa mua'i faia fa'aleaganu'u Maori lava, ma sa masi'i mai fo'i se tasi o ta'ita'i iloga o Maori mo lea fa'amoemoe, o i la'ua ma lona to'alua na muamua lava faia le sauniga lea. Ina ua mae'a lelei ona tolaulauina fo'i lagi fa'amaori o le laueleele ona fa'ato'a tu'uina lea o le avanoa mo le sauniga fa'apapalagi, ma sa malaga mai fo'i le Faife'au a le Fuava'a a le Militeri mo lea fa'amoemoe.

I le tolaulauina o lagi ia, na o'o lava i le lagi tuaiva ma uio loa lea ali'i Maori taua, e fa'apa'ia le atulagi lona sefulu.

O le sauniga sa toe fa'ao'o ai le fanoga i le Atua ia matala le lagi, ma ia fa'amanuia mai i le fa'amoemoe e toe liutofaga le ali'i na tautua i le malo o Niu Sila ma ona tagata i le taimi o taua, ma ua tu'uina atu lona ola o se fa'amau o lana tautua toto i lona atunu'u.