E LE O OE O SE SULI MONI

Vaega 114

Na umi se taimi o tu le fafine o Mekala ma fa’atau pupula i le tama’ita’i o Ianeta ma le ofo tele o lona loto, i le suiga ua ia molimauina i le teineititi sa fai ma pologa i totonu o lona aiga mo le tele o tausaga. A o tu Mekala ma fa’atau pupula i le tama’ita’i o Ianeta, sa fa’afuase’i ona ia vaaia se ali’i tino maualuga toe taualoa ua savali ane ma tu i tafatafa o Ianeta. O ona laei ma ona foliga vaaia na fa’ateia ai Mekala ma ia manatu ai, atonu o ia o se tagata maualuga i le malo. A o tau fa’afesoota’i manatu o le fafine saua o Mekala, o le taimi lea na aapa atu ai le ali’i o Laneselota ma tu’u atu lona lima e fa’atalofa atu ai i le lima o le fafine ma fa’apea atu i ai, “Talofa, ta te le masani, ae o a’u o Laneselota, o le to’alua o Ianeta”. Na tau puni le manava a Makela ina ua taia lana fa’alogo i le upu “to’alua”, a o taumafai e tu’u fa’amalosi mai lona lima e fa’atalofa ai i le lima o le ali’i o Laneselota e aunoa ma se tupu na gagana ai, ae fa’afuase’i loa ona fa’apea atu le ali’i Leoleonana, “Tina, ua tatau ona ta i ai i totonu o le potu o loo fa’atali mai ai lo’u Ta’ita’i mo oe”. E fai lava tala a le ali’i Leoleo ma ia tago ua ta’ita’i le lima o Mekala ma fa’asino i ai le auala e aga’i i le faitoto’a o le potu lea ua fa’amoemoe e faia ai la latou talanoa.

A o ta’ita’i ese atu e Leoleonana ia Mekala, o le taimi lea na savali atu ai Laneselota ma opo mai si ona to’alua ma musumusu atu i ai, “Ianeta, ou te iloa le faigata o le tulaga ua toe o o i ai ou lagona ina ua e toe vaai i le fafine saua sa ia faapologa i lou Tina aemaise ai oe i aso ua mavae. Aua e te popole o lea ua taoto atu lana mataupu i luma o le tulafono aemaise lou Tama ma le latou Ofisa. Afai e i ai se isi vaega e mana’omia ai la’u fesoasoani, o le a ou taumafai i le mea e gata mai ai lo’u iloa ina ia fa’atino tulaga uma, ina ia mautinoa e tuuina atu ia te ia nei le sala e talafeagai ma amioga le taupulea sa ia faia ia te oe ma lou aiga”. Na lagona e Ianeta le mafanafana o lona loto i upu fa’aleiau a si ona to’alua ia te ia, aemaise ai o lea ua taoto atu le suesueina o le mataupu i lona Tama ma le vaega o Leoleonana.

Sei o tatou tuliloaina atu lava Tausima’i ma le fafine meauli ma lana fanau lea ua aga’i atu i le Falema’i tele a le malo. E foliga mai ua siliga tali i seu e togafiti mo le tama a le fafine meauli lea na ave muamua i le falema’i, ona o lea ua taunu’u Tausima’i ae logo ane i ai le tala, ua le aoga i ai se togafiti ona ua fai si umi o a’afia lenei alualutoto i le siama o le fa’ama’i. O ‘auga o le fa’ama’i e pei ona fa’amatala e foma’i i le fafine meauli, e mafua mai i feau vai (tulou) a meaola eseese ua mafai ona fesoota’i ma le tagata soifua. O masalosaloga i le auala ua mafua ai ona a’afia lenei Tina meauli ma lana fanau i ‘auga o lenei siama mata’utia, na mafua ai loa ona maua le avanoa e fesiligia ai e Tausima’i ia le fafine meauli i le auala e tausi ai e le fafine o Mekala o ia ma lana fanau i totonu o le aiga. O se molimau fa’amomoi loto sa fa’amatala e le fafine i Tausima’i aemaise ai ali’i Foma’i sa gafa ma le togafitiina o lana fanau, ona o le tele o taimi latou te aai ai i pepa maai e masalomia o ni meaai e fafaga ai meaola. Na taua e le Tina e fa’apea, o le mafua’aga fo’i lea na masalomia ai le gasegase tuga na a’afia ai lona to’alua mo se taimi umi lava, seia oo lava ina oti o ia.

“O i ai ni fa’amaumauga a le falema’i poo le Ofisa o Leoleo e fa’atatau i le maliu o lou to’alua”, o le fesili fia iloa lea a le isi ali’i Foma’i, ae na tali le fafine mueaili, “E leai, e tusama le 6 masina o taoto lo’u to’alua i le falema’i ona o le ma’i tigaina na a’afia ai o ia, seia oo lava ina oti. O lo o tanumia lona tino i tua o le fanua a le ulugali’i o lo o matou nonofo ai nei”. Na ese le fa’alogo a foma’i i le ripoti a le fafine meauli ua tuuina atu, o lea na faia ai loa le fa’aiuga, o le a logo lenei mataupu i le Ofisa o Leoleonana a le malo, ina ia fa’atino i ai sa latou suesuega, atonu e i ai ni isi mea lililo i tua atu o lenei mataupu e le o mafai ona fa’ailoaina’