Poloaina le tusi saisai e sailia ai Titiula Tagaloa

Ua poloaina nei e le Fa’amasinoga Maualuga se tusi saisai e sailia mai ai le tama’ita’i o Titiula Tagaloa, ina ua le usitaia e ia le poloaiga na tuuina atu e le Fa’amasino Sili i le aso Faraile na te’a nei, ina ia toe oo atu i luma o le Fa’amasinoga i le aso Gafua o le vaiaso nei mo le toe fa’aauauina o le iloiloga mo lana mataupu.

O le aso Gafua lava na te’a nei na faila ai loa e le Ofisa Faanofovaavaaia se talosaga i luma o le Fa’amasinoga, e poloaina ai se faaiuga ina ia fa’asala ai Tagaloa i lona gau pule lea i le poloaiga a le Fa’amasinoga sa tuuina atu ia te ia.

O le mae’a ai ona pu’e fa’apagota e Leoleo o Tagaloa i le masina o Setema o le tausaga na te’a nei ma molia i le umia fa’asolitulafono o vaega o le pauta oona o le aisa, na fa’atulaga ai loa e le fa’amasinoga le $30,000 e tatala ai o ia i tua.

O tuutuuga o lo o tatala ai Tagaloa i tua ina ua mae’a ona ia totogi le $30,000, e aofia ai le auai i soo se taimi e valaau ai ana mataupu, alu e asi le ofisa faanofovaavaaia i masina ta’itasi, aua ne’i ona toe tagofia fualaau faasaina poo le ‘ava malosi, ma ia tuuna atu fo’i lona tino e faia i ai ni suega ina ia faamaonia ai na te le o toe tagofia fualaau fa’asaina.

Talu ona tatala Tagaloa i tua, e le i alu lava o ia e asi le ofisa faanofovaavaaia i masina ta’itasi. Ua fiu fo’i le Ofisa Faanofovaavaaia e faafesoota’i o ia ma asia fo’i lona aiga, e le i maua lava. O le mafua’aga lea na faila ai loa e le Ofisa Faanofovaavaaia se talosaga e fa’aleaoga ai tuutuuga o lo o tatala ai Tagaloa i tua.

O le aso Faraile na te’a nei na fa’atulaga ai loa le iloiloga mo le mataupu a Tagaloa, lea fo’i na auai atu i ai o ia fa’atasi ai ma lana loia ia Michael White.

O le tama’ita’i loia ia Christy Dunn mai le ofisa o le loia sili o lo o tula’i mo le malo. O le afioga i le Fa’amasino Sili ia Michael Kruse o lo o taulimaina le mataupu a Tagaloa, fa’atasi ai ma le lagolagosua a afioga i ali’i fa’amasino lagolago ia Fa’amausili Pomele ma Muasau Tasina Tofili.

Na taua e le Pulesili o le Ofisa Faanofovaavaaia i lana molimau i luga o le nofoa molimau e fa’apea, talu lava ona tatala i tua ia Tagaloa, e le i alu atu lava e fai sana suega poo ia usitaia tuutuuga o le aua ne’i ona toe tagofia fualaau faasaina.

“Ua fa’atele ona o Masela o le fa’amasinoga e su’e o ia i lona fale e le maua lava. Sa ou talanoa i lana loia, ma ia fa’ailoa mai ai le fa’afitauli lava fo’i lea e tasi, i le fiu o lona ofisa e fa’afesootai Tagaloa e le maua”, o le molimau lea a le Pulesili o le Ofisa Faanofovaavaaia.

A o faia le molimau a le Pulesili o le Ofisa Faanofovaavaaia, sa molimauina le lulu o le ulu o Tagaloa e foliga e atagia mai ai lona le taliaina o le fa’amatalaga a le molimau.

Na fa’afuase’i ona ‘e ‘e Kruse ma faapea atu i ai, “Aua ne’i toe luluina lou ulu faapena. Afai e faigata ona tau saili le nofoaga e maua i ai oe, e sili ai loa le toe ave o oe e fai ma tagata tausi a le Pule o le Falepuipui i Tafuna”.

Talu ai sa fia maua e le fa’amasinoga po o usitaia e le ua molia poloaiga na tatala ai o ia i tua, e aofia ai le faia o se suega i lona tino e iloa ai poo ia fa’aaogaina fualaau fa’asaina, na finagalo ai loa le afioga i le Faamasino Sili e toe tolopo le mataupu a Tagaloa e toe fa’aauau i le aso Gafua na te’a nei, ae se’i faia le suega e moomia ona faia.

E talitonu le Samoa News, o le mae’a ai le iloiloga a Tagaloa i le aso Faraile na te’a nei, na faia ai loa lana suega e iloa ai poo ia tagofia fualaau fa’asaina.

Ina ua oo i le aso Gafua na te’a nei, na fiu le fa’amasinoga e fa’atali le ua molia e le i o o atu. O le mafua’aga lea na poloaina ai loa e Kruse le tusi saisai e pu’e fa’apagota mai ai Tagaloa, atoa ai ma le taofia loa e le fa’amasinoga o le tupe sa totogi e tatala ai o ia i tua.

O le a mafai ona toe valaauina le mataupu a Tagaloa i luma o le fa’amasinoga, pe afai ae maua o ia e Leoleo poo Masela fo’i a le fa’amasinoga.