Tala I Vaifanua

SUIA PEPA MEA'AI "WIC A LE FANAU & TINA " - "CARD eWIC"

O se amataga fou ua mafuli atu i ai le fa'atautaiga o le Polokalama o le WIC a tina ma'itaga, Failele Fa'asusu Pepe ma le Fanauiti aua o lo ua tapena le matagaluega ina ia fa'auia uma latou penefiti i le Card eWIC, e amata ia Me 2, 2018.

O lenei suiga fou, e le gata ina o'o mai ai le Ofisa autu mai le Polokalama e faia suiga e tatau ona fa'atino i totonu o le Ofisa autu e tautuaina mai ai Tina ma Fanauiti, ae o le tapenaga fo'i o fa'amaumauga uma ina ia mafai ona fa'auia i le Card eWIC o le a taua'aoina i aiga ta'itasi.

"O le faiga o lo'o ua fa'atulaga nei, ua fa'asolo i aiga, afai o le tina ma'itaga pe failele ae ua i ai ma lana fanauiti, e tasi le pepa lea mo le aiga atoa. E tasi fo'i le masina e ao ina fa'aaogaina ai penefiti o le masina e tasi,” o se fa'apupulaga mai lea i le Ofisa a le WIC.

"O lenei suiga o lo ua galulue fa'atasi i ai le tatou Ofisa iinei ma sui malaga fa'apitoa mai fafo, ina ia fa'auia uma fa'amaumauga i totonu o nei pepa tala ai mea'ai fa'aeletoronisi, ma ua alagatutusa lelei ai lava i tatou ma isi setete ma teritori i lenei polokalama,” o se fa'amatalaga lea a se tasi o tama'ita'i sinia i lea fo'i polokalama Siniva Faiai Samoa.

"O lenei suiga, o se suiga ia lelei atili ona fa'aaoga le polokalama e i latou o lo'o agava'a ai. Taumafai fo'i le mea sili ona ia taofiofi le fa'aaoga le tatau o lenei alamanuia, ae ia fa'aaoga patino e tusa o aiaiga o le polokalama ua ala ai ona taua'aoina mai mo i tatou uma i le tatou nei atunu'u,” o se toe tima'i mai lea a le faletua.

Ua o'o la i masini i faleoloa e fa'aaoga ai nei Cards ua tapena i ai le matagaluega. O Faleoloa uma lava e agava'a e tautuaina le tina ma fanauiti i lea alamanuia, ua fa'asolo atu sui mai fafo ina ia fa'apipi'i ai nei masini i a latou Kesia.

"O a lava oloa ua fa'aaogaina e le polokalama o le WIC, ua lisia i totonu o nei masini, ma o le a faia le fa'atau a le tina ae talafeagai lelei le lisi i lana pepa ma le lisi o le a ia fa'aaogaina e tala mai i totonu o nei masini. O lona uiga afai e tolu apasaga o agava'a ai, e tolu fo'i apasaga o le a totogia mai e le Card eWIC. O le fa'ailo lea e maua e i matou i le Ofisa ulu pe a o'o ina taga'i i au fa'atauga sa faia ma fa'aaoga ai nei pepa tala oloa,” o se si lea fa'apupulaga atili o suiga ua o atu fa'atasi ma le eWIC Card.

Ina ua fesiligia lea Ofisa pe mata ua fuafua le polokalama a le Food Stamp e faia i ai lea suiga, ae fa'ailoa mai, e le o iloa i le taimi nei.

I Hawaii ma isi setete o Amerika, ua fa'a-ebt "Eletronic Benefit Transfer" a latou penefiti.

FA'ALETONU VA'ALELE TALOFA AIR - TOE FO'I MALAGA I SAMOA

I le taimi nei ua le fealua'i le va'alele a le Talofa Airways i le va o Tafuna Airport ma Fagali'i, Samoa, ona o ni fa'aletonu na a'afia ai i se tasi o ana malaga i le aso Gafua (taimi Amerika Samoa).

O le tala mai a nisi sa malaga i lenei va'alele, na tu'uva'a ese mai le va'alele mai Apia mo Pago Pago, peita'i na a'afia le afi o le va'alele ma ua toe fa'ailoa ane loa e ali'i Pailate o le a toe fo'i le va'alele i Faleolo, Samoa.

"I le Faleolo Airport sa fa'avave ane lava le vaega a le tinei afi ma faga atoa le afi o le va'alele ina ia le toe fa'aleagaina nisi mea. E fa'afetaia lava le to'a o le vasega o ali'i pailate na fa'atautaia le malaga,” o se tala lea a se tasi o le pasese na malaga mai ai.

Ina ua fesiligia le ofisa o le Talofa Air i le Malae Va'alele i Tafuna i se fa'amaoniga o lea fa'amatalaga, ae fa'ailoa mai, "Ua le mautinoa e le matou nei Ofisa le mafuaga tonu o le fa'aletonu o le va'alele, ma e mautinoa e fa'ao'o mai se tala i le matou nei Ofisa autu, ae e moni lava le fa'amatalaga, o le taimi nei, ua taofia malaga a le va'alele se'ia vagana ua toe pasia lelei, ua agava'a mo femalaga'iga i le ea mo le mamalu o le atunu'u."

Ina ua fesiligia fo'i mo se isi va'alele e fa'aauauina le tautua, ae o le taimi nei e leai se isi va'alele a le Talofa Air ae ua fa'aaogaina e i latou va'alele a le Samoa Airways e fa'auia ai a latou pasese.

TUSIGA SOLO - FA'ATAUMAOI PO'O SAUAGA FA'ALEITUAIGA

Ua ese fo'i le kosi lea ua uia nei e le "Mau e Fa'amalosia Aiga" ina ia mafai lava ona o'o atu le taumafaiga e fa'ailo, tineia ma ia fa'asa'oloto mai tagata uma o aiga ta'itasi mai le tele o ituaiga o sauaga eseese ae maise lava i le "Sauaga Fa'aleituaiga".

O le faiga fou lea ua tula'i mai, o Tusiga Solo e fa'atatau i lea tulaga faigata. "E tatau ona fa'amati'e i loto o tagata ona talanoa aga'i i lea fita ma faia po'o a ni vaifofo e mafai ai ona le toe tupu ia sauaga i totonu o aiga ta'itasi o le atunu'u,” o se fa'amatalaga lea a le tama'ita'i o lo'o autu i ai lea tusigasolo i le  Alliance for Strengthening Families i Nuuuli.

O le tauvaga lea, e una'ia ai tagata e tusia o latou lagona, fa'atasi ai ma so latou iloa o ni vaifofo e ao ina soloia ai fa'afitauli nei mai totonu o aiga Samoa.

O lo ua i ai fo'i le tama'ita'i o Doris Tilafau, o le na fa'atuina le "Brown Girl Woke" ina ia fesoasoani i le tu'ufa'atasiga ma le fa'atautaiga o lea tauvaga tusiga solo.

O le a faitauina aloaia nei solo uma i le Lecture Hall a le ASCC i le itula e 2:30 i le afiafi nei, aso Lulu, ma ua vala'aulia le mamalu lautele i lenei fa’atasiga.

MANATU FA'AALIA FA'ALELEIA ALAVAI MA TAFEAGA

I le afiafi a tamali'i na auai sui o le FEMA ina ia laulausasa'a fo'i o latou lagona ma auaunaga ua mafai ona ofoina mo le mamalu lautele o le atunu'u ona o le ‘afa o Gita, na fesiligia ai e nisi o sui o le Kalapu a le Liona, se fesoasoani a le FEMA i tulaga o tafeaga ma alavai i le teritori.

O le susuga Kevin Cavanaugh na tali, "E moni lava, ua o'o i ai i latou, ua latou va'aia fo'i le fa'aauau pea ona pagatia le mamalu fegasoloa'i a le atunu'u, ona o a'afiaga tau tafega ma lologa, ma ala o vai mai timuga, ua latou va'ai i ai, ua i ai le latou mau ua fa'amaumauina mo lea afaina, ma o le a fa'ao'o fo'i i le vasega o ta'itai ma taiulu o le FEMA mo se latou fa'amaoniga o ni fesoasoani e fa'auia mai mo lea tulaga, ae le mautinoa a'ia'i lea tulaga!"

O nisi o fesili, i tulaga o aiga ua lava le tupe maua, ma ua fa'atulaga ua silia mai le agava'a i ni nogatupe mai le FEMA ae le o se fesoasoani e toe fa'aleleia ai lou fale, pe tatau ona avatu ni mea e fa'amau ai lea ituaiga o nogatupe.

O le tali mai, “e $25,000 le nogatupe e le fa'amauina i nisi mea totino, ae a sili atu loa i lana vaega o le seleni, ona mana'omia lea o nisi aseta a le aiga e fa'amau ai le nogatupe lena.”