E LE O OE O SE SULI MONI

Vaega 113

Ua agai atu nei le tamaloa o Meki i le ofisa e fa’atali mai ai le atunu’u atu o le ta’avale o loo avatu ai le fafine o Mekala, ae o isi ana Leoleonana ua malaga fa’atasi atu ma Tama’ita’i Tausima’i i le falema’i e momoli le fafine meaauli ma lana fanau e to’alua e fai a latou tui puipui. E le o se aso lelei lenei mo le tamaloa o Meki, e fai o le pisi o lona mafaufau i le galuega ao lea fo’i ua fa’amanatu atu e lona afafine, o le aso fanau fo’i lea a lona to’alua o Lucy. Na ona taunu’u lava o le ta’avale a le tamaloa o Meki i le ofisa, oso loa i fafo ma fa’asasa’o i totonu o lona ofisa i lona fia maua o se ea malulu i le vevela tele o le aso. Na pei e oso i se niu le tamaloa ina ua taunu’u atu i le potu malolo e aga’i atu ai i lona ofisa, o loo nonofo mai ai lona afafine o Ianeta ma lona to’alua o Laneselota. “Talofa Dad, matua e pisi tele i lau galuega i lenei aso ua toeititi ai lava a le maua se avanoa ma te feiloa’i atu ai ia te oe”, e fai lava tala ia a le tama’ita’i o Ianeta ma savali atu ua fusi lona Tama mo se taimi umi. Sa fa’apea fo’i ona savali atu le ali’i o Laneselota ma fa’afeiloa’i le Tama o lona to’alua ma fa’apea atu i ai, “Aua e te soona galue tele fo’i, ua e matua ma ua tatau fo’i ona fai sau malologa mai lenei galuega ua tele tausaga o e galue ai”. O le fa’afetaia tele o le tamaloa o Meki i le asiasi fa’afuase’i atu o si ana fanau, ma vave ai ona toe maua sina to’a feololo i lona mafaufau mai le pisi tele i le osofaiga sa latou aga’i atu i ai i le taeao. Ao talaona le tamaloa ma lana fanau, ae fa’afuase’i loa ona fa’alogoina sailini o ta’avale leoleo ua taunu’u i luma o le ofisa, o le fafine o Mekala lea ua momoli ane mo le fa’atalatalanoaina i le ofisa o leoleo.

“Vaai oulua si a’u fanau, e i ai le talanoaga faapitoa lea la’a o’u ta’ita’iina i ni nai minute e le o toe mamao, ae mafai ona oulua aga’i atu i totonu o lo’u ofisa e te lua fa’atali mai ai, a mae’a loa le talanoaga lenei ona tatou fo’i loa lea i le tatou fale e talanoa fa’amautu fuafuaga mo le aso fanau o si o oulua Tina o Lucy”, o le talanoa atu lea a Meki i lana fanau, ae na fa’afuase’i ona fa’apea atu Ianeta, “E leai se mea e te toe popole ai Dad, o lea ua mae’a ona ma fa’atulagaina le polokalame atoa o le aso fiafia o Mom, pau le mea ma te manana’o i ai, e te tago e piki mai poo fea o teutusi ia e 2 e te filifili e fa’aaoga, poo le teutusi enaena poo le lanu meamata fo’i. O totonu o teutusi ia e lua o lo o i ai uma lava fuafuaga fa’ataoto mo le aso fanau o Mom. E le gata o le igoa o le faleaiga, o le aofa’i o valaaulia, ae faapea fo’i i ituaiga taumafa e oo lava fo’i i meaalofa eseese o le a mafai ona tufatufaina atu i lea aso”.

Na ata le tamaloa o Meki ona ia tago lea ma piki le teutusi enaena o loo i le lima agavale o lona afafine, ma ia fa’apea atu loa i ai, “O mai loa ina fo’i, ae se’i uma la’u fonotaga lea o le a amata ona ou telefoni atu loa lea ia te oulua”. E fetaui lava le mae’a atu o le tala lea a Meki ae fa’alogoina loa le faapea mai o le leo mai fafo o le ofisa, “Tatala le faitoto’a o lea ua avatu i totonu le fafine ua leva ona sailia e leoleo”. Na matala le faitoto’a ma vaaia ai le fafine o Mekala o lo o ta’ita’i mai e leoleo e to’alua, ma ona lima o lo o loka mai i le pito i toa. Na matua fa’ateia Ianeta i le vaaiga lea ua ia vaaia nei, ma ua toe fafagu mai ai tausaga e tele ao nofo pologa i lalo o le pulega a lenei fafine saua. Na umi se taimi o fa’atau pupula Ianeta ma Mekala e aunoa ma se isi na gagana i se upu. E savali loa Ianeta o le a ulufafo ma le ofisa ae fa’apea atu loa ma Mekala ia te ia, “Talofa tama’ita’i, ua e tupu ma ua e teine matua”. Na faliu mai i tua Ianeta ona ia tali atu lea i se leo tau le lagona, “Faafetai mo mea e tele sa e faia mo a’u i aso ao tatou mafuta. E le galo mea lelei sa e faia mo a’u”.