Tala I Vaifanua

TAUNU'U & FA'APA'IA LE VA'A GALUE "ISEULA"

O le taeao ananafi na maimoaina ai e le to'atele o le faigamalo ma sui tofia o le fono faitulafono le mamalu fo'i o le matagaluega atoa o Pulega o le Uafu, Taulaga ma Malae Va'alele fa'atasi ma le mamalu na auva'a potopoto i le Uafu i Fagatogo, le taula mai o le va'a galue fou, 'Iseula' po'o le 'Peggy H' sa igoa muamua ai.

Talu mai ona tu'uva'a ese mai le Uafu i Alabama, e 40 aso na malaga mai le va’a. Fa'ailoa mai, sa tatau ona to'ai taunu'u mai i le 33 o aso, peita'i e fitu aso sa uia mai ai le kanala i Panama, ma fa'aaluina ai le 7 aso.

O le fa'afetai na fa'afofogaina, ona o ua gafatia e alo lava o Amerika Samoa, ona fa'afoea mai lenei malaga umi, aua sa tau toe fa'aalu fo'i le isi $200,000 e totogia ai le Kamupani e fa'ao'o maia lenei Sa, ae na loto tetele ta'ita'i o le atunu'u, ae maise o le vasega tautai o le matagaluega, ma ua latou manana'o e matu'u atu lea fa'amoemoe i le to'alima na malaga atu ma ua fa'ataunu'uina mai ma le manuia i laueleele.

"O le fa'amoemoe ua taunu'u o le la'au o le soifua lea,” o le saunoaga lea a le susuga le Fa'afeagaiga EFKAS i Fagatogo Rev. Iasepi Ulu ma molita'i la'au i foga'a i le fa'afetai i le Atua.

Saunoa Kovana Sili Lolo Moliga ma fa'amalo i le auva'a, o alo lava o Amerika Samoa, ma si'i ai le fa'afetai tele i le Atua.

“Fa'afetai o lea ua to'ai i fanua ma ua moni ai le tala, ua sau le va'a na tiu, tau mai i le va'a na tau, ae o lo'o mamau pea lago o le va'a na fao afolau. Ua na'o sina vaega tupe o le a taua'aoina e fai ma oso o tautai na folau i o latou aiga. Fa'afetai le tautua,” o se tala lea a le kovana.

O lana fa'afetai i le Matagaluega a le Initeria a le Malo Tele, lea e fa'amatu'u mai ai le seleni e $1.8 miliona mo lea va’a.

O le lona tolu ai lea va'a ua fa'atau e le Matagaluega o Uafu, Taulaga ma Malae Va'alele i totonu o le lima tausaga, ma o se mea muamua lea ua tupu i totonu o lea matagaluega.

O le to'alima na malaga e to'alua Kapeteni, peita'i na ta'ita'ia le aumalaga e Kapeteni Lafoga Alovao, fesoasoani i ai Kapeteni Michael Pulu, auva'a o Asiasiaoga Velega ma Sasualei Moliga ma le Inisinia o Bobby Silva.

A'o le'i to'ai taunu'u mai lenei va'a galue na mua'i filifilia e le kovana le igoa e ao ina fa'aigoaina ai. "O lenei va'a, na ou iloa lelei, ua umi ona tautua e le afio'aga o Fagatogo le Malo e ala i le Uafu ma Taulaga, ae leai fo'i se Sa e sili ona naunau i ai o latou loto nai lo le Iseula, lea ua tutula'i mai ‘Peggy H’, ua liua le vai o SIna i Amerika Samoa, o le "Iseula" i Ameika Samoa.”

Sa mafai foi o le saunoa le sui failautusi o le Initeria, Douglas Domenech. "Ua ou nofo ma va'ai atu, o le Peggy H lea na sau mai Alabama o le igoa patino lea i si o'u tina, peita'i e leai se so'otaga o le igoa o lea Sa ma lo'u tina, ae ana ou iloa o lo'o saili se igoa o le Sa e le afioga le Kovana Sili, ou te fai i ai e sili pe a tu'u ai pea lea igoa, ona o lo'o tutusa lelei ma le igoa o si ou tina. Peita'i a toe suia nei le igoa, ua le talafeagai lagona."

Sa ia toe fa'afetaia le avanoa ua ia va'ai patino ai i galuega o fa'atupe mai e lona Ofisa, ma ua mae'a lelei ma o le a amata fa'aaogaina i le atunu'u, a'o lea e na te molimauina lelei.

"O se fiafiaga le va'ai o fa'aalu aoga tupe na toina mai e fa'atino ai galuega toe fa'aleleia. O le agaifanua sa maimoaina i le tatou teritori nei, e matua matagofie ma tausa'afia e fa'aoso atili ai le fiafia e galulue feso'ota'i mai ma o outou ta'ita'i ae maise ai le tou sui i le Konekeresi, Aumua Amata i le tele o galuega e agava'a ai Amerika Samoa. Fa'afetai galulue, ma ia tatou galulue fa'atasi e atina'e le tatou nei teritori."

O le fa'apa'iaga o le Iseula i le Uafu na tofusao uma i ai ta'ita'i na aofia: le Kovana, Sui Kovana Lemanu P. Mauga, Domenech, Aumua Amata, Peresetene o le Senate, afioga le Aloali'i Afoa Moega Lutu o le afio'aga o Fagatogo, ae na ta'ei Niu e fa'apa'ia ai e le Sui Failautusi o le Initeria ma Aumua lea lava fa'amoemoe maualuga.

Na faai'u fo'i le sauniga mamalu i le tatalo fa'afetai na toe si'itia e Rev. Iasepi Ulu, ina ua mae'a le fetalaiga ale tofa Ta'amuovaigafa, e fa'afetaia ai le tofa maualuga a le Taiulu o le Malo o Amerika Samoa e fa'aigoaina ai le va'a galue o le matagaluega o Uafu ma Taulaga i le "Iseula."

PESE & SIVA SISIGAFU'A 2018

O le sao mo fa'afiafiaga o le sisigafu'a o lenei tausaga i le manulauti "Talavou mo le Lumana'i” na amata e le aoga maualuga a Fa’asao Malisi. E le fou i lenei a'oga lea fo'i agaifanua fa'aleaganu'u a Samoa, aua sa avea fo'i i latou ma sui e tapea sao o fa'afiafiaga e tau'avea le suafa o Amerika Samoa i le Pacific Arts Festival.

Matagofie a latou fa'afiafiaga o siva mauluulu, fa'apea fo'i ona faia ma le Sasa, ma tapea loa le latou taualuga lea na sausaunoa ai le tama'ita'i Peresetene o le Aoga - Miss Vimoto. O le susuga Le'iato Fausia sa ia a'oina a latou fa'afiafiaga.

Soso'o ma Fagaitua High ma sa auai uma ma latou tama ma teine tuai, aua o lenei fo'i tausaga ia Iulai, o le a fa'amanatuina ai le atoaga o le 50 tausaga talu ona fa'atuina lea a'oga.

O a latou fa'afiafiaga o Siva Mauluulu fo'i ma le Sasa, ma tapena fo'i le latou Taualuga ma latou vala'aulia fa'apitoa le Faletua o le Kovana, Cynthia Moliga, ma le Tausala Lalelei o le Pasefika, a'o le Tausala Lalelei fo'i o Amerika Samoa, Matauaina Toomalati e sausaunoa fa'atasi ma le ua filifilia o Olivia Ta'ase.

E fesuisuia'i fuataimi a lea a'oga, matagofie fo'i lea faiga, ae o le fa'aluma o latou siva uma o le ali'i faia'oga o Vaimili Tyrell. O le fofoga na fetalai amata i le fa'amoemoe lea o le ali'i o Pito Ah Sue.

Na o'o i le taimi o le Kolisi Tuufaatasi, ae toto fo'i ma timuga ae le'i afa le latou tapenaga, ae le'i fa'avaivai.

Matagofie fo'i latou Mauluulu na tapena i ai, o latou Sasa ma le latou taualuga fo'i na sausaunoa ai le tama'ita'i Peresetene o le Kolisi, Rosevonne Makaiwi - Pato.

Na tomuli fa'afiafiaga mai Saleimoa, o le afio'aga na vala'auina fa'apitoa mai Samoa. Na mua'i fa'afetai lava le afioga Luatua, lea na avea ma fofoga o le Malaga, i le vala'aulia mo Saleimoa, "Ua atoa le 118 tausaga o lou malo fa'ateritori o le Malo tele o Amerika, ae faliu loa sau tofa e vala'aulia lo'u nu'u, ou talia ma le fa'afetai tele lenei avanoa ma ua tapena mai fo'i Saleimoa, i mea patino lava ia Sale'imoa. O siva ma fa'afiafiaga i ona fatuga ma upu, e fa'atatau lava ia Sale'imoa, o mea patino fo'i ia Saleimoa lava. O le pese fo'i i ona upu ma ona fe'au o aumaia ai, e patino fo'i i lo'u lava nu'u.”

Ae tomuli mea uma, i le fa'aaliga e Sale'imoa o le ata o laulauvivilu ai le to'atele i fafo ma iinei ma Samoa fo'i, "Le Moana!"