Tala I Vaifanua

FONOTAGA FA'ALAUA'ITELE SPECIAL EDUCATION PROGRAM

I le fonotaga sa usuia i le Potu Fono o le ECE i Fagatogo, Aperila 12, sa vala'auina le mamalu lautele ina ia auai, peita'i e tau leai nisi sa auai i lea fonotaga. Sa tatau ona fa'atumulia lea fonotaga i matua ma i latou fo'i o lo'o aoga lenei tupe toina mai mo lea Polokalama taua i le tausiga, a'oa'o ma ia fa'afiafiaina loto o le fanau ua soifua ma mana'oga fa'apitoa o le tino po'o le mafaufau po'o na fo'i afaina tumau uma e lua.

I se tala mai o le aofaiga o le fa'atupega ua pasia mo lenei polokalama e $6.3 miliona i le 2 tausaga lea ua savalia nei. E ese mai lea e tusa ma le $1 milion e toe fa'auia mai i le polokalama i le masina o Iulai i tausaga ta'itasi, ma le isi fo'i $5miliona e fa'auia mai i le masina o Oketopa i tausaga ta'itasi.

O le aotelega o le fanau e tausia fa'apitoa ma fa'aaoga i ai lenei seleni tele e tusa ma le 600 i totonu o le atunu'u. Peita'i, e le o mafai ona maua ni tupe e tausia ai nei fanau i le masina po'o le tausaga atoa fo'i.

Afai ae tu'u atu fa'alemafaufau i lea aotelega, e ese mai le fa'atupega o le lua tausaga e ao ina maua e le fanau le $500,000 e a'oga ai, ma tausia leleia ai o ia e ona faia'oga o totogia e le polokalama, ma o le fa'atupega atoa lea i le lua tausaga. Ae a toe fa'aopoopo mai le isi $6 miliona mai le masina o Iulai ma le masina o Oketopa i tausaga ta'itasi, ua sau i totonu le $1 miliona.

Ua na'o se fa'ata'ita'iga, ae ua tatau ona va'ai toto'a i le fa'atautaiga ma le fa'aaogaina o tautua eseese mo lea vasega o le fanau o aofia i le SPEd.

O le Polokalama a le SPEd ua faaofi nei e fa'atautaia mai totonu o le Matagaluega o Aoga, ona e tatau ona soifua a'oa'oina le fanau ua soifua ma mana'oga fa'apitoa. Ua tatau ona tofu ma le nofoa fa'ata'avalevale ma i ai moega fa'apitoa e moe lelei ai nei fanau, mea fa'apena e ao ina tapena i totonu o lona aiga e fa'aaoga patino mo nei fanau.

Ua matauina i totonu o a'oga uma, ua i ai i latou e mafai ona fa'amalamalamaina le fanau gugu i le gagana e fa'aaoga saini o lima, o se isi lea si'itaga taua i le auaunaga mo le fanau, aua ua fa'aopoopo fo'i faia'oga na i totonu o le polokalama lea.

O le tama'ita'i pule Dr Teresa Atuatasi ma le vasega o faia'oga ma isi fo'i o le pulega sa latou fa'asoa mai e tusa o le toe talia o lenei Polokalama SPEd mo le isi lua tausaga ua savalia nei. Peita'i o le polokalama lenei, e muta le a'oga ale tamaititi fa'apitoa i le a'oga maualuga, ona soso'o lea ma lana Kolisi, ua le toe fa'aaogaina e i latou le SPEd ae ua se'e mai ai le va'a o le UCEDD, lea e fa'atautaia mai e le tama'ita'i o Tafa Tupuola.

Na tula'i se tasi o sui ma fa'afetaia le galuega alofa ma le fita o lo'o feagai pea ma faia'oga o lenei vasega o le fanau.

E ese mai lea, na fa'atautaia fo'i le sauniga mamalu mo le fa'ailo a le Polokalama o le SPEd i lenei tausaga, e talosia ai fo'i le fa'alagolago tele o le tausiga lelei o le fanau e soifua ma mana'omia o le tino ma le mafaufau i le agalelei ma le alolofa o i latou o loo fa'atinoina nei tautua.

O le sauniga sa ta'ita'ia e le susuga le Fa'afeagaiga taulagi a le EFKAS i Fagatogo, Rev. Iasepi Ulu, ma sa faia foi lea sauniga mamalu i le malumalu fo'i i Fagatogo lava.

FOA'I SOFIA I LE HOPE HOUSE - MATUA MATUTUA & E MAMA'I TUMAU

O le aso Gafua na te'a nei, na fa'atasi atu ai le Sosaiete a le SOFIA, i o latou sui totino uma ae maise le latou laulauatofi o lenei tausaga, fa'atasi ai ma le lalelei o le SOFIA o lo'o tutula'i nei i lea tofi, e molita'i le meaalofa tupe ua mae'a saunia e i latou i le Hope House i Fatuoaiga.

O lea meaalofa e $10,000 ma o le fa'amoemoe fo'i lea e ala ai ona faia e i latou le sailiga tupe iloga o le "Tauvaga Tausala a le SOFIA" i tausaga ta'itasi.

"E mafua lava ona faia nei sailiga tupe, ona o le mafaufau o le matou Sosaiete a Fa'afafine, e ao ina fa'atino le alofa, afai e matou te iloa lelei ola fa'asamoa, o le ola tautua ma le alofa e aoga tele i le tatou olaga i Samoa, i totonu fo'i o aiga Samoa e ola le tagata ma tausia lelei ona matua matutua, ma nai i matou tei ua gasegase tumau,” o se tala lea a se tasi o sui totino o lea sosaiete ina ua fesiligia.

"O le aso 21 Aperila, 2018, ua sauni ai fo'i Keige e faia le tauvaga lea e masani ona faia fa'aletausaga. Afai e le'i mua'i fa'atauina sau pepa ulufale, e mafai lava ona maua lou ulufale i le afiafi lea i le faitoto'a o le Gov. Rex Lee Auditorium i Utulei. Susu mai e maimoa, aua o lea ua mua'i to'ese lava le sao latou mo le Hope House, ae i ai fo'i isi galuega fa'atulaga a le SOFIA o lo'o fa'aolioli mai e fa'aaoga i ai se isi vaega tupe maua mai le fa'amoemoe lenei,” o se tala fiafia lava lea a lea sui.

TATALA LE SISIGAFUA 2018 - FAIGA LOTU

O le sauniga lotu sa tatalaina aloaia ai le Sisigafu'a 2018, sa faia i le Gov. Rex Lee Auditorium i Utulei ma sa fa'apena fo'i ona auva'a potopoto i ai sui o le malo ma nisi o le atunu’u ae maise le kapineta ma sui o le Fono.

Sa ta’ita’ia le sauniga e le Susuga le Sea, Asi Tuisalega, o le Taitaifono fo'i a le Sinoti o Amerika Samoa, lea o lo'o fa'anofo nuu i le Ekalesia Metotisi i Susana Uesele i Tafuna.

Na atoatoa atu fo'i le vasega i le Kapeneta a Kovana Lolo Moliga ma lona sui Lutena Kovana Lemanu Peleti Mauga,  fa'atasi ai ma lasilasi o le atunu'u ma aufaipese fo'i sa fofogaina vi'iga o le Atua i lea sauniga mamalu i le afiafi o le Aso Sa na te'a nei.

I le itu o malo fa'aaloalogia a le Malo mo lana sisigafu'a i lenei tausaga, o le afioga le Ao Mamalu o le Malo Tuto'atasi o Samoa, Tuimaleali'ifano Va'aletoa Sualauvi ma le Masiofo Fa'amausili Leinafo, ma le Sui Failautusi a Initeria a le Malo tele, Doug Domenech.

I le sao o lana auauna tofia mo le sauniga mamalu, sa ia fa'atepa ai ma toe fa'amanatu le auau o le aso ma lenei fo'i sisigafu'a o lenei tausaga, "Tupulaga Talavou mo a Taeao."

I se vaega o lana fa'asoa, sa ia fa'ailoa mai ai, "E tau le popole ta'ita'i o le aso nei, aua o le Atua o nei, a taeao ma amuli, e ia te'i tatou lava le Atua, i le aso ma a taeao i a tatou fanau o le lumana'i, ma tupulaga amuli, pe afai e finagalo le Atua e o'o i ai le soifua o tagata uma. A ia manatua le vi'iga o le Atua, aua ne'i faoa."