Fa’atonu EMS tula’i ese ma le Ofisa o Leoleo i Tafuna

O le faaiuga o le vaiaso na te’a nei na tula’i ese ai le Vaega a le EMS mai le nofoaga o le Ofisa o Leoleo i Tafuna.

Na molimauina e le Samoa News le taimi na tapena ese ai meatotino a le EMS mai totonu o le tama’i fale lea sa latou fa’aaoga fa’atasi ma pagota mai le toese o lo o galulue i le Ofisa o Leoleo i Tafuna.

E le i tali mai le afioga i le Komesina o Leoleo ia Lei Sonny Thompson i le imeli a le Samoa News sa auina atu i ai, mo le fa’amalamalamaina o le mafua’aga ua faia ai lana fa’atonuga e fa’atula’i ese le EMS mai le ofisa o Leoleo i Tafuna.

Na maua le avanoa e tali mai ai le Pulesili o le EMS, afioga Ifopo Galumalemana Avegalio i fesili sa tuuina atu e le Samoa News e uiga i lenei mataupu.

Saunoa Ifopo e fa’apea, o le aso Faraile, 6 Aperila na fa’atonuina ai i latou ina ia tula’i ese mai le fale a le Ofisa o Leoleo i Tafuna, le nofoaga o lo o fa’amautu i ai le latou tautua mo le itu i sisifo o le atunu’u.

Sa ia fa’amaonia mai foi i le Samoa News, e le o tapunia la latou auaunaga mo le itu i sisifo, ae o lo o tau sailia pea se isi nofoaga e mafai ona avea ma o latou nofoaga le tumau.

“Sa ou talosagaina sina taimi matou te sauniuni ma tapena ese ai, aemaise o lea ua oo mai le Fu’a o lenei tausaga. Ae o le aso Lua, Aperila 10 na tuuina mai ai loa le fa’atonuga ina ia matou tula’i ese loa i le taimi lava lea”, o le saunoaga lea a Ifopo.

O le mamalu o le atunuu o loo alala i le itu i sisifo o le motu lenei o Tutuila, o iina lea na taua e Ifopo o lo o tele ai a latou telefoni e maua mai ai mo le ofoina atu o la latou tautua.  O le nofoaga fo’i lea e pito sili ona tele tagata e valaau atu i le 911 mo le tautua a le EMS i aso ta’itasi.

Na taua atili e Ifopo i le Samoa News e fa’apea, e le o tuuina atu ia te ia le fa’aiuga ina ia tula’i ese ma le fale o Leoleo i Tafuna, ae o le fa’atonuga na ui atu i luga o tulaga fa’a sui o le Kapeneta, e pei ona auala atu i le Pulesili o le Falema’i i Fagaalu, afioga Faumuina Taufete’e J. Faumuina, ma fa’atonuina ai loa o ia e tusa ai o le fa’aiuga ua faia.

Sa ia taua le taumafai pea o le afioga a Faumuina e saili se isi nofoaga e mafai ona fa’amautu i ai le EMS i le itu i sisifo. E oo lava foi i le Faatonusili o le Matagaluega o le Soifua Maloloina ia Motusa T. Nua, o lo o ia taumafai fo’i e saili se avanoa o le Falema’i i Tafuna e ui ua tumu, e mafai ai ona maua se avanoa mo le EMS.

E to’atele ni isi o le atunu’u na valaau mai i le Samoa News i le vaiaso nei e uiga i le faaiuga ua faia e fa’atula’i ese ai le EMS mai Tafuna.

Na taua e se tasi o Tina e fa’apea, o lona Tina matua e 89 tausaga e maua i le gaseagse o le sela, ma e manaomia le vave atu o le EMS mo le faia o le masini a le olomatua. Ae o se lagona fa’anoanoa ma le le fiafia ina ua maua ripoti ua tapunia le auaunaga a le EMS i Tafuna ona o se fa’atonuga mai le Komesina o Leoleo.

“Afai o le a toe fo’i le EMS i Fagaalu, o le a matua mamao lava le taimi latou te tuliina mai pe afai e valaau atu se fesoasoani i Tafuna. E lagona ai le fa’anoanoa ona e le o fa’ataua e le Komesina o Leoleo soifua o tagata o le atunu’u”, o le fa’asea lea a lea Tina.

Ae na taua e se tasi o ali’i e fa’apea, e silia i le 30 minute na fa’atali ai le taunu’u atu o le EMS e fesoasoani i lona afafine na ma’i tigaina i le po o le aso Gafua na te’a nei, e mafua mai ina ua tapunia le latou ofisa i Tafuna ae na o Fagaalu o lo o avanoa.