E LE O OE O SE SULI MONI

Vaega 112

Na leai ma se isi na toe gaioi i le taimi na vaaia ai leoleo nana ma latou fana ua savavali atu i le vaega o loo tutu ai sipi uli ma ali’i tino lelei sa latou taumafai e aveese fa’amalosi Tausima’i. “O matou o leoleo nana a le malo, a i ai ni a’upega ia te outou ia aveese nei loa”. O le fa’atonuga lea a le Ta’ita’i o le Vaega o Leoleonana ia Meki, a o tu ma lana fana o loo ta’’i. E fa’apena uma fo’i i lana vaega e to’a 6 na latou o atu, ua tau fai ta’i uma a latou fana aga’i i ali’i tino lelei ia na malaga atu i Sipi uli. I ni nai sekone mulimuli ane, na vaaia ai loa le fetagofi lemu ane o ali’i tino lelei na o atu i Sipi uli ia latou a’upega ua aveese mai taga o lato ofu, ma tuu lemu ifo loa i luga o le mutia o loo tutu ai. “Ia tuu i luga o outou lima ma fa’asasaga i le ta’avale”. O le fa’atonuga lona lua lea na tuu atu e Meki i le au ali’i ia e to’afa, lea fo’i sa latou usita’i uma i ai. Na ona fa’asasaga lava o le au ali’i ia e to’afa i le latou ta’avale, taufetuli atu loa ma le vaega a Meki o le a ta loka o latou lima, peita’i na vaaia le toe taumafai o le isi to’alua e aapa ia laua taga o loo i ai isi a’upega, ae na tuai a la gaioiga ae vave gaioiga a le tamaloa o Meki ma ia tafanaina ai loa le isi to’alua ma feoti ai.

“E toe gaioi loa se isi o oulua o loo totoe ona lua oo fo’i lea i le iuga lava lea e tasi”. O le isi lea fa’atonuga mai le tamaloa o Meki. Na vaaia le pisi o gaioiga a Leoleonana i le ta lokaina o lima o alii e to’alua o loo totoe ma ta’ita’i loa i totonu o le isi ta’avale leoleo ma taofia ai. Na vaaia e Meki le le mautonu o tama’ita’i Tausima’i atoa ai ma le fafine meauli ma lana fanau i le vaaiga lea ua latou molimauina i lea aso. Ua savali atu le tamaloa o Meki ma fai atu i Tausima’i, “Fa’afetai mo la oulua galuega lelei mo lenei fafine mafatia ma lana fanau. Fa’aauau pea le galuega ma ave le fafine ma lana fanau i le falema’i. O se taimi ona tatou talanoa lea mo le fa’agasoloina o le suesuega e uiga i lenei mataupu”. O le talanoa atu lea a Meki i Tausima’i, ae sa fa’ailoa ane fo’i e tama’ita’i Tausima’i lo la agaga fa’afetai ina ua mafai ona fa’asaoina o laua ola mai gaioiga saua a le fafine o Mekala.

Na savali atu Meki i le itu o lo o tu mai ai le fafine o Mekala ma ona foliga le mautonu ma fai atu i ai, “O le a tatou o ma oe i le ofisa mo se mataupu taua e fia maua i ai sau fa’amatalaga”. O le talanoa atu lea a Meki i le fafine o Mekala, ae na tete’e i ai le fafine ma fai atu ia Meki, “E leai se mafua’aga e ave ai fua a’u i le ofisa o leoleo, e le o a’u o se tagata solitulafono”. Na tu Meki mo ni nai sekone ona toe tali atu lea i le fafine ma fai atu i ai, “Tina, e le o oe o se tagata solitulafono, e le o i ai fo’i se mataupu e ono molia ai oe, pau le talosaga, e manaomia oe tatou te talatalanoa fa’atasi i le Ofisa o Leoleo, mo nai mataupu e manaomia ai lau fesoasoani”. E fai lava tala a Meki ma savali ese, ae vaaia loa le aga’i ane o ana Leoleo ma ta’ita’i atu Mekala i le isi ta’avale, ae o le taimi lea ua fa’afesoota’i ai fo’i e le tamaloa o Meki le vaega faapitoa a leoleo ina ia aga’i ane e fesoasoani i le la’uese ina atu o ali’i e to’alua ia na feoti i le latou gaioiga sa faia.

E saofa’i loa Meki i totonu o lana ta’avale ae tatagi ma lana telefoni, o lona afafine o Ianeta lea ua vili atu. “Afafine, e i ai se mea ua e mana’omia mo a’u”, o le fesili lea a Meki ia Ianeta. “Leai Tama, na ou vili atu lava e fa’amanatu atu ia te oe, o taeao le aso fanau o si o’u Tina, e tatau fo’i ona ta talatalanoa ma mafaufau poo le a se ta fuafuaga manaia mo ia mo lona aso fiafia”. E lei tali Meki i se upu ae na maligi lemu ifo ona loimata i le ootia o lona loto i le alofa, ina ua ia fa’alogo atu, o lea e manatua lava e si ona afafine le aso fanau o Lucy lona Tina. “Vaai oe si o’u afafine pele, fa’afetai mo lou vili mai, ana e le fa’amanatuina mai ia te a’u ou te le manatuaina le aso fanau o si ou Tina. ae vaai oe, se’i o’u manava atu nanei ona ta talanoa lea mo se polokalame manaia”.