Tala I Vaifanua

FOA'I WAYNE FONOTI - JUNIOR GOLFERS & LAVALAVA GOLF COURSE

Ua mae'a to'ai taunu'u le foa'i tele a le ali'i Tapolo Fa'apolofesa, o se alo o Amerika Samoa, Wayne Fonoti i le Ofisa o le Ta'aloga Tapolo i le Lavalava Golf Course i Iliili, ma ua fiafia fo'i lea taupulega.

"O lenei lava le masani a lenei alo o Samoa, e malaga mai fo'i ma fesoasoani e a'oa'o lenei fa'agatama i fanau talavou a le atunu'u i ona taimi avanoa. Ae fa'auia mai uma lava e ia o nei ituaiga o foa'i, ma lona fa'anaunauga, ina ia alofagia, e fa'aaoga mo le fanau lalovaoa o le atunu'u, ia a'oa'o ai i lea fa'agatama, ma ia agava'a ai ina ia avea ma nisi e ta'a'alo fa'atauva ai i lea fo'i ta'aloga,” o se tala lea a le susuga John Mitchell, le ali'i faia'oga o le Junior Golfers i Amerika Samoa.

O le foa'i e tusa ma le ono pusa se'evae fou tapolo, pusa polo tapolo, ma le silia ma le 10 o ato Tapolo ua mae'a fa'atumu i ituaiga pate tapolo e aoga mo le fanau laiti, ae maise fo'i o le vasega o tagata matutua e fia mana'omia ona lisi ni pate ma ato tapolo.

Pe afai e fa'atupe lenei foa'i e latalata i le $10,000 lona tau ma o se sapalai o le a matua aoga tele mo le vaitau o le tu'uaga umi o a'oga i le taumafanafana. O le vaitau fo'i lea o le a matua a'oa'o ai le fanau aua ua lava taimi e malolo mai ai i a'oga, ae maise fo'i o le aotauina o fanau e masi'i atu i fafo i ta'amilosaga tapolo lea e masani ona maua ai latou avanoa e fetaui ai ma taa'alo fa'atasi ma isi sui mai le tele o isi setete uma o le Iunaite Setete ma teritori o Amerika.

"O le a le gata ina aoga lenei foa'i mo le fanau laiti pe talavou fo'i e le'i ulufale i a'oga maualuluga, ae o isi ato tapolo nei ua mae'a fa'atumuina i pate ma latou totoga uma, o le a lisia lea i le to'atele e o mai e leai ni pate ma ato tapolo ae lelei i le fa'agatama. O lona uiga e maua ai le seleni e le Lavalava Golf Course i lena fo'i faiga. O Se'evae ma polo nei o le a tu'uina e a'oa'o ai le fanau, e le totogia, ae fa'aaogaina fua, aua o le agaga lea na foa'i mai ai e lenei alo o le atunu'u,” o se tala lea a Mitchell.

O Wayne Fonoti o lo'o alaala ma ta'alo tapolo i le setete o Florida i Amerika.

POLOKALAMA SPECIAL ED - VETERANS MEMORIAL APERILA

E ui ina timuga ma aupouli le aso Gafua, ae le'i tolopoina ai le fa'amoemoe o le Polokalama Tuufa'atasi a le Special Education i le Veterans Memorial Stadium i Tafuna.

O lea fa'atasiga sa auai sui o le Komiti o lo'o avanoa mai galuega, ae ua fa'ataua e i latou le fa'amoemoe o le fanau, o le vasega fo'i i faia'oga ma le fanau a'oga uma o lo'o a'o'oga i a'oga maualuga.

Na iloga ona fa'afiafiaina le fanau, aua sa alausu i le Malae Ta'alo ina ia fa'atauva i ta'aloga tu'uga tamo'e, Track and Field, soka ma isi uma lava na fa'atautaia ina ia iloga se au ta'a'alo a le Special Olympics e masi'i i lenei tausaga i Dubai.

E le gata i faia'oga, ae ua faapena fo'i ona fa'atasi atu sui o lea polokalama o lo'o galulue i totonu o le Ofisa Autu o le SPEd i Faga'alu. O i latou fo'i o lo'o avea ma Laufali o ta'aloga na fa'atautaia.

O le auau o le fa'amoemoe lea ua fa'alauiloa mai -"Auai Ia Aofia Ai" po'o le "Join to Inclusion." Ua fa'ailoa mai e se tasi o sui mai le Ofisa Autu i Faga'alu, "E pau le fa'anoanoaga, ona e le'i auai mai Faga'itua High School ma le vasega o fanau o lo'o i ai mana'oga fa'apitoa i lea a'oga, fa'atasi ai ma latou faia'oga, ae i ai matua na sese mai i le malae ta'alo, ma sa faitioina e matua nei lo latou le auai mai i lea fa'atasiga taua mo le fanau."

Ua fa'ailoa mai, pe toe tasi se latou fa'atasiga fa'apenei, ona fa'ato'a tamau lea o se 'au malolosi e auina atu mo le Olimipeka Fa'apitoa. Ona pau lea o le Olimipeka a auina atu ai fanau a Amerika Samoa e fa'atauva ai, e mautinoa lava e taliu mai ma pine auro.

FA'ATONU OFISA O LE ARTS COUNCIL

Ua avea nei le tama'ita'i o Dr Lauagaia Mary Taufete'e ma Fa'atonusili o le American Samoa Arts Council & Humanities. O Lauagaia sa avea ma Fa'atonu o le Polokalama o Fa'ato'aga Fanua ma Puna'oa Eseese o le Land Grant a le Kolisi Tu'ufa'atasi o Amerika Samoa.

Ma sa avea o ia ma Faipule o le Ituau Malosi i le Maota o Sui i le tele o tausaga ua te’a.

I le fonotaga a le kapineta i le aso Gafua, sa fa’alauiloa ai e Kovana Lolo Matalasi Moliga ia le fa’atonu fou ia Lauagaia, ma ia saunoa ai, "Ua tu'u atu le pulega o lea fo'i vaega o le Malo ia te ia, aua ua ia te ia agava'a e mo'omia mo lea fo'i matata. Ua mae'a avea o ia ma Faipule i lona Itumalo mo le tele o tausaga, o se afafine fo'i o le atunu'u ua lava ma totoe lona soifua a'oa'oina i atamai lautele e mo'omia mo so'o se faiva, e pei fo'i ona fa'amoemoeina nei i lona pulea lelei o le Mata'aga i Fagatogo.”

Ua suia e Lauagaia le tofa Paogofie Fiaigoa lea ua avea nei ma sui so'oupu a le Ofisa o le Kovana i le Maota o Sui. O le susuga Tapa'au Daniel Aga sa ia tauavea le tumau lea ofisa ma ia vaai toto'a fo'i i nisi o fa'aletonu tau le tupe sa lutia ai galuega a lea Ofisa, ma ua mae'a nei ona sologa lelei.

Ua fetaui lelei lava lenei tofiga a le Kovana mo Lauagaia Mary ma le tatou tapenga mo le sisigafu'a o lenei tausaga, lea ua va'ava'alua ai i latou ma le Matagaluega o Tama'ita'i ma Talavou i fa’afiafiaga i le Malae o Suigaula a le Atuvasa i Utulei.

O le afiafi o le aso Tofi ma le aso Faraile lea ua fa'atulaga mo nei fa'afiafiaga.

RENEE FAUMUINA & WILL SMITH - PU'EGA GEMINI MAN

I le pu'ega o le ata tifaga fou o le tama o Will Smith, lea e matua fiafia i ai tatou tagata e maimoaina lona ata o le "Men in Black" ma Tommy Lee Jones, ua matua fetaui lelei ai ma se tasi o alo o le atunu'u o lo'o alaala i Glenville Park, i le setete o Georgia lea e pu'ea ai lona ata tifaga fou lea.

"O Will e pei lava o se tama Samoa, e le fa'ailoga tagata, ae fiafia e talanoa ma fa'asolo lana fa'atalofa ma fai tala malie mai ia matou. Amerika Samoa, ua ou maua lea avanoa e fa'atalofa ai ia te ia, pu'e ma le ata e fa'amau fa'ailoga ai, ua fetaui ma lea fo'i ali'i lauiloa, ae leai se eseesega ma uiga o tatou tagata, fa'amasani gofie ma laufofoga ataata,” o se tala lea a Renee Faumuina Samuela e tusa o le la'ua fetauiga ma Smith.

Manatua le igoa o le ata fou "Gemini Man!".