Avese mai alii Fuimu sa tofia e leoleo pagota sosola toese

Ua faamaonia e le Komesina o Leoleo i luma o le maota o sui i le vaiaso na te’a nei, le toe aveese mai lea o ali’i Fuimu sa ia tofia e leoleo i pagota e to’alua na fa’alua ona sosola i tua mai le toese i le amataga o le tausaga nei.

Ina ua fesiligia le tofa Le’i Sonny Thompson i le taimi o le iloiloga a le Komiti o le Puipuiga o le Saogalemu Lautele a le maota o sui, sa ia fa’amaonia ai le mae’a lea ona toe aveese mai o ali’i Fuimu na fesoasoani i le vaavaaia o pagota na sosola, ina ua mana’omia le fesoasoani talu ai le to’a laiti o le aufaigaluega o loo galulue i le toese i Tafuna.

O le iloilioga lea na valaauina e le maota o sui ma le afioga i le ali’i Komesina, atoa ai ma ona sui lagolago i le vaiaso na te’a nei, sa talanoaina ai ni isi o mataupu e fa’atatau i le auaunaga a le Ofisa o Leoleo, atoa ai ma mataupu o lo o fa’asea ai ni isi o le atunu’u.

Na tatala le iloiloga i saunoaga fa’afetai a le to’atele o afioga i Faipule, e tusa ai o le tulaga maualuga ua siitia ai le auaunaga a ali’i ma tama’ita’i Leoleo i totonu o le atunu’u i le taimi nei. E le gata i luga o le alatele ae faapea fo’i i soo se vaega lava o loo ‘au i ai le tautua a le Matagaluega.

Na fa’afetaia fo’i e afioga i Faipule le tofa Le’i e tusa ai o suiga lelei ma le matagofie ua molimauina i totonu o le matagaluega.

O le afioga i le ali’i faipule mai le itumalo o Fofo ia Fagaoatua Dorian Salavea na ia fesiligia le alii Komesina, e fa’amanino le mafua’aga na aveese mai ai le Vaega Fuimu mai le Ofisa o Leoleo i Leone, atoa ai ma le tofia o ni isi o alii Fuimu ia e galulue i le toese e leoleo pagota sosola.

Saunoa Fagaoatua e fa’apea, e le o se taumafai e suesue vale pe vaavaai masei i le auaunaga a le Matagaluega o Leoleo, pau le agaga o le fesili, ia fa’amanino le mafua’aga o le fa’aiuga sa faia, ona o popolega ina ne’i tula’i mai ni fa’alavelave e aafia ai soifua o Fuimu ona tula’i mai ai lea o se aafiaga i le malo i le lumana’i.

Na fa’amaonia e Le’i lona tofia o alii Fuimu e fesoasoani i le vaaia o pagota sosola, e mafua mai ina ua to’alaiti le aufaigaluega o loo galulue i le toese i Tafuna.

O lana faaiuga sa faia lea ina ua mae’a ona latou talanoa ma le Pule o le Toese, tofa Tauese Va’aomala Sunia, ma faailoa atu ai ia te ia le manaoga o loo i ai i le toese, sosoo ai loa ma lona talosagaina o le Pule o le Vaega Fuimu mo sana fesoasoani, ma latou malilie uma ai loa le fa’aiuga sa ia faia.

Saunoa atili Le’i e fa’apea, o ali’i Fuimu na tofia e vaaia pagota na sosola, e le faapea na tofia i latou e fa’atino tiute ma galuega tau leoleo, pau le latou galuega sa faia, o le vaavaai o gaioiga a pagpta, na sosola, ae afai e tula’i mai se fa’aletonu, ona logo lea o le Ofisa o Leoleo i le toese mo se fesoasonai.

Na faailoa atili e Le’i i le komiti a faipule e fa’apea, e ui lava ua i ai le falepuipui fou, i ai fo’i masini pu’eata i totonu e mata’ituina ai gaioiga a pagota, e le o mafai e nei vaega uma ona taofia ai le sosola pea o pagota i tua, o le mafua’aga lena sa ia faia ai le fa’aiuga, e tatau lava ona i ai se tagata faigaluega poo se leoleo e tiute i totonu o le toese i soo se taimi.

Saunoa Le’i e faapea, e ui i tala na salalau i le Samoa News na mafua ai ona gugulu le atunu’u ma fa’asea i le tofi o Fuimu e galulue i le toese ae lei aoaoina ai i latou, peita’i sa fai lava ma le fa’aeteete le fa’aiuga, ina ia mautinoa e leai se fa’afitauli e tula’i mulimuli mai ai.

Mo le Vaega Fuimu na aveese mai i le ofisa o Leoleo i Leone, na mafua lea fa’aiuga ona sa ave le ta’avale fuimu e toe lipea vaega sa fa’aletonu.

O le vaiaso na te’a nei na mae’a ona toe fa’aleleia vaega o le ta’avale fuimu, ma ua toe auina atu nei i le Ofisa o Leoleo i Leone e fa’aauau ai le tautua i le itumalo ma le atunu’u, atoa ai ma ali’i Fuimu na tofia i le toese, o lea fo’i ua toe fo’i atu e tautua i le Ofisa o Leoleo i Leone.