Ioe se alii faigaluega Custom moliaga ave fa’agaoi tupe malo

O le vaiaso na te’a nei na fa’amauina ai i fa’amaumauga a le Fa’amasinoga Maualuga le nofosala o se ali’i sa galue i le Ofisa o Tiute a le malo i le moliaga mamafa o le ave fa’agaoi o tupe a le malo, i le mae’a ai lea ona talia e le Fa’amasinoga o se maliliega sa latou sainia ma le itu a le malo.

O le ali’i o Sefulu Maifea, 48 tausaga le matua na ulua’i tu’uaia e le malo i moliaga mamafa e lua, le moliaga o le gaoi atoa ai ma le ave fa’agaoi o meatotino a le malo sa tu’uina atu ia te ia.

O ia moliaga mamafa o lo o fa’atulagaina o solitulafono C i le fa’atulagaina o solitulafno mamafa, lea e mafai ona fa’asala ai se tasi i le toese mo le umi e le silia i le 7 tausaga, pe fa’asala foi i le salatupe e le silia i le $5,000, poo le fa’asala fo’i i fa’asalaga uma ia e lua.

Ae i lalo o le maliliega na sainia e le ua molia ma le malo, lea fo’i ua talia e le fa’amasinoga, ua malie ai Maifea e tali ioe i le moliaga o le ave fa’agaoi o tupe a le malo sa tuuina atu i lalo o lana vaavaaia.

I le talia ai e le fa’amasinoga o le tali ioe a le ua molia i le moliaga e pei ona ta’usala ai o ia, na talosaga ai loa le malo ina ia solofua le moliaga e tasi o loo totoe ai i le pepa o le tagi sa latou fa’aulu, le moliaga mamafa o le gaoi.

I le tali ioe ai o Maifea i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i le va o le aso 15-17 o Setema, 2017 ao galue ai o se tagata faigaluega a le Ofisa o Tiute a le malo, sa ia ave fa’agaoi ai ni tupe a le malo sa tuuina atu i lalo o lana vaavaaiga.

O Maifea na galue i le malae va’alele i Tafuna, o se alii o le Ofisa o Tiute a le malo. O ni isi o ana matafaioi, o le taulimaina lea o tupe e totogi atu e le atunu’u i auaunaga a le Ofisa o Tiute, atoa ai ma le faafoiina atu o ia vaega tupe i le Ofisa o Tiute a le malo.

I le masina o Setema o le tausaga na te’a nei e pei ona taua i le maliliega a Maifea ma le malo, na taofi ai e Maifea ni isi o vaega tupe sa i lalo o lana vaavaaiga e aunoa ma le fa’afo’i atu i le Ofisa o Tupe a le malo, ma ia fa’aaogaina ai e aunoa ma se fa’atanaga fa’aletulafono.

Ua malilie loia a itu e lua o le a la finau i le fa’amasinoga mo se fa’asalaga mama mo Maifea, peita’i ua malamalama le ua molia, e le mafai ona toe suia lana tali ioe ua tuuina atu i le fa’amasinoga, pe afai e tuuina mai se fa’asalaga a le fa’amasinoga ae le tusa ai ma lona mana’o.

O le aso 4 Me lea ua fa’atulaga e lau ai le fa’asalaga a le ua molia, ma o lo o tumau pea tuutuuga o loo tatala ai o ia i tua i le taimi nei, e fa’atali ai le aso lea ua fa’atulaga e lau ai lana fa’asalaga.

O le mataupu fa’asaga ia Maifea na tofu atu i le Ofisa o Leoleo, ina ua talosagaina e le Ofisa o Tiute se suesuega fa’asaga i lenei mataupu, ina ua maua i ripoti le fa’aitiitia o tupe o loo maua mai i le malae va’alele.

Ina ua fa’agasolo le suesueina o lea mataupu, na manino ai le eseese o le aofa’i o tupe o loo maua i risiti sa totogi atu i le Ofisa o Tiute i le malae va’alele, ma le aofa’i o tupe o loo maua i risiti sa fa’afo’i atu i le Ofisa o Tupe a le malo.

O le mae’a ai o suesuega fa’asaga i lenei mataupu, na mafua ai loa ona faila e le malo moliaga fa’asaga ia Maifea.