Alia’e isi tu’uaiga fa’asaga i le sauaina o ni ali’i pagota i le toese

O le vaiaso na te’a nei na alia’e mai ai isi fo’i tu’uaiga mai totonu o le toese i Tafuna, faasaga i ni isi o Leoleo o loo faia sauaga fa’asaga i ni ali’i pagota se to’alua. O ali’i pagota o loo taua o la igoa i lea ripoti o Joe Togitogi ma Joseph Iosefa Iakopo, o i laua ia na auai i le sola’aga a pagota na alia’e mai ia Ianuari ma Fepuari o le tausaga nei.

O ni isi lava o pagota i totonu o le toese sa latou fa’ailoa mai i le Samoa News i se telefoni lenei mataupu, lea o loo tu’uaia ai ni isi o Leoleo i le fa’aoolima i alii pagota ia e to’alua, faapea ai ma le fa’aauau pea lea ona loka o la lima i soo se mea e aga’i i ai, e aofia ai le taimi ‘ai fa’apea ai ma le taimi e momoe ai.

E lei manuia taumafaiga a le Samoa News i le tau sailiina lea o se finagalo mai le Komesina o Leoleo e tusa ai o lenei mataupu. Na imeli le Samoa News ia Le’i Sonny Thompson i le vaiaso na te’a nei ae lei maua mai se tali. Na taumafai fo’i e vili lana telefoni ae lei tali mai fo’i le ali’i Komesina.

O le ripoti e pei ona alia’e mai i faiga faapologa fa’asaga i alii pagota e to’alua, ua lagolagoina ai le fa’amatalaga sa tuuina atu e Togitogi i luma o le Fa’amasinoga Maualuga i le 2 vaiaso talu ai, lea na ia faailoa ai i le afioga i le ali’i Fa’amasino ia Elvis Patea i le taimi na lau ai lana fa’asalaga le faapologaina o ia e ni isi o Leoleo o le toese, e aofia ai le fasi fa’amo’amo’aina o ia ma manu’a ai ona foliga.

Na faailoa e Togitogi le pau ese o lona nifo i le fasiga o ia e Leoleo, ina ua toe maua mai o ia mai le la sola’aga ma Iakopo.

O le molimau lava fo’i lea e tasi na taua e pagtoa sa latou logoina le Samoa News e uiga i lenei mataupu.

Na taua e le isi pagota e faapea, o le auala o lo o tausia ai e Leoleo ia Togitogi ma Iakopo i totonu o le falepuipui i le taimi nei, o se tulaga e le gata e solitulafono ae matua le talafeagai lava ona faia e ni Leoleo i pagota.

O ia faiga le alofa e aofia ai le loka o lima o alii pagota tusa lava poo le taimi e aai ma momoe ai. Sa taua fo’i le manu’a o foliga o ali’i pagota i le fasiga e Leoleo, atoa ai ma le fa’amomoe i luga o le fola sima e aunoa ma ni fala poo ni ie afu ae o loo to’a ai le vai mai le pisi i le taimi na fa’atoa mae’a ai le ‘afa o Gita i le masina na te’a nei.

Na taua e le isi alii pagota le mae’a ona ia pu’eina o ata o alii pagota i le taimi ao manu’a ai o la foliga, atoa ai ma le taimi na loka ai o la lima ao aai. O le fa’anaunauga o lea ali’i pagota, ia logo e se tasi i le vaega suesuega a le feterale (FBI) faiga le alofa o loo faia fa’asaga i pagota nei, ae ua ia sauni e avatu i ai mau fa’amaonia mai ata sa ia pu’eina.

Na taua atili e le alii pagota i le Samoa News e faapea, tusa lava poo a uiga le usita’i o Togitogi ma Iakopo i le tulafono, e le tatau lava i Leoleo ona latou faia ni sauaga le alofa faasaga ia tei laua.

E le o ni Leoleo o le toese i Tafuna lea o loo tu’uaia i le faia o sauaga fa’asaga i alii pagota e to’alua, ae o Leoleo na tofia faapitoa atu e le Komesina e leoleo ma vaavaai i laua mai le toe sosola ese mai le toese.