Tala I Vaifanua

SIOKI OLOA FALEOLOA - AE MAISE OLOA WIC & FOOD STAMP:

Ua matauina i fa'atauga o le aso Faraile ma ua o'o i lenei vaiaso, ua sioki sapalai o le pepa susu Fresh Milk, Anchor ma isi fo'i oloa e masani ona agava'a ai tagata e faatau e ala i le polokalama a le fanauiti ma tina ma'itaga.

E tusa ai ma se fa'amatalaga a le ali'i Faioloa i le afio'aga o Nuuuli, sa ia fa'ailoa mai, "O lo ua tatalia nei le isi oka tele, aua sa ou fa'aluaina a'u oka ina ua lutia i tatou i le afa o Gita, sa ou iloa lava e tauau ina o'o i se sioki fa'apea aua o le a maua fo'i e le tele o aiga o le atunu'u na pagatia lea fa'amanuiaga o tupe mai le Koluse Mumu ma le FEMA, ma o le a tetele fo'i fa'atauga a aiga ta'itasi, ae ese mai ai lava le WIC ma le Food Stamp lava latou lea sa masani ona fa'atatau i ai oka fa'ale-masina mo o'u faleoloa e lua."

Faailoa mai e le Aveina Wholesale i Matuu, ua fai si leva talu ona le toe maua Pepa Susu i le latou faleoloa. O lona uiga afai ae tuai mai a latou va'a o loo uta mai ai le susu, e tauau o le a maea atoa so'o se ituaiga susu i le teritori. Peita'i o va'a oloa o loo tatalia nei e Kamupani Wholesale a Kruse ma Aveina i Tafuna, Nuuuli ma Matuu, e mautinoa lava e fa'ato'a maua i le fa'aiuga o le vaiaso nei aga'i i le vaiaso a sau.

I nisi o faleoloa Asia o lo'o mafai ona maua Pepa Susu, ituaiga nei e fa'atulaga ma taulia i le lisi o mea'ai e fa'atau mo le fanauiti i le Polokalama a le WIC.

I le tulaga o tau o oloa, e masani ona fa'alauiloa mai e le Kovana o le tatou malo, pe a lutia le atunu'u i faaletonu fa'anatura fa'apei o le ‘afa o Gita, ina ia le tasi'ia tau o oloa i faleoloa. Peita'i ua matauina, ua i ai si'itaga i tau oloa tau mea'ai i lenei vaitau. E afua mai ona ua amata ona le toe maua le tele o oloa, ma ua afua ai ona si'itau. O le isi, ua iloa fo'i e faleoloa o lo ua tele le tupe i lima o nai aiga ua fa'amanuia i ai le Koluse Mumu ma le FEMA.

Ina vala'au atu i le susuga le Loia o lo'o nafa ma le tulaga o tau o oloa ma ituaiga oloa e fa'atauina mai i totonu o le atunu'u, poo le loia mo le Consumer Protection Bureau,  Jedidiah Bigelow, sa ia fa'ailoa mai, "O le tulaga tau si'itaga o tau o oloa, e le tatau ona si'ia se tau mai le tau masani a'o le'i afatia i tatou i Amerika Samoa nei. E tatau ona tumau le o tau o oloa se'ia o'o ina mae'a le 3 masina po'o le 180 aso talu mai ona afatia i tatou. O lona uiga o Aperila 9, 2018 e tatau ona fa'ato'a toe si'i ai ni tau o oloa i faleoloa uma lava i totonu o le atunu'u."

Afai ua e matauina se faleoloa ua si'itia tau o latou oloa mai le tau sa i ai a'o le'i afatia i tatou, ona e lipotia lea i le Ofisa o le Loia Sili ma talanoa ia Bigelow.

VOLENITIA O LE MASINA MO LE KOLUSE MUMU

O le susuga Lipea Uta Sui mai Tafuna, ua avea nei ma le tagata faigaluega o le Masina a le Koluse Mumu Amerika Samoa. O ia o lo'o galue o le Logistics Officer a le Koluse Mumu, ma ua iloga fo'i le lelei o le fa'atinoga o ona tiute i le taimi nei, ae ua galulue fa'atasi ai ma sui Koluse Mumu mai San Diego, i le tele o mea o lo'o latou fa'avasegaina, fa'aputu lelei ma toe fa'avasega le tufatufaga i aiga pagatia o le atunu'u ona o le ‘afa o Gita.

Ua matele ina galue fa'atasi o ia ma le vasega o tagata e fa'atalatalanoaina i latou i le Ofisa autu o le Koluse Mumu ona ua fia maua se fesoasoani. A mae'a fo'i ua auai fa'atasi o ia ma nisi o le Koluse Mumu mai fafo ina ia asia fale o aiga i tua i afio'aga.

Peita'i i le taumafaiga a le Koluse Mumu Amerika Samoa ina ia fa'avasega a latou sapalai ua maua mo lenei ‘afa ua fa'ato'a mavae atu, sa fa'aalia ai le tulaga maoa'e o le agava'a o Uta i lona fa'avasegaina o oloa ua maua mai pisinisi ma tagata foa'i, ma lona fa'amaumauina uma fo'i o so'o se ituaiga o oloa o lo'o ua mae'a i ai i le latou Fale Oloa foa'i.

Ua ia te ia fo'i le tomai e fa'avasega ai vaega asiasi i nu'u ma afioaga eseese ma latou taimi e tatau ai ona tu'ua le Ofisa autu ma toe aga'i atu i totonu, ae maise o sui Volenitia uma a Amerika Samoa ma vaega e tatau ona malaga fa'atasi ma i latou ina ia fa'afaigofie feutagaiga i le gagana Samoa ma nai o tatou aiga o mana'omia le fesaosoani ma ua asia i lea afio'aga ma lea afio'aga.

O le fuafuaga fa'ataoto fo'i o lea aso ma lea aso i vaega o asiasiga a nei vaega ta'itasi, ua ia Uta fo'i lea matata.

"Ua matou matauina fo'i le galue fa'amaoni ma le galue fiafia o Lipea Uta i so'o se taimi, ma e talimana'o fo'i i nai tagata o lo'o sulu mai mo se fesoasoani atu a le Koluse Mumu ona ua afatia aiga ma latou fale nofo,” o se tala lea a le Koluse Mumua.

"O le agaga tonu fo'i o avea ma 'au'au a le Koluse Mumu ua va'aia ma matauina pea i le galuega a lenei volenitia o Lipea Uta Sui. Fa'afetai Lipea Uta mo lou sao i le Koluse Mumu i lenei tausaga ma nisi tausaga ua e fuafua e te tautua ai pea mo tagata ua i ai le mana'omia i o latou lotoifale ona o fa'alavelave tutupu fa'afuase'i."

TELE SAO FOA'I A LE KOLUSE MUMU TUPE MAUA A FALEOLOA

Talumai ona mae'a fo'i le afa ma ua tali le Koluse Mumu mai San Diego i le tele o talosaga sa  fa'amaumau lea ua tali mai i latou i le pepa tala tupe e ta'i silia ma le $1,000 i aiga na tele mea na fa'aleagaina, ua va'aia le maualuga fo'i o tupe maua a le tele o pisinisi ua agavaa mo fefa'ataua'iga e fa'aaogaina ai nei card a le Koluse Mumu.

E oo mai i le taimi nei e le'i maua se fa'amanuiaga tau tupe mai le FEMA ae ua fa'agasolo nei a latou fa'amaumauga ma asiasiga i tua i aiga ua mae'a fa'atutumu a latou talosaga. A'o le si'itaga o le tamaoaiga ua maua nei e le au faipisinisi o faleoloa o oloa tau mea'ai, moega ma oloa tau potu moe ma ie afu ma solo ma lavalava, ua mautinoa lava le si'itia i lenei vaitau.

E le gata la i le pepa e tala ai tupe mo fa'atauga, ae ua taua'aoina fo'i  e le Koluse Mumua le 558 "Jumpstart to Recovery Kits," 1,280 "Clean Up Kits," ma le 2,159 "Comfort Kits."

Ua le mafai ona fa'ailoa aloaia mai le aotelega o le tupe ua taua'aoina i le silia ma le to'a 1,000 o aiga, peita'i i nisi o aiga na fa'aleagaina uma latou fale ma lavalava ma moega ma latou fala moe, aluga ma ieafu, ua latou fa'ailoa mai e silia ma le $1,000 le tupe sa i le card a le latou aiga.

O oloa ua fa'ailoa ane e tatau ona fa'aaogaina i ai le Card tala tupe lea, e aofia ai oloa tau mea'ai, falamoe ma moega lelei fa'atasi ma ie afu solo ma aluga ma taga aluga.