Amata “pre-registration” le atunu’u mo fesoasoani a le FEMA

O le taeao nei lea ua amata fa’agasolo ai le “pre-registration”, po’o le lesitalaina muamua, o le atunu’u aemaise ai i latou uma sa fa’aleagaina maota ma laoa atoa ai ma meatotino i le ‘afa o Gita i totonu o Tafuna.

O le mae’a ai o le lesitalaina o i latou uma i totonu o Tafuna, ona fa’asolosolo mai ai loa lea i afioaga eseese uma lava i totonu o le atunu’u, ina ia mautinoa e maua uma e tagata ta’ito’atasi fesoasoani mai le Feterale (FEMA) mo meatotino sa fa’aleagaina i le ‘afa.

E le gata i aiga ta’ito’atasi, ae aofia ai fo’i ma pisinisi, o le malo, atoa ai ma Faalapotopotoga Tumaoti e oo lava fo’i i Ekalesia.

E pei ona fa’amanino e le sui o le malo, susuga Fuimavave Laupola e fa’apea, o le polokalame muamua lea na lesitalaina ai le atunu’u ina ua fa’atoa mae’a le ‘afa o Gita, sa faia ina ia mafai ai ona tu’u fa’atasia le ripoti e tuuina atu i le Peresetene o Amerika ia Donald Trump, mo le talosagaina o se fesoasoani mai le malo tele o Amerika, mo se vaega tupe e fesoasoani ai i le toe fa’aleleia o meatotino a tagatanu’u ma le malo o Amerika Samoa sa fa’aleagaina i le ‘afa.

O lea la ua talia aloaia mai e le ali’i perestene le talosaga sa tuuina atu e le afioga i le ali’i Kovana ia Lolo Matalasi Moliga mo se fesoasoani, ma ua sauni loa le malo e amata le lesitalaina aloaia o tagata uma ina ia agava’a i fesoasoani a le Feterale.

A o fa’agasolo malie ai galuega mo le lesitalaina o le atunu’u, ua talosagaina e le malo le mamalu o le atunu’u ina ia lava pea le onosa’i, a o taumafai sui o le malo e fa’ataunu’u la latou pito laau.

“Ua i ai nisi o fesiligia le malo, pe fa’afefea le lesitala lea sa faia ina ua mae’a le ‘afa o Gita, o le tali ma le fautuaga i le atunu’u, ua mae’a le ulua’i lesitala sa faia, ae ua toe fautuaina le atunu’u ina ia toe lesitala uma aiga ina ia mafai ai ona agava’a i fesoasoani mai le Feterale”, o le saunoaga lea a Tuimavave.

A o fa’agasolo ai le polokalame mo le toe lesitalaina o le atunu’u, ua tatau nei ona amata tapena pepa fa’amaonia e mafai ai ona fa’amaonia lou tagata mo le lesitalaina i le polokalame, e pei o le tusi folau, pepa aso fanau, numera o le saogalemu, atoa ai ma le pepa e faamaonia ai o oe moni e ana le fale sa fa’aleagaina.

Mo le mamalu o le atunu’u o lo o mautotogi i maota ma laoa i totonu o le atunu’u, e agava’a fo’i outou i fesoaosani, e ala i le talosagaina o ni fesoasoani mo a outou meatotino sa fa’aleagaina, ae o le fesoasoani mo le fale e alu sa’o lava i le tagata e ana le fale.

E o o lava fo’i i nai aiga e i ai a latou tama’i pisinisi, ua mae’a ona fa’atulaga polokalame eseese mai le FEMA e fesoasoani ai i mea sa fa’aleagaina e pei o nonogatupe e laiti tului, o vaega tupe fesoasoani e le toe totogiina (grants), ma isi lava polokalame eseese e agava’a ai le atunu’u.

Ua maea foi ona faia se fonotaga a le malo ma le Ofisa o Mataupu Tau Samoa, e aofia ai ma alii mautofi, mo le fa’alauiloaina o auala e ofo atu ai le fesoasoani i le mamalu lautele o le atunu’u sa pagatia i lenei fa’alavelave.

O le itula e 7:30 i le taeao nei e oo atu i le 6:00 i le afiafi, o le taimi lea ua fa’atulagaina mo le lesitalaina o tagata i totonu o le afioaga i Tafuna.

O le afioaga i Fagaima o le a lesitalaina i le maota o le Ave o le Fetuao a le Metotino, o Kokoland o le a lesitalaina i le maota a le Ekalesia EFKAS i Ierusalema Fou, o Ottoville o le a feiloa’i i le maota o le Ekalesia Mamona, o Happy Valley o le a feiloa’i i le maota o le Heart of Worship, ma le afioaga i Petesa o le a feiloa’i i le maota o le Ekalesia EFKAS i Petesa tai lava.

A i ai ni isi fesili e fia malamalama atili ai le atunu’u, fa’afesootai le telefoni numera 699-0411 mo nisi fa’amatalaga.