Poloaiga Kovana aloaia ai auaunaga a le malo ona matagi o Gita

Talu ai le malosi o lo o aiaia i le Ulutala 6 ma le 7 o le Fa’avae Toe Teuteu a Amerika Samoa, atoa ai ma le Ulatala 4.0111 ma le 26.0105 o le Tulafono Toe Teuteu a Amerika Samoa, lea e tu’u atu ai le malosi i le Kovana mo le fa’alauiloaina o auaunaga faapitoa pe a tutupu ni fa’alavelave fa’alenatura, ua sainia ai e Lolo Matalasi Moliga lana poloaiga No. 011-2018, e aloaia ai fesoasoani tatau mai le malo mo tagata uma na a’afia i le matagi o Gita, aemaise ai le tuuina atu e le malo o auaunaga ma tautua moomia mo vaega uma e mana’omia le fa’aleleia talu ai lenei fa’alavelave.

E pei ona taua i le fa’atomuga o le poloaiga a le Kovana, lona tuuina atu lea o se poloaiga faalaua’itele i le aso 9 Fepuari 2018 e aloaia ai le i ai o Amerika Samoa i tulaga pagatia ona o le matagi malosi o Gita na afatia ai le atunu’u, ina ua maitauina le tele o meatotino sa fa’aleagaina ai i lea fa’alavelave.

I le mae’a ai la ona tuuina atu e Lolo o lana poloaiga faalaua’itele e faalauiloa ai le i ai o Amerika Samoa i se tulaga pagatia ina ua tuana’i le matagi malosi o Gita, e mafai ai loa ona ia tuuina atu se isi poloaiga e faalauiloa aloaia ai auaunaga e moomia mo fesoasoani talafeagai, pe afai e mae’a ona suesue ma auiliili tulaga o meatotino sa fa’aleagaina.

I le mae’a ai la o le matagi malosi o Gita, e taua ai le tatau lea ona fa’amama otaota ma mea sa fa’aleagaina, aemaise ai o le toe fa’aleleia o meatotino sa fa’aleagaina a le malo atoa ai ma tagata ta’ito’atasi, ina ia mautinoa ai le soifua maloloina o tagata uma.

I lalo la o le poloaiga a le Kovana ua sainia nei, ua poloaina ai le tuuina atu o le malosi i le Faatonusili o le Ofisa e Pulea Faatauga o Oloa a le malo, mo le faia o faatauga moomia talafeagai mo galuega toe fa’aleleia. O fa’atau uma e le sili atu i le $100,000 e mafai ona fa’atau mai ai oloa uma mo nei galuega moomia.

O le Faatonusili o le Ofisa o Tagata Faigaluega a le malo ua tofia na te faia tofiga faapitoa i lenei taimi pagatia o le atunu’u.

I tulaga o tupe faaalu e fa’atupe mai i teugatupe lotoifale a le malo, o lo o tumau pea le taofia o tupe fa’aalu i isi manaoga eseese, e ese mai i manaoga e alia’e mai ona o lenei fa’alavelave.

O le a fa’aauau pea ona i ai le atunu’u ma le malo o Amerika Samoa i lalo o tulaga o faalavelave faalenatura e pei ona poloaina e le Kovana, seia vagana ua toe tuuina atu se isi ana poloaiga mulimuli ane.