Tala I Vaifanua

FAATAU VA'A TUGBOAT MO LE UAFU I FAGATOGO

Ua ma’ea ona fa’atauina e le Matagaluega o Uafu ma le Malae Va’alele le tugboat o le "Peggy H" i Alabama i le vaiaso ua tuana'i.

Ua mafua ona fa'atau lea va'a, ina ia lua i ai tugboats i le Uafu e pei o aiaiga o tulafono a le US Coast Guard, lea sa tu’u ia Amerika Samoa le avanoa e fa’atau ai se isi va’a, ae le’i oo ia Mati 15, 2018.

O le tausaga na fausia ai 'Peggy H' o le 1983, ona toe fa'afouina i le tausaga ua te’a. Ma sa i ai i Alabama le sui fa’atonu o le matagaluega o Uafu ma Malaeva'alele ia Chris King, fa'atasi ai ma ali'i Kapeteni o Lafoga Alovao ma Mike Pulu, ma isi sui e to'atolu ina ia malaga mai lea va'a i Amerika Samoa.

E le’i mautinoa se aso e malaga ese ai le va’a mai Alabama mo Amerika Samoa.

E LE’I AMATA TAUTUA A LE FEMA MO MEA FA’ALEAGAINA E LE ‘AFA

I se pepa o fa’amatalaga mai le ofisa a le malo o Amerika Samoa, Emergency Operations Center (EOC), o lo’ taua ai se fautuaga mai le vaega a le fetarale, le FEMA, e fa’apea, e le o tatalaina le ofisa e faila ai mea totino ua faaleagaina i tou maota ona o le ‘afa o Gita. Ma ia lava mai pea le onosa’i a’o fa’aauau le auiliiliga o faamaumauga i se repoti o galulue faatasi ai le FEMA ma le malo o Amerika Samoa.

E faamanatu atu fo’i e le FEMA ia “’Aua ne’i faatali mo le FEMA.  A ia tapu’e ata o mea sa faaleagaina i le afa o Gita ma amata loa ona faia galuega e toe faaleleia ai tou maota.”

I le taimi nei, e le o sailia e le FEMA ni tagata faigaluega.  A iai se suiga, o le a fa’ asalalauina atu i leitio ma nusipepa.

Mo fesoasoani ma le Koluse Mumu i Amerika Samoa, vala’au le telefoni, 699-6011 mo nisi faamatalaga.

Ua fa’ailoa mai foi e le EOC o lo’o faaauau a latou asiasiga i nu’u ma afioaga e pei ona fesoasoani atu iai afioga i pulenu’u, mo fa’amaumauga i mea na fa’aleagaina e le ‘afa o Gita. Faamolemole, ia lava mai pea le onosa’i, ona o lo’o savalia e vaega ta’itasi afioaga e faia asiasiga i aiga ta’itasi.

Afai sa misia e lenei vaega ona asia lou maota, ia faafesoota’i atu le pulenu’u o le afioaga, pe telefoni fo’i i le Ofisa o le Mataupu Tau Samoa i le 633-5201, po’o le EOC i le 699-3800.

TAPUNIA ALA SAVALI I  "LAUFANUA FA'ASAO" I TUTUILA

Ua fa'alauiloa e le Ofisa o le National Park of Ameican Samoa, le tapunia o ala savali - trails - e pei ona masani ona tatala i le mamalu lautele o le atunu'u fa'apea turisi asiasi mai i Amerika Samoa, ona o lo'o tele se afaina o ala savali i totonu o Laufanua Fa'asao i Tutuila nei.

Ua le gata le fa'aletonu i le vaomatua fa'asao, ua fa'apena fo'i ona i ai afaina o le a'au po'o le gataifale fa'asao ona o le tele o tafega o vaitafe ua o'o atu i le sami, ona o le ‘afa o Gita.

O ala savali ua fa'aleagaina ona o la'au pa'u'u, sologa i palapala ma ma'a ma ua punia ai nei ala savali.

O le a toe fa'ailoa mai e le i ni fa'asalalauga i le tatalaina o Laufanua Fa'asao, ae o lo'o tatala pea le Ofisa autu i le Pago Plaza i Pago Pago.

Saunoa le Park Superintendent Scott Butch, "Ua galulue malosi lava le aufaigaluega a le Paka Fa'asao ina ia toe fa'aleleia le tele o a'afiaga o ala savali ma le lotolotoi lava fo'i o le paka fa'asao latou, ona fa'ato'a toe tatala ai lea o laufanua fa'asao mo maimoaga. E mautinoa e umi le taimi fa'aalu i lea galuega toe fa'aleleia. E tauau e faitau masini ma vaiaso fa'ato'a tatala lenei tautua mo le mamalu lautele."

8 SUI KOLUSE MUMU SAN DIEGO

E to'avalu sui mai le Koluse Mumu i San Diego ua auai mai mo le fa'atautaia o galuega fesoasoani mo le  Koluse Mumu i Amerika Samoa i le tautuaina o tagatanu'u ua pagatia talu mai le ‘afa o Gita.

O le Koluse Mumu i San Diego o le Ofisa Ulu lea mo le Koluse Mumu Amerika Samoa, ma ua fa'ailoa lo latou agaga fiafia ina ua o'o mai, ua amata ona fa'atautaia galuega e le tatou lala, ma ua i ai fo'i foa'i ua tapena i ai Amerika Samoa e tuufa'atasia ma ni latou fesoasoani ua aumaia, e fesoasoani i le atunu’u.

O le aumalaga lenei e aofia ai ma le Regional CEO Sean Mahoney, ma ua fa'atasia nei ma le to'a 40 o i latou o lo'o ofo atu le latou tautua mai le tatou Malo, ma o le a fa'atautaia latou galuega fesoasoani i so'o se vaipanoa o le atunu'u ua fa'amauina ua afaina i le Asiosio o Gita.

Fa’ailoa e Mahoney lona agaga fiafia e va'aia le agaga o tagata Samoa ina ia toe fa'aleleia vave o latou lotoifale ma toe fa'aauau pea aluga masani sa i ai le soifuaga a'o le'i tupu le ‘afa.

"Ua va'aia e le o afaina le agaga o tagatanu'u o Amerika Samoa i lenei fa'alavelave fa'anatura, ua tumau lo latou agaga ia fa'aleleia le soifuaga ma toe fa'aauau galuega sa masani ai. Ua ou fiafia ua o'o mai, ma o le a auai fa'atasi ma i latou e faia asiasiga a le Koluse Mumu i so'o se vaipanoa ua a'afia o le atunu'u."

Ua o'o mai fo'i le tele o sapalai ua latou malaga mai ma i latou, peita'i ua tapena fo'i le Koluse Mumu i Amerika Samoa i foa'i na taua'aoina mai e nisi o Kamupani ma fa'alapotopotoga, ina ia taua'aoina atu i aiga pagatia, ma o asiasiga a le Koluse Mumu e mafai ai ona iloa patino igoa o aiga, nu'u e alaala ai, ma mea ua fa'aleagaina ona savalia lea ae ua mae'a fa'amauina.

"Tusa lava pe le o tusia suafa, e asiasi atu lava le Koluse Mumu i afioaga o lo'o va'aia le fa'aleagaina o fale i le afa, ma o iina fo'i e fa'amaumauina ai ma fesoasoani atu le Koluse Mumu i aiga pagatia,” o se saunoaga lea a le aufaigaluega a le Koluse Mumu.

LAPATA'IGA MAI ASEPA - FA'APUNA LE SUAVAI TAUMAFA

Ona o le tele o manu mamate ma a'afiaga fo'i tau lapisi ua suatia ma lafoa'ia e le ‘afa o Gita i vaitafe ma le sami, ae maise o puna o vai o lo'o fa'atumu ai fa'atanoa vai mo le fofoga taumafa o le atunu'u ma lotoifale o aiga, o lea ua lapata'ia mai ai le mamalu o le atunu'u, ia fa'apupuna muamua le suavai a'o le'i inumia.

O lenei lapata'iga ua fa'asalalauina faalaua'itele i le mamalu o le atunu'u ina ia nofouta ai.

Ua fa'aauau fo'i ona faigaluega tagata mai le ASEPA ina ia mautinoa ua faia suesuega o le suavai taumafa ina ia fa'ailo atu nei lapata'iga ae ua mautinoa fo'i le afaina o i ai le suavai i le atunu'u.

Ua le gata i lea, ae ua o'o fo'i i masini vai mama i le tele o faleoloa, ua mae'a suesuea fo'i e le ASEPA pe mata o lelei fa'amama o nei masini vai, ma ia le toe a'afia mulimuli nisi ae le mailoa tonu le masini sa latou fa'aaogaina.