Tala otooto o Fa’amasinoga

LIREN ZHANG

O le itula e 9:00 i le taeao nei lea ua faatulaga e tula’i ai le ali’i Faipisinisi Asia o lo o tu’uaia i le mataupu e pei ona fa’aaoga faagaoi ai pepa ‘ai mai le Food Stamp i luma o le Fa’amasinoga Maualuga, ina ua talia e le Fa’amasinoga Faaitumalo lana talosaga e fa’aagafua lona aia tatau e aua ai ne’i fa’ataunu’u lana ulua’i iloiloga sa faatulaga e faia i le vaiaso nei.

O Liren Zhang poo Kevin e pei ona iloa ai o ia e le to’atele, o le isi lea e to’atolu i ai tagata o lo o molia e le malo i le mataupu e pei ona alia’e mai i le Matagaluega o Auaunaga ma Tautua Lautele, i le fa’aaoga faagaoi lea o pepa ‘ai a le Food Stamp i le va o le masina o Oketopa o le tausaga na te’a nei e oo mai ia Ianuari na te’a nei.

Na faailoa e le loia a Kevin ia William R. Olson mai le Ofisa Loia o le RDA Law Firm le mana’o o Kevin e fa’aagafua lana ulua’i iloiloga, e tu’u sa’o atu loa lana mataupu i luma o le Fa’amasinoga Maualuga e fa’ataunu’u ai lana fa’amasinoga.

O lo o tu’uaia e le malo ia Kevin i moliaga mamafa e 17, ma o lo o taofia pea o ia i le toese ina ua le mafai ona ia totogiina le tupe e $450,000 na faatulaga e tatala ai o ia i tua.

O Kevin, o lo o tu’uaia fa’atasi ma Vincent Toeava, lea fo’i o lo o taofia i le toese ina ua le mafai ona ia totogi le $450,000 sa faatulaga e tatala ai o ia i tua, ma Jane Vasa, lea ua tatala i tua ina ua mae’a ona tali ioe i le moliaga mama o le gaoi.

O le vaiaso fou lea ua faatulaga e faataunuu ai le iloiloga autu o le mataupu a Toeava i luma o le afioga i le ali’i Fa’amasino ia Fiti Sunia, ae o Vasa o lo o tatalaina pea i tua e fa’atali ai le lauina o lana fa’asalaga i le masina fou.

ROPETI MUAO

O le aso Faraile o le vaiaso fou lea ua fa’atulaga e lau ai le fa’asalaga a le ali’i o Ropeti Muao, i le mae’a ai lea ona ta’usala o ia e le fa’amasinoga i le moliaga mamafa o le fa’aoolima i le tulaga lua, i lalo o se maliliega sa latou sainia ma le malo.

Na ulua’i tu’uaia e le malo Muao i le moliaga mamafa o le faaoolima i le tulaga muamua, le solitulafono e mafai ona faasala ai se tasi i le toese mo le olaga atoa, poo le faasala i le isi faasalaga faa falepuipui e le itiiti ifo i le 10 tausaga ae le sili atu i le 30 tausaga.

Ae i lalo o le maliliega na sainia e Muao a le malo, ua malie ai le ua molia e ala i lona taliaina o se ofa mai le malo, ina ia tali ioe i le moliaga e feololo ane le mamafa o lona fa’asalaga, le moliaga o le faaoolima i le tulaga lua, le solitulafono e mafai ona faasala ai se tasi i le toese mo le umi e le silia i le 5 tausaga, poo le faasala i le salatupe e le siliai le $5,000.

I le tali ioe ai o Muao i le moliaga e pei ona ta’usala ai o ia, sa ia tautino ai e fa’apea, i se taimi o le masina o Me o le tausaga na te’a nei, na ia fa’aoolima ai i se ali’i e talavou i lalo o le tulafono, e ala i lona fa’aaoga o se a’upega maai e faaoo ai manu’a i lona ulu.

Na ta’utino Muao e fa’apea, sa ia fa’aaoga se seleulu e ta ai le ulu o le ali’i na a’afia ma mafua ai ona i ai se ta’e tele i lona ulu, lea na mana’omia ai filo e 7 mai le falema’i i Fagaalu e su’i ai lea manu’a.

Na faamaonia e le loia a le malo ia Woodrow Pengelly i le fa’amasinoga le mae’a lea ona talanoa ma le aiga o le ali’i talavou na a’afia e uiga i tuutuuga o le maliliega, ma ua malilie ai fo’i le aiga.

Ua malilie itu e lua ina ia finau i le fa’amasinoga mo se fa’asalaga fa’anofovaavaaia mo Muao, peita’i ua malamalama le ua molia, tusa lava pe finau loia i le fa’amasinoga mo se fa’asalaga mama, e pule le fa’amasinoga pe talia pe teena ia fa’afinauga.

Ua ia malamalama fo’i, e le mafai ona toe suia lana tali ioe ua tuuina atu i le fa’amasinoga, pe afai e tuuina mai se faasalaga a le fa’amasinoga ae le tusa ai ma lona mana’o.

O lo o taofia pea Muao i le toese e fa’atali ai le aso Faraile o le vaiaso fou lea ua faatulaga e lau ai lana fa’asalaga.