Taofia le ali’i lona lua masalomia i le tafanaina ta’avale Leoleo

Ua fa’amaonia mai e le Komesina o Leoleo ia Le’i Sonny Thompson le mae’a lea ona taofia e Leoleo o le tagata lona 2 e to’alua i ai i laua o lo o tu’uaia ma molia i le fa’alavelave lea na tafanaina ai e ni isi se ta’avale a Leoleo i le fa’aiuga o le tausaga na te’a nei.

I se fa’atalatalanoaga ma le Komesina i le vaiaso na te’a nei, na fa’amaonia mai ai e Le’i i le Samoa News le mae’a lea ona taofia o le ali’i sa tau sailia e Leoleo.

O le ali’i lea ua taofia nei ma molia, o se ali’i e talavou i lalo o le tulafono, ma o lo o molia o ia i moliaga fa’asaga i fanau laiti, o lo o taofia fo’i o ia i le Falepuipui o Tamaiti i Tafuna (JDC), e fa’atali ai taualumaga o lana mataupu.

E le i mafai e le Komesina ona ia fa’amatu’u mai i le Samoa News ni isi fa’amatalaga auiliili e uiga i moliaga fa’asaga i le ali’i ua taofia nei, ona o ia o se tamaititi e talavou i lalo o le tulafono.

“O le ali’i lea ua taofia ma molia e 16 tausaga le matua, o lo o molia o ia i moliaga mo tamaiti talavou, ma o lo o taofia fo’i o ia i le falepuipui o tamaiti. O isi fa’amatalaga e uiga i lenei mataupu e le mafai ona ou talanoa atu i ai”, o le saunoaga lea a Le’i.

E 2 vaiaso talu ona tuana’i le fa’alavelave e pei ona tu’uaia ai ni isi i le tafanaina o se ta’avala e Leoleo i le po o le aso 15 Tesema 2017, ae taofia loa e Leoleo le ali’i o Thomas Siaumau ma molia i moliaga eseese e aofia ia le fa’aoolima ma le fa’aaoga faasolitulafono o a’upega.

Na faamaonia e Le’i i le Samoa News i le fa’aiuga o le masina o Tesema o le tausaga na te’a nei, le sailia lea e Leoleo o le isi tagata o lo o masalomia e to’alua i ai i latou o lo o tu’uaia i lenei fa’alavelave, i le mae’a ai lea ona sainia e le fa’amasinoga o se poloaiga e pu’e fa’apagota mai ai o ia.

O lo o tau taofia uma Siamau ma le ali’i talavou i le toese e aunoa ma ni tupe e fa’atulaga e tatala ai i laua i tua. Na teena e le afioga i le ali’i fa’amasino ia Fiti Sunia talosaga e loia fautua o lo o fautuaina aia o i laua ua molia, mo se avanoa e fa’atulaga ai se vaega tupe e tatala ai i laua i tua.

Saunoa Sunia e fa’apea, o le matuia o le mataupu o lo o tu’uaia ai i laua, aemaise lava o lo o a’afia ai ‘aupega, o le mafua’aga lena o le finagalo o le fa’amasinoga ina ia teena le fa’atulagaina o se tupe e tatala ai i laua ua molia.

O lo o fa’agasolo pea i luma o le fa’amasinoga maualuga le mataupu a Siaumau, ae o le ali’i talavou o lo o tu’uaia fa’atasi i laua, o lo o fa’agasolo lana mataupu i luma o le fa’amasinoga fa’aitumalo.

O le aso 6 Aperila lea ua fa’atulaga e toe valaau ai le mataupu a Siaumau i luma o le Fa’amasinoga Maualuga, ina ua talia e le afioga i le ali’i fa’amasino ia Michael Kruse le talosaga a le malo, mo se avanoa e toe tolopo ai le mataupu a Siaumau, ona e le i mae’a suesuega a Leoleo o lo o fa’agasolo i lenei mataupu.

Na fa’ailoa e le loia a le malo ia Woodrow Pengelly e fa’apea, o ni isi o vaega o su’esu’ega a le malo o lo o fa’agasolo i le taimi nei, e aofia ai le fesiligia lea o ni isi o molimau fa’aopoopo e uiga i lenei fa’alavelave, atoa ai ma le auina atu o mea molimau i Amerika mol e su’esu’eina ma fa’amaonia.

O mea molimau e pei ona fuafua le malo e auina atu i fafo, e aofia ai le pulufana lea o lo o tu’uaia sa maua i totonu o le ta’avale Leoleo ina ua mae’a ona tafana i le po na tula’i mai ai le fa’alavelave.