Silia 700 na sulufa’i i Faleapitaga ina ua fa’aleaoga maota ma laoa

E silia i le to’a 700 le aofa’i o le mamalu o le atunu’u na sulufa’i atu i nofoaga ua faapitoa mo Faleapitaga, ina ua fa’aleagaina a latou maota ma laoa i le malolosi o matagi na momoli mai e le tama’ita’i o ‘TP Gita’ i le fa’aiuga o le vaiaso na te’a nei.

O le to’atele o le mamalu o le atunu’u na sulufa’i atu i Faleapitaga e pei ona fa’aaoga ai faleaoga a le malo i nofoaga eseese o le atunu’u, lea fo’i na mafai ona tausia lelei ai i latou i taumafa, laei, atoa ai ma soo se mea e mana’omia.

I ripoti na tu’uina mai e le Ofisa Autu mo Faalavelave (EOC), na taua ai le to’atele o aiga na faaleagaina maota ma laoa i le ‘afa, ma ua amata nei ona aga’i atu le Ofisa mo le faatinoina o a latou suesuega i le fa’amautuina o meatotino sa fa’aleagaina.

O le po o le aso Faraile na te’a nei e pei ona fa’amaonia mai i ripoti mai le Ofisa Vaaitau, le aga’i malie ese atu o le ‘afa o Gita mai Amerika Samoa, ae aga’i atu i le itu i saute. E ui ua aga’i ese atu le ‘afa o Gita, ae sa i ai pea matagi malolosi na aafia ai le teritori e oo mai i le aso ananafi.

Na taua e le afioga a Lemanu Peleti Mauga, o ia lea o le sui o Amerika Samoa (GAR) e fesootai ma sui o le feterale mo fesoasoani i taimi o faalavealve faalenatura, pe tusa o le 90% o le sapalai o le eletise ma le suavai na motusia uma mo le motu o Tutuila ina ua afatia i le malolosi o matagi mai le ‘afa o Gita i le aso Faraile.

O le mae’a ai ona tuuina atu o le ripoti i tulaga fa’aletonu ua aafia ai le atunu’u, na faalauiloa aloaia ai loa e le afioga i le ali’i Kovana ia Lolo Matalasi Moliga le i ai o Amerika Samoa i se tulaga fa’aletonu, ma ua moomia ai le i ai o ni fesoasoani mai le malo tele mo le toe fa’aleleia o mea ua fa’aleagaina.

Na fa’amaonia mai e Lemanu le mae’a lea ona ia fesoota’i atu i le sui o le Ofisa a le Feterale e gafa ma fesoasoani mo taimi o fa’alavelave (FEMA), e tusa ai o tulaga ua faaleagaina i le motu o Tutuila e mafua mai ona o le ‘afa o Gita, ma ua sauni le FEMA e auina mai la latou vaega fesoasoani e tusa ai o lenei manaoga.

O se tasi o lu’itau tele i vaega ua faaleagaina, o le taumafai lea e toe fa’aleleia uaea eletise ma pou uila na fa’aleagaina i le ‘afa.

O le tele o vaega o le atunu’u ua mae’a ona toe fa’aleleia pou ma uaea eletise ma ua mafai ona toe fa’aola, se’i vagana ai nai vaega laiti e le i mafai ona toe faaola ona e tele se galuega e moomia le toe fa’aleleia i uaea eletise ma pou uila.

O le aoauli o le aso Toona’i na te’a nei na taunu’u ai i le malae va’alele fa’avaomalo i Tafuna le va’alele a le US Coast Guatd C130 mai Honolulu, lea o lo o malaga mai ai sui o le Feterale e aofia ai le sui o le FEMA mo le fa’atautaia o suesuega i vaega o le atunu’u na fa’aleagaina.

Na taua mai e le sui sooupu a le US Coast Guatd mai Honolulu ia Lt. Scott Carr e fa’apea, o le vave oo mai o a latou sui o le naunau lea ina ia ofoina mai le fesoasoani mo Amerika Samoa, atoa ai ma le fia fesoasoani mai i ni isi o vaega e moomia ai la latou fesoasoani.

O le aso ananafi sa fa’amoemoe  e taunu’u mai ai isi sui o le FEMA i le malaga a le Hawaiian Airline mai Honolulu, mo le fa’amoemoe e fesoasoani i sui ua mae’a ona i ai i le atunu’u, mo le fa’atinoina o le latou galuega fa’atino mo Amerika Samoa ma ona tagata.

O lo o galulue fa’atasi ofisa e ofoina atu le fesoasoani mo i latou ua afaina ma le Ofisa o le Koluse Mumu a le atunu’u, mo le ofoina atu lea o le latou fesoasoani i a i latou uma ua afaina maota ma laoa.

E ui o lea ua faaleaoga aloaia lapataiga mo le ‘afa malosi o Gita, ae o lo o i ai pea lapataiga mo tafega malologa, ma ua fautuaina ai fo’i le atunu’u o lo o alala i nofoaga maualalalo ma tu matafaga, ina ia aga’i i nofoaga maualuluga mo le saogalemu.