Solofua moliaga mamafa na tu’uaia ai e le malo Salend Singh

E le i lava mau na tu’uina atu e le itu a le malo e lagolago ai la latou tagi fa’asaga i le ali’i Faipisinisi mai Fagaima i le vaiaso na te’a nei, ina ua tu’uina mai le fa’aiuga a le Vaega Iloilo Iuga, e le ta’usala Salend Singh i moliaga e 4 na tu’uaia ai o ia e le malo.

O loimata o le fiafia na molimauina i totonu o le potu Fa’amasino i le aso Tofi na te’a nei, ina ua mae’a ona faitau e le Failautusi a le Fa’amasinoga le fa’aiuga a ali’i ma tama’ita’i iloilo iuga.

Ina ua mae’a ona faitau le fa’aiuga, na vaaia le aapa atu o le aao o le ali’i Loia a Singh ia Marcellus T. Uiagalelei ma opo mai o ia ma fa’alototele atu i ai, ao tu Singh ma ona loimata i luma o ali’i ma tama’ita’i iloilo iuga.

Na faafetaia e le afioga i le ali’i Fa’amasino ia Elvis P. Patea le sao a ali’i ma tama’ita’i iloilo iuga, i le sailia lea o le mea moni fa’asaga i le mataupu sa tu’uaia ai Singh.

“Alu ia oe ua e sa’oloto”, o le saunoaga lea a Patea na tu’uina atu ia Singh. O le afioga i le ali’i Fa’amasino Lagolago ia Mamea Sala Jr ma le afioga a Paepae I. Faiai na lagolago ia Patea i le fa’atautaia o lenei mataupu.

Ina ua fesiligia le Loia a le malo i sona finagalo, na taua ai e le susuga a Robert Morris lona fa’aaloalogia o le fa’aiuga a ali’i ma tama’ita’i iloilo iuga. Na toe fesiligia o ia e le Samoa News, pe talitonu ua faatamala le malo i le tuuina atu o mau e lagolago ai la latou tagi fa’asaga ia Singh, ae na saunoa Morris, “E leai sa’u tala i lena tulaga, pau la’u fa’amatalaga, ou te fa’aaloalo i le fa’aiuga a ali’i ma tama’ita’i iloilo iuga”.

FA’AFINAUGA FA’AI’U A LOIA

O le ali’i loia lagolago ia Woodrow Pengelly na fai ma sui o le malo i le tuuina atu o fa’afinauga fa’ai’u fa’asaga i lenei mataupu. Na taua e Pengelly i ali’i ma tama’ita’i iloilo iuga e fa’apea, na mafua ona piki e Singh ia le tamaititi e 13 tausaga le matua i le taeao o le aso 18 Tesema 2015 i Vaitogi, ina ia mafai ai ona fa’atino iuga mataga fa’asaga ia te ia.

Na finau Pengelly e fa’apea, ua lava molimau na tuuina atu e le malo e lagolago ai gaioiga mataga sa faia e le ua molia i le tamaititi aoga, e ala i lona ave o ia i luga o le mauga o Logotala i Vaitogi, ma ia faamalosia ai o ia e tago atu i ona itutinosa.

Sa ia taua fo’i e fa’apea, o le pulou Santa Claus na fai a le tamaititi aoga i le taeao na tula’i mai ai le fa’alavelave, na maua e Leoleo i luga o le mauga o Logotala, le nofoaga na fa’ataunu’u ai e Singh uiga mataga fa’asaga ia te ia.

O le $2 lea na ave e Singh i le tamaititi i le taimi na momoli ai o ia i le aoga, na faia ina ia taofia ai le tamaititi mai lona fa’ailoa i se isi o mea leaga uma sa tutupu ia te ia i le taeao o le aso lea.

Na finau malosi Pengelly i ali’i ma tama’ita’i iloilo iuga e fa’apea, e le tatau ona latou masalosalo i mau ua tuuina atu e le malo, ona ua lava ma totoe ia mau e lagolago ai le tagi fa’asaga i lenei ali’i le alofa.

Ae na taua e le loia a Singh ia Uiagalelei e fa’apea, o le tagi a le malo fa’asaga ia Singh, o lo o fa’avae i molimau eseese na tuuina atu e le tamaititi na a’afia. I le taeao na tula’i mai ai le fa’alavelave e pei ona tuuaia ai e le malo ia Singh, na fa’amatala e le tamaititi i lana faiaoga fai mai, na alu atu le ta’avale a Singh na tu atu ia te ia, ma lana faaupuga la te o e momoli o ia i le aoga.

Ae ina ua musu e oso i totonu o le ta’avale, na oso i fafo Singh ma le ta’avale ae ta’amilo atu ua toso fa’amalosi o ia i totonu o le ta’avale ma la aga’i atu loa i luga o le mauga o Logotala. Ae o le fa’amatalaga na tuu atu e le tamaititi i le vaiaso na te’a nei, sa ia taua ai e fa’apea, ina ua tu le ta’avale a Singh ma fai atu la te o e momoli o ia i le aoga, sa ia talia ma le fiafia, ona tago atu lea ua tatala le faitoto’a ma oso i totonu, ma aga’i atu loa lea o le la ta’avale i le aoga.

Na taua e Uiagalelei e fa’apea, o le eseese o fa’amatalaga a le tamaititi o lo o tu’uaia na aafia, ua mafua ai ona manino le le mafai e le malo ona faamaonia le latou tagi fa’asaga ia Singh. Na taua fo’i e Uiagalelei le le mafai e le malo ona avatu i luma o ali’i ma tama’ita’i iloilo iuga le pulou o lo o finau le malo, na latou maua i luga o le mauga o Logotala i le aso na tula’i mai ai le fa’alavelave, e fa’amaonia mai ai, o le pulou Santa Claus lea na fai a le tamaititi i le taeao na tula’i mai ai le fa’alavelave.

I le faaiuga o lenei mataupu, ua tula’i mai ai le le mafai e le malo ona faamaonia le latou tagi fa’asaga ia Singh.