Osofa’i Loia a Singh eseese o molimau tamaititi 13 na ave Leoleo

Na matua osofa’i e le loia a le ali’i Faipisinisi o Salene Singh le eseese o le molimau a le tamaititi e 13 tausaga o lo o tu’uaia na taumafai Singh e fai i ai uiga mataga na ave i Leoleo, ma lana molimau lea na tu’uina atu i luma o le Vaega Iloilo Iuga i le vaiaso nei.

I le aso lona 2 o le Fa’amasinoga Autu a Singh o lo o fa’agasolo i luma o le Fa’amasinoga Maualuga, na valaau ai e itu e lua a latou molimau mo le laglagoina o la latou finauga i lenei mataupu.

O ni isi o molimau na valaau e le malo e aofia ai le tamaititi o lo o tu’uaia na a’afia, o lana faiaoga, o le Leoleo sa fa’atinoina le suesuega, atoa ai ma ni tagata se to’alua e nonofo i tafatafa o le auala e aga’i i luga o le mauga o Logotala i Vaitogi. E eseese uma lava molimau na tu’uina atu e i latou nei i luma o le Fa’amasinoga.

I le itu tete’e, na valaauina e le ali’i Loia o lo o tula’i mo Singh ia Marcellus T. Uiagalelei molimau eseese e aofia ai le ua molia, o lana tuaoi, o lana uo e nofo i Vaitogi, atoa ai ma le tagata e ana le ta’avale lanumeamata lea na fealua’i ai Singh i le taeao o le aso 18 Tesema 2015.

Na taua e le tamaititi o lo o tu’uaia na a’afia i lana molimau i luma o le Vaega Iloilo Iuga e fa’apea, ao tutu i le taeao o le aso na tula’i mai ai le fa’alavelave e fa’atali sana pasi e alu ai i le aoga, sa fa’afuase’i ona aga’i atu se pikiapu lanu meamata o loo ave atu e Singh ma tu atu ia te ia, ma la ma tietie ai loa ua momoli o ia i le aoga.

Ae o lana molimau sa fai i lana faiaoga i le taeao o le aso 18 Tesema 2015, sa ia taua ai le alu atu o le pikiapu lanu meamata na ave atu e le ua molia ma tu atu i ona luma, ona valaau atu lea o le ave ta’avale ia te ia e oso atu i totonu la te o, peita’i sa musu o ia. Sa ia taua le oso i fafo o le ave ta’avale mai lana ta’avale, ma savali atu ua toso faamalosi o ia i totonu o le ta’avale ma la o loa.

Na faailoa e Uiagalelei i le Vaega Iloilo Iuga e fa’apea, o le isi lea itu e tatau ona latou silasila toto’a i ai, o le eseese o fa’amatalaga a le tamaititi e uiga i le mea sa tupu.

Na taua fo’i e le tamaititi i lana faiaoga i le taeao lava lea e fa’apea, ina ua maua le avanoa e oso ai i fafo mai le ta’avale a Singh i luga o le maugao Logotala i Vaitogi, sa ia tamo’e aga’i mai loa i lalo o le mauga ma fa’aauau mai ai lava i le fale aoga.

Ae i lana molimau i luma o le Vaega Iloilo Iuga i le vaiaso nei, sa ia taua ai e fa’apea, ina ua sola ese mai i le vaega sa paka ai le ta’avale a Singh i luga o le mauga o Logotala, na toe sau le ta’avale ma tu mai ia te ia, ma valaau atu le ua molia ia te ia e oso atu la te o e momoli o ia i le aoga, o lea na ia toe oso ai i totonu o le ta’avale ma la aga’i atu ai loa ma Singh ma momoli o ia i le faleaoga.

O isi fa’amatalaga na eseese ai molimau a le malo ma le itu tete’e, o le taimi na vaaia ai le ta’avale lanu meamata lea e tu’uaia na ave e Singh i le taeao na tula’i mai ai le fa’alavelave.

Na taua e molimau e to’alua a le malo, o le te’a laititi o le 6:00 i le taeao o le aso e pei ona taua, sa la vaaia ai se pikiapu lanu meamata o aga’i atu i le auala e alu i luga o le mauga o Logotala i Vaitogi.

Na taua e le isi molimau a le malo le faigata ona ia iloa pe pogisa tioata a le ta’avale pe leai, ona e matua saoasaoa lava le alu a le ta’avale. Ae na taua e le isi molimau, e le saoasaoa tele le alu a le ta’avale.

Peita’i na taua e se tasi o molimau a le itu tete’e i le Vaega Iloilo Iuga e fa’apea, o le te’a o le afa o le ono (6:30) e aga’i atu i le itula e 7:00 i le taeao o le aso e pei ona taua, na alu ai i le fale Singh ina ua moomia lana fesoasoani i lana ta’avale ua pe, e taunu’u atu o lo o moe o ia.

Na finau le loia a le malo ia Robert Morris i le fa’amasinoga, na mafua ona ave e le ua molia le $2 i le tamaititi na a’afia ina ua mae’a ona momoli o ia i le aoga, ina ia taofia ai o ia mai lona ta’uina i se isi o le mea sa tupu, ae na finau Uiagalelei e fa’apea, na mafua ona ave e Singh le $2 i le tamaititi, ona ua fa’atele ona aisi atu o ia i se tupe e fa’atau ai sana meaai. E le gata fo’i i lea, na ave i ai e Singh ina ua ia iloa muliimuli ane, o le tamaititi e sau mai le aiga e masani ona ia faia a latou ta’avale.

Ua mae’a nei ona valaauina molimau a itu e lua, ma ua tu’uina atu nei le mataupu e iloilo e ali’i ma tama’ita’i iloilo iuga se fa’aiuga.