Tala I Vaifanua

AOAOGA TAUSIA GASEGASE FA'APITOA MO TAGATA MATUTUA

"O mea uma lava tou te faia ia faia ma le loto, peise'ai ua faia i le Ali'i, ae le o le tagata." Kolose 3:23. O le mau lea o le Tusi Pa'ia ua avea ma ta'iala i le galuega ua faia e i latou o lo'o ua fa'ailo, o Tausima'i mo Tagata Matutua ua tausia fa'apitoa tagata ua i ai gasegase tumau o le tino ma le mafaufau.

O i latou fo'i nei ua fa'apito augafa i ai le a'oa'oga ua fa'atautaia fa'apa'aga e le Pacific and Youth Community Development ma le Pule'aga Samoa Pago Pago - Hope House i Fatuoaiga.

O le vaiaso atoa lenei e fa'atautaia ai nei a'oa'oga, ma o lo’o i ai foma’i fa’apitoa mo lenei aoaoga taua.

"E fa'afetaia lava i latou sa faia mai lenei galuega ma le alofa tele. Peita'i i gasegase nei, e iai ona oiga fa'apitoa, e ao fo'i ona iloa lelei e tausima'i ona togafitia pe fa'aleleia a'o lei o'o ina afaina tele ai le gasegase. O tomai e mafai ona fa'afo'ia ai nei fa'aletonu ae le'i o'o ina maua i gasegase, o le tomai lea ua fa'aofi mai e nei a'oa'oga fa'apitoa. Le tomai e togafitia ai e i latou, ae maise o le oloa fo'i tausia lelei gasegase ia le o'o ina afaina i na ituaiga o fa'aletonu,” o se tala lea a le tama'ita'i o Kathryn McCutchan.

Na amata mai a'oa'oga i le aso Gafua ma na saunoa ai le tama'ita'i Fa'atonusili o le TAOA, Evelyn Satele.

O le aoga fa’apitoa sa amata i se suega amata. E leai ni a'oa'oga na faia e tapena ai sui mo lea suega, ae o le su'ega lea e fa'ailo ai le tulaga o le tomai mo le tausiga fa'apitoa o gasegase o fa'aauupegaina ai i latou ua aofia mo le vasega o le a faia mo le vaiaso atoa.

O le a'oa'oga na tatala ai a'oga a le vasega na fa'atautaia e Nancy Allen i tulaga o le iloa o le gaoioiga e faia pe a va'aia ua tatau ona suia fusi mo gasegase, o le ave'esea o latou ofu ma le toe fa'aofuina o i latou, o le fa'ataelega o gasegase i luga o le moega ma le toe teuteuina lelei o latou foliga ma le fa'afiafiaina o i latou.

Sa fa'ai'u le aoaoga i le fufuluga o nifo ma gutu o matua matutua ma ala e fa'afiafia ai i latou ina ia fiafia e faia lea tulaga i taeao ta'itasi.

Aso lua o le a'oa'oga i tulaga o le Fofo o le tino ma fa'asolosolo nai o latou vae ma lima, o ala e fesi'ita'i ai i latou i luga o moega ma gaoioiga e ao ina mataituina e le Tausima'i ia le fa'amaasiasia le gasegase i se mea e tasi a'o fesi'ita'i i latou.

Na faaauau le aoaoga o le fofo o le tino ma fa'asolosolo uaua ma maso o le tino i le afiafi ae maise o le lomilomi o so'oga o le tino o e gasegase.

I le aso Lulu, o se tautalaga fa'apitoa a Toetasi Tuiteleleapaga i le vasega o tausima'i ina ia mata'alia, aua e fa'asolo ina faigata mataupu ma tomai o le a aoaoina ai i latou i le vaega lua o le vaiaso o le a'otauina o i latou i lenei faiva aoga.

O le tausia lelei o ma'i sua, po'o ni manu'a i tagata matutua na soso'o ai ma sa fa'atautaia lea a'oa'oga e Dr Sherry Saito. O auala fo'i e tausia lelei ai gasegase e umi ona fa'ataooto i moega,  sa mafai ona a'oa'oina ai i latou uma.

O le afaina tau gugu i gasegase ma ala e puipuia mai ai i latou mai le pa'u i lalo, na aoaoina e Dr. Glen Rediger. Na fa'aauau lea a'oa'oga i le afiafi ma amata ai fo'i ma le isi mataupu aoga, o suiga ma auga o gasegase e ono o'o i ai gasegase ua tausi i moega.

O a'oa'oga fa'apito i mea taumafa, e fagaina lelei ai gasegase fa'apitoa ma le tele fo'i o le mea'ai e ao ina fagaina i 'aiga ta'itasi a gasegase fa'apitoa ma matua ua matutua. Ma sa fa'atautaia e Rediger.

I le aso Tofi, o le a'oa'oga  - "Pe fa'apefea ona e onosa'ia amioga a ma'i, ae maise i matua matutua ma gasegase fa'apitoa e matele ina faigata o latou uiga fa'aalia ia oe, pe a tiga fo'i tino i gasegase ua maua ai?"

O Saito sa ia faia lea a'oa'oga fa'apitoa, e fetufa'i ai ma i latou o le a agava'a e tausia tagata matutua ma gasegase fa'apitoa, i ala e gafatia ai ona e onosa'ia nei amioga a gasegase.

O le aso o lo'o fa'aauau ai pea lenei a'oa'oga fa'apitoa ma ua avea ma aso e fa'ailoa ai i sui uma ua mae'a a'oa'oina lelei, nisi o Ofisa ma Tautua e mafai ona fesoasoani i au taumafaiga a'o e fa'atinoa ou tiute fa'atausima'i. O le a avea oe ma se tasi e mafai ona fa'afeso'ota'ia nei tautua lautele ma o le a mafai ona e fa'aaogaina i latou o ni au fesoasoani mo ou tiute.

E i ai le fa'atasiga tele e faia mulimuli i le mae'a ai o lenei a'oa'oga fa'apitoa, ma taua'ao ai fo'i ni a latou tusi pasi ma fa'ailoga fa'apitoa ua latou ausia a'o avea ai ma tagata e a'oa'oina mo le tofi Tausima'i i Tagata Matutua ma Gasegase Fa'apitoa.

LAPATAIGA MO MATAGI MALOLOSI

E tusa i le itula e tolu i le aoauli ananafi sa falauiloa ai e le Ofisa o Va’ai Tau i Tafuna, sana lapataiga mo mo le nofo va’ava’aia mo Matagi Malolosi mo motu uma o Amerika Samoa.

O lona uiga, e mafai ona o’o mai matagi malolosi i le isi 48 itula o i luma. I le itula e tasi i e aoauli ananafi,  o Matagi Malolosi (Tropical Storm) o 07F sa i le 330 maila i Sisifo o Tutuila ma e aga’i atu i Sasa’e-Matu-i-Sasa’e i le 14 maila ma savili e lata atu i le 40 maila i le itula.

Fautuaina e le Matagaluega o le Puipuiga o le Saogalemu Fa’a-lotoifale (ASDHS), le mamalu o le atunu’u o lo’o nonofo i nofoaga maualalalo ma feoa’iga i auala tele ona o lologa ma tafega fa’apea ma sologa e mafua mai i timuga mamafa. 

Ae fautuaina pea le mamalu o le atunu’u ina ia nofo uta i tapenaga aua le saogalemu. O savili malolosi e mafai ona afaina ai se tagata pe fa’aleaogaina ai mea totino ona o lapisi (fasi-laupapa, fasi-‘apa) ta’atitia solo i fanua e lelea atu ma afaina ai.

Vala’au mai le 699-3800 le EOC po’o 633-1111 le Ofisa o Leoleo e lipoti ai ni sologa po’o tafega ‘ua afaina ai mea totino ma le soifua saogalemu.