Tatala le Ta'elega mo le Lautele - Le "Pala Lagoon Swimming Pool"

O le ulua’i ta'elega mo le mamalu lautele o le atunu'u ua tatala aloa'ia ina ia fa'aaogaina i le aso Faraile ua te'a i le Paka Liona, ma o se mata'aga fo'i lea galuega tele e $1.31 miliona lona tauaofa'i i le Rotary Club ma ana pa'aga e aofia ai ma le Malo o Amerika Samoa, faapea fo'i se vaega tupe mai le CDBG a le feterale mo galuega atina'e o le atunu'u.

O pa'aga na foa'i mo le galuega lea sa fa'amatu'u e fausia e le Rotary Club of Pago Pago na lisia mai i vaega e tolu, Platinum, Auro ma le Siliva ina ia tino mai le Ta'elega o le "Pala Lagoon Swimming Pool." Sa faia foi se ta'amilosaga Tapolo sa fa'atautaia mai le 15 tausaga mo lenei fa'amoemoe.

"Ua tusia i latou nei, a'o e fa'amalu ma le fiafia ma lou aiga i lea ta'elega, tau ina e fa'afetaia le agalelei ma le lima mafola i ala na latou foa'i ai. Peita'i, ia lalamua i lou agaga fa'afetai, ia tausia lelei lenei aseta aoga mo tagata uma o le teritori e fia fa'amalu ma fiafia fa'atasi ma aiga i lea nofoaga,” o se tasi lea o saunoaga sa fa'afofogaina e le mamalu sa auai i le tatalaga aloaia o le Swimming Pool.

O le sauniga mamalu sa si'itia e le Fa'afeagaiga Iasepi Ulu mai le EFKAS i Fagatogo ma vi'iga fo'i sa fofogaina e lana aufaipese fa'apitoa a tama'ita'i i lea taeao. Ona soso'o lea ma saunoaga fa'apitoa sa fa'asolo mai e le fofoga o le polokalame na taoto mo le fa'amoemoe, le tofa Tofa Su'a Sualauvi.

Na mua'i maua le avanoa o le afioga le Sa'o Utu Abe Malae mo lana folasaga e tusa o le galuega ma lona tau, ma ua tolaulauina mai ai i latou na togi ma'a i lenei fa'amoemoe.

"Sefulumalelima tausaga ua te'a, na ofo ai le ali'i sa avea ma Peresetene o le Rotary o Pago Pago, William Sword e fausia e le Rotary le Vaita'ele lenei, ona e iloga mai e to'atele alo o le atunu'u e fefefe i le sami ma le iloa atu ai ona a'au. E ui ina tuai mai, ae o se galuega e tuai ona mae'a, ua fausia lelei fo'i, ma e fa'afiafiaina fo'i tagata, ona ua mafai ona mae'a ma latou fa'aaogaina,” o se tautalaga lea a Utu e tusa o lea galuega.

Sa ia fa'ailoa mai ala sa saili ai le Rotary mo le fa'amoemoe. "O le umi o nei tausaga, o le umi lena sa fa'aaoga e le Rotary e faia ai latou ta'amilosaga tapolo ina ia maua le seleni ma fa'aputu mo le fa'amoemoe. Soso'o loa ma le fesoasoani mai o le DOC e talosagaina le tupe toina mai le CDBG, fa'atasi ma foa'i na talia mai pa'aga uma ua lisia, ma ua iloga ai loa ona lava le seleni e amata ma fa'amae'a ai le galuega i le lua tausaga mulimuli o le taimi ua ta'ua."

"O le tau aofa'i o le galuega $US1.31 miliona fa'atasi ai ma le tele mafaufauga fefaaalia'i ma aikia eseese na fa'aalia ma toe soloia ae fa'aaogaina nisi, fa'afetai aua o se galuega ua to'atele sui na tofusao i ona fausaga, ma i'u ane o se mea lelei ua tula'i mai. Fa'afetai Rotary ma au pa'aga uma, ae maise i latou na matua galulue malosi i le fausaga o lenei ta'elega."

O ana toe upu na ia fa'apea ai, "Ua uma le vaita'ele i Pala Lagoon, e le pulea e le Rotary, ae o le a pulea lava e le mamalu lautele o le atunu'u, ia outou tausia lelei, ma ia tumama i ai, ia umi fo'i ona aoga ma tatou fa'aaogaina!"

Ina ua tula'i le ali'i Inisinia sa nafa ma le fausaga lea, Joe Weilenman, sa na'o na ia fa'ailoa lava, "Ona o a'u lea sa fa'ao'o mai i ai le seleni fa'asoa mo le galuega, aua o a'u lea o se sui totino o le Rotary, ou te fia fa'ailoa atu, mai le to'atele o e na tofu sao i lenei galuega, ae ou te le iloa po'o ai le ulugali'i na o mai lava taua'ao mai le $50,000 mo le fa'amoemoe e fausia ai le Pala Lagoon Swimming Pool, toe tulioso i le la'ua ta'avale, o ese atu. Mo oulua fa'afetai pe afai ua oulua va'aia se galuega ua tino mai ona o le lua foa'i fo'i sa aoga mo lona fausaga!"

Saunoa le peresetene o le Rotary i lenei tausaga, John Raynar ma ia fa'afetaia tagata uma na galulue ia tino le ta'elega, ae maise i pa'aga sa latou foa'i ma sui totino fo'i o le Rotary i le galulue fa'atasi, ua ausia ai lenei aso iloga mo aiga uma o Amerika Samoa, latou te fa'aaogaina. "E ui ina fa'aletonu le tamaoaiga o le tatou malo, ae o lo'o una'ia pea galuega lelei, e fa'ailoa atu ai, pe vaivai pe itiiti se galuega e fai ma mae'a, ae o lo'o tau atina'e lava le atunu'u. E le o tatou fa'avaivai, ae o lo'o tatou fa'amalolosi fa'atasi!"

O le sao o le afioga le Kovana Sili Lolo Moliga, sa ia fa'afetaia ai le Rotary i le galuega ua mae'a nei. Fa'afetaia pa'aga uma ua fa'ailo, ae maise o tagata uma sa tofu sao i so'o se ala ia mafai ona mae'a le Vaita'ele o le a fa'aaogaina e le atunu'u atoa, ma avea fo'i o se isi nofoaga e fiafia i ai tagata e malaga mai, ae maise o i tatou o lo'o i le lotoifale.

Na ia toe fa'atepa le lautele i le fuaitau o le Tusi Paia sa si'itia mai e Rev. Iasepi i lana tautalaga, "E sili le to'alua pe to'atolu nai lo le to'atasi i mea uma...aua a to'atele ona mama lea o se avega po'o se galuega o lo'o faia!"

Fa'afetaia fo'i e ia le CEO Utu Abe Malae o le ASPA, aua o se tasi lea o galuega e le tu'umamaina e ia lona va'ai toto'a i lona fa'atautaiga po'o aluga lelei mea uma. E o'o mai fo'i i le aso atofa mo le tatalaina aloa'ia, e tele lava lona sao, e le gata i lenei galuega, a'o isi mea uma o tautua ai o ia i le atunu'u.

Ona o le Rotary e matele i le aufaipisinisi o lo'o tutula'i mai ai ma tautua e pei o le latou auau, "Fa'amuamua Lau Tautua", o lea sa ia fa'ailoa atu ai lona agaga fa'afetai tele mo i latou uma na foa'i ma tofu sao i le galuega o le a aoga e fa'afiafiaina ai so'o se aiga e pa'au ane i ai ma fa'aaoga.

"O lenei se galuega, ua faamauina atili ai le galulue fa'atasi o le aufaipisinisi, tagata lautele na foa'i ae maise o le Malo. O le a fo'i se sao o le Malo mo le galuega, fa'afetai mo le tou lagolagosua ma tatou atina'e fa'atasi le tatou atunu'u i mea e manuia ai le aotelega o i tatou uma."

O le lipine e tatala aloa'ia ai le ta'elega sa o'otia e le tina o le atunu'u Cynthia Moliga, ma ulufale atu loa i latou uma aofia mo le maimoaga ao le'i tatala aloaia mo ta'elega a le lautele i le itula e 1:00pm i le aoauli lava o le aso Faraile.

O le ulufale mo tagata uma e $5.00 i le tagata, ae o lo'o ua mae'a fa'apipi'ia fo'i le seti o tulafono e ao ina usita'ia e i latou uma o le a fa'aaogaina. Ua lomia nei tulafono i le gagana peretania ma le fa'asamoa, ua leai la se 'alofaga o se tasi, ina nei le malamalama.