Le’i maua fa'ailoga tauvaga pese ma solo a le DHSS

O le tauvaga pese ma solo tusia a le Matagaluega o Alamanuia mo Tagata Lautele [DHSS] lea sa faia mai le amataga o le masina o Tesema 2017, ua o'o mai lava i le aso, o tatalia e i latou na lautogia o latou fa'ailoga o le tulaga muamua, tulaga lua ma le tulaga tolu i le solo ma le pese, ae maise fo'i o le isi to'afa lea e maua fa'ailoga o le taumafaiga e ta'i $100.

Ina ua talanoa atu i e na fa'asea mai ona ua fiu e faatali le fa'ailoga o le tauvaga pese ma le solo, ae fa'ailoa mai ai, "O le tauvaga pese lea sa faia e le matagaluega o le DHSS, e fa'aupu atu solo ma pese aga'i i a latou tautua lautele!"

"O se ala e fa'alauiloa ai nei tautua, atoa ai ma le fiafia o tagata ona o lea fo'i tautua,” o se tala lea a se tasi o i latou.

Peita'i, o le ala o le latou savali, ona ua le mautinoa lava e i latou pe moni e a e maua nei fa'ailoga?

"Ua faigata ona matou iloa patino, ona o lea ua maliu le fa'atonu sili, ae le iloa la pe toe faia le isi tauvaga lea e olioli atu i ai mo le tausaga lenei?"

O atugaluga uma nei, ua fa'afofogaina, ona saili loa lea o se tali e fa'anofo filemu ai lagona ma le o'otia fo'i o nei sui mai le atunu'u ua fa'auia mai a latou mataupu i lenei tautua.

O le susuga Tunoa Peteli mai le DHSS, sa fa'afesiligia aua o ia lea, e tautonu i ai lea mataupu. O lana tali sa ia fa'ailoa mai ai, "E maua fa'ailoga e pei ona fa'ailoa i sui na e tatau ona agava'a ai, ona o i latou e tulaga muamua e maua le fa'ailoga $500. O le fa'ailoga mo le tulaga lua e $300, ma le fa'ailoga o le tulaga tolu e $200. E tutusa lelei fa'ailoga mo le pese ma le solo fo'i. O lona uiga e ono fa'ailoga ua mae'a saunia ma ua lautogia ai tagata sa tauva."

Peita'i, ona sa to'asefulu i latou na fili fa'apitoa mai mo le tauvaga lona lua o le tauvaga pese lea, o lona uiga e i ai le to'a ono lena e tatau lava ona maua latou fa'ailoga ta'i $100. mai le Solo ma le Pese."

Ina ua fesiligia i le taimi tonu e maua ai nei fa'ailoga tupe, ae fa'ailoa mai, "O le tulaga i le tuai na maua, e moni lelei le fa'asea a nai tagata o le atunu'u. Pau lava o le fa'asologa o fa'agaoioiga o tupe a le Malo, e ui lava ina mae'a taua'aoina atu i ofisa e fa'agaoioia mai ai siaki mo nei sui, e tatalia lava le siakiga o mea uma ma le fa'ao'o mai i o matou a'ao o siaki nei. O le tala mai i le matou Ofisa i le aso ananafi, o le a maua i le vaiaso fou. Ia o le tala fo'i lea ua fa'ailoa atu i le tatou Nusipepa."

Mo le tauvaga o lo'o popo'e i ai finagalo o le mamalu lautele mo le tausaga nei, e toe faia fo'i lenei tauvaga, ae ua matua fa'alautele lava ma e fa'afiafiaina la le mamalu o le au tauva, aua o le a le toe saunia ni fa'ailoga tupe, ae o le a matua tapena mai fa'ailoga tau oloa.

"O lo ua fa'amoemoe o le tapenaga o le tauvaga o loma mo lenei tausaga, o le a fa'atino e ala i foa'i mai kamupani tetele, ae maise ia i latou o lo'o aoga i ai lenei matagaluega e ala i fefa'ataua'iga. Ia faia lava le tauvaga, ae ua tutu fo'i meaalofa ma va'ai patino i ai le 'au tauva,” o se tala lea a Peteli i le Samoa News.

Ina ia fesiligia pe aisea fo'i na le fa'ailoa mai ai i le tatou nusipepa mo fa'asalalauga fa'alaua'itele, ae sa fa'ailoa mai, "Ua faia lava i fa'asalalauga i luga o le televise, ae uma ane e le o iloa mai e lena itu o le tautua lautele, peita'i, ona o lea ua fa'ailoa atu, ia o le a o'o atu fo'i se fa'ailo e ala i lena tautua."

O le ala o le fa'atele o le fa'amoemoe o loma nei i lea tauvaga, ona o le a tele se taimi e tapena i ai sui o fia tauva, fa'atasi ai ma le tapenaga fo'i sa mae'a fuafua lelei e le fa'atonu ua tu'ua nei le malo, e ao ina fa'atautaia i ai lea tauvaga pese ma tusiga solo. "E fa'ataunu'u lava le fa'amoemoe o si matou ta'ita'i ua tu'ua nei i matou, aua o se mea lelei, e fa'aaoga fo'i i ai taleni a le mamalu lautele o le atunu'u, aua e le o se fa'amasinoga faigofie lava na mafai ona faia i nei sui ua maua nei fa'ailoga,” o se toe tala lea a Peteli e tusa o le tauvaga pese ma solo.