Tala I Vaifanua

SAILI MAI SE ISI VA'A PAILATE A LE UAFU TELE I FAGATOGO

O lo ua fa'ailoa mai e le tama'ita'i Fa'atonu o Uafu ma Malae Va'alele, Taimalelagi Dr. Claire Poumele, ua mautu mai le i ai o se va'a pailate (tugboat) e tasi e filifilia mai  va'a e lua ua mae'a va'aia e le sui fa'atonu Chris King ma nisi o Kapeteni, aua galuega fa'atino a le Matagaluega i totonu o le uafu.

O va'a e lua ua mae'a ona maimoaina e King ma ali'i Kapeteni, e tasi i Alabama, "Peggy H" ma le tasi i Maui, Hawaii "Mikiala."

E tusa ai ma se saunoaga a Poumele, "E tasi le va'a e matou te mautinoa lava e fa'atau, ma e tauau e manatu le matou vaega e fa'atau le va'a i Alabama, peita'i o lo ua toe tu'u atu lava i tua le fa'atauga se'i mae'a ona folau i latou i le ‘Mikiala’ i pe o le a se latou fa'alogo i ai ma ali'i Kapeteni o Lafoga Alovao ma Mike Pulu.”

E tusa ma le tolu vaiso na malaga ai King i Alabama e maimoa ma folau fo'i i le pailate "Peggy H" ma ua mae'a fa'ao'o mai fo'i fa'amaumauga ma fa'amatalaga e tusa o lea va'a. O le Mikiala o le a faia ai folauga fa'ata'ita'i ia Ianuari 22-24, 2018 ma fa'ato'a faia ai se fa'ai'uga i le fa'atauga.

"Afai ae filifili e fa'atau mai le ‘Peggy H’ e fa'ato'a tu'uva'a ese mai le va'a lena i le aso 14 Fepuari, 2018 mai Alabama, peita'i afai e filifili mo le Mikiala, o lona uiga e tu'uva'a ese loa i latou o lo'o malaga atu, King, Lafoga ma Pulu mai Alabama ia Ianuari 26, ma o mai i Hawaii e amata fuafuaga o le fa'atauga o le Mikiala."

O lenei faatauga o lo'o taumafai ai le Matagaluega ina ia usita'ia aiaiga a le US Coast Guard ina ia mautinoa e lua va’a pailate e tautuaina le uafu i Fagatogo.

Na feutagai lava le US Coast Guard ma lea matagaluega o le tatou malo ina ia tatala mai se avanoa e fa'aaoga ai na'o le tasi le va'a pailate mo le taimi nei se'ia o'o ia Mati 15. O le taimi tonu lea ia o'o atu i ai ae ua mae'a taula le isi pailate fou i le Uafu tele.

AMATA GALUEGA FA'AFOU FALEUIA I PAKA & MALAE TA'ALO:

Ua mae'a ona tapunia nei le faleuia (se’i tulou) i le Paka Liona, le fale o lo'o pito i le Comsat po'o le nofoaga o le Satelite ina ia toe fa'aleleia atili.

Ua fa'ailoa mai e le susuga le Fa'atonu tofia i le taimi nei Ken Tupua, "O lo'o fia fa'alauiloa atu i le mamalu lautele, o le a va'aia suiga lelei i le toe fa'afouga lea ua amata nei o faleta'ele uma lava i Paka eseese. O le a fa'asolosolo lava ona tapunia mo nei galuega e tatau ona faia, aua ua silia fo'i ma le 20 tausaga talu mai ona fa'atutuina nei faleuia e le lautele."

I sana fa'amatalaga o lo ua filifili i latou e fa'ama'a uma foloa o faleta'ele uma ta'itasi, fa'alautele ma ua manatu fo'i e fa'aleleia atili. Peita'i o le fili o nei galuega uma, e matele lava le mamalu lautele ina le fa'aaogaina fale nei ma toe tapena a'o le'i e tu'ua le nofoaga.

“Afai lava e le suia o tatou uiga nei, e faia pea le tiute a le Matagaluega ma lana aufaigaluega, ae tima'ia le atunu'u pele ina ia fa'aaoga tatau ma ia tautuana fa'amama pe a mae'a ona e fa'aaogaina le tatou nofoaga,” o se tala lea a Tupua.

Ua faia muamua le faleuia lea e tulata lava i le malae tenisi ma le malae Basketball i le Paka Liona, aua e mana'omia ona o lo'o faia lava ta'aloga a le tupulaga i taimi uma i nei malae ta'alo.

Ua tapunia nei ae le'o tapunia le isi fale lea e pito mai i uta e fesaga'i tonu ma le falepuipui, ina ia mafai ona fa'aaogaina e le mamalu lautele.

Pe afai e mae'a uma fale nei e lua ona fa'alautele ma fa'aleleia mo le isi fo'i 20-30 tausaga e toe fa'aaoga ai, o le a tapena loa le fale lea e pito lava i le Ta'elega po'o le "Lagoon Swimming Pool” i le Lions Park lava.

"O le fa'amoemoe ia fesoasoani tele lea i le taimi e tatala ma fa'aaoga ai le tatou Ta'elega e le maualuga o le atunu'u, ae ia lava ma totoe faleuia e le mamalu o le a gasolo mai i ai. O galuega lava e tatau ona faia, pau o le mea e le mafai ona fa'atutu ai ni moli eletise i nei faleta'ele, e tusa ai ma tulafono o Paka ma Malae Ta'alo,” o se toe fa'amatalaga lea a Tupua.

O Tupua sa avea ma Sui Fa'atonu o lea Matagaluega, a'o avea le susuga Pili Gaoteote ma Fa'atonu. Na fa'amavae mai Gaoteote mai lea tofiga i le masina o Oketopa 2017 ma ua filifili e le kovana Tupua e avea ma faatonu sili.

O le taimi nei ua avea ma se tasi o sui e ao ina fa'amaonia mai e le Fono Faitulafono, ona fa'ato'a tamau ai lea o ia i lona tofiga fou lea.