Moses Samia & Sebastian Briski - Maua Ipu mai All Poly Utah & ASHSAA

E to'alua ni alo o lo'o a'oa'oga ma sa ta'a'alo i le 'au malosi a le Sharks mai Samoana ua iloga ona fa'amanuiaina taumafaiga i lea fa'agatama i le mae'a ai le Liki Football i lenei tausaga. O i la'ua nei o Moses Michael Samia ma Sebastian Briski. Moses e ta'alo o le Offensive Lineman a'o Sebastian o le Defensive Lineman

O i la'ua fo'i nei sa maua le avanoa e malaga atu ai i ni avanoa lelei na toina mai e le Utah All Poly Football Camp i le tu'uaga umi o a'oga ia Iuni se'ia o'o ia Aukuso 2016. I le fa'aiuga o le koleniga fa'atasi ma sui i lena camp, lea e matele ina a'otauina ai alo mai Tonga, Hawaii ma Samoa na lua i le football ma o atu fo'i i ai Iunivesite ma Kolisi mai so'o se vaipanoa o le Iunaite Setete e saili mai ai ni a latou tama ta'a'alo, na maua e nei ali'i Samoana fa'ailoga o le summer lea i tulaga lava o le Ofensive Lineman ma le Defensive Lineman.

I le fa'aiuga fo'i o le Football Season a le ASHSAA o i la'ua fo'i nei sa lautogia i le fa'ailoga o le Ofensive Lineman mo Moses a'o le Defensive Lineman mo Sebastian.

O Moses o se alo e fa'asino ia Michael Samia mai Fagatogo ma Pavaiai ma le tina o Susana Tuiasosopo Samia mai Vatia, lea e alaala ai nei lea aiga.

O Sebastian o se alo e fa'asino ia Alicia ma le susuga Briski mai Pago Pago. Na malaga i latou e to'a lima mai Samoana i le latou so'otaga lea ma Alema Te'o o le ALL Poly Camp i Utah, ma ua toe taliu mai i latou i se ta'amilosaga matagofie mo le Samoana High i lenei tausaga aoga, 2017.

O le siamupini lea ua umia nei e le Samoana High, ma ua fa'apea fo'i ona mata'ina le ta'a'alo a nei fanau sa auina atu i o latou tulaga sa lautogia mai ai fo'i i fafo, i le mae'a ai o le taumafanafana 2016. I se tala mai a le ali'i o Moses sa ia fa'apea ai, "O le vi'iga e fo'i i le Atua, o le malosi mai ia te ia, ma le tomai sa fa'aauala mai i nisi o taumafaiga sa fa'alautele ai le atamai i lea fo'i fa'agatama i le auina atu i fafo. Fa'afetai i le avaoa, ma e fa'afetaia ai le matou faia'oga Pati Pati, aua ana le seanoa lona iloa i le ta'aloga fa'atasi ai ma i matou lana 'au ta'a'alo, na te le toina mai avanoa lelei e fa'alautele ai le atamai, ma iloa ai ta'alo lelei. Fa'afetai fo'i i le tapua'iga a matua ma aiga, e le o mapu i talosaga ina ia foa'i mai e le Atua le malosi i le tino ae maise o le agaga e mafaia ai mea uma."

E pei o lenei ta'utinoga ua fa'ailoa mai e Samia, ana le fa'alautele mai le atamai i le malaga atu i fafo, a'oa'o ai i metotia tau le ta'aloga ma ala e fa'aleleia atili ai le ta'alo, e le ausia fo'i e le latou fo'i au ta'a'alo le malosi ua fa'atino ai le ta'aloga i lenei ta'amilosaga Football ua te'a atu.

O nei ali'i e to'alua o lo ua i ai nei i le vasega fa'ai'uaso i lenei tausaga, ua sailia fo'i avanoa lelei e mafai ona filifili ai i ni avanoa fa'asikolasipi e malaga atu ai ma fa'alautele le atamai i mataupu i potu a'oga, ae maise o le atamai i le Football ina ia fesoasoani i le totogia o a'oa'oga maualuluga mo ni fa'ailoga.

Sa fa'afetaia e Moses le All Poly Camp i Utah, "O le avanoa lena ua maua, sa matua tele se mea na matou maua mai ai. Iloa ta'alo va'ai, ta'alo ae ua e iloa fo'i matau atu aga a le sui o lo'o ta'alo fa'asaga mai ia te oe, ma na vala laiti e te mafaia ona fa'ase ese ai ma oe, ae sao mai ai lau taumafaiga e soso'o atu i le tasi e saogalemu ai le taumafaiga i le sikoa. E tatau lava ona maua uma e sui ta'a'alo i le tatou atunu'u ona maua avanoa faapenei e fa'aleleia atili ai le atamai i le ta'aloga."

"O avanoa nei sa matou o atu ai, fa'afetai tele ia Pati Pati, Galo Tuiolosega, Nofo Sualevai ma Keith, Faraimo Siuele ma le pule a'oga fo'i, aua o lo ua faalautele ma fa'aleleia le atamai ona o le avanoa sa maua, ma fa'aaoga tatau.”

Fa'afetaia fo'i e la'ua faapea ma sui uma sa latou malaga, le lagolagosua a le latou 'au atoa lava mai Samoana, "Lea ua i'u manuia le taumafaiga, o le malo uma lava o le tatou 'au fa'atasi ai ma tatou matua ma le 'au tapua'i mamalu ae maise le tatou laumua atoa sa gapatia i le fa'amalosi'au ia i tatou uma. Fa'afetai galulue ma taumafai fa'atasi i le loto e tasi ina ia maua le manumalo. A maua malo ona fa'amaulalo lea o le loto, ma fa'afetaia le Atua na mafua ai mea uma!"