Amata taeao nei le fa’amasinoga autu fa’asaga i se alii Faipisinisi

O le taeao nei lea ua faamoemoe e amata aloaia ai taualumaga o le fa’amasinoga iloilo i le va o le malo ma le ali’i Faipisinisi ia Mukesh Chand, lea o lo o tu’uaia i lona faia o uiga mataga i se tama’ita’i e 17 tausaga le matua i le ogatotonu o le tausaga nei.

O le itula e 9:00 i le taeao nei lea ua faatulaga e amata ai ona sailia vaega iloilo iuga latou te iloiloina se fa’aiuga o lenei mataupu, ma amata aloaia ai loa taualumaga o le mataupu i le aso Lua e sosoo ai ma fa’asolo atu ai lava seia oo i le fa’aiuga o le mataupu i le aso Faraile o le vaiaso nei.

O Chand o lo o tatalaina pea i tua ina ua mae’a ona ia totogi le tupe e $20,000 na fa’atulaga e le fa’amasinoga, e fa’atalitali ai le aso o lona fa’amasinoga autu.

O le vaiaso na te’a nei na fofogaina ai i luma o le afioga i le ali’i Fa’amasino ia Elvis P. Patea ni isi o faafinauga ma talosaga mai itu e lua o lenei mataupu, e tusa ai o fa’amatalaga ma mau faamaonia e tatau ona tuuina atu i luma o le vaega iloilo iuga i le vaiaso nei.

O se tasi o mataupu sa finauina e loia a itu e lua, o molimau o le a tuuina atu i luma o le vaega iloilo iuga. Na finau le malo i le fa’amasinoga mo sana poloaiga e taofi ai le itu tete’e mai lo latou fa’aaogaina o fa’amatalaga e fa’atatau i le olaga faiaiga i le va o le tamaitai o lo o a’afia ma isi alii, a o le i tula’i mai le mataupu e pei ona tu’uaia ai Chand, ina ne’i avea ia fa’amatalaga ma auala e aveese ai le aano autu o lenei fa’amasinoga.

Na finau le loia a le malo ia Woodrow Pengelly e fa’apea, o faamatalaga e pei ona maua mai e le itu tete’e i le tama’ita’i na a’afia, ina ua mae’a ona latou faatalatalanoaina o ia, e le fesootai ia ma fa’amatalaga e fa’atatau i le mataupu e pei ona tu’uaia ai Chand.

Ae na finau le itu tete’e e fa’apea, e taua tele fa’amatalaga e fa’atatau i le olaga tuai o le tama’ita’i o lo o a’afia i lenei mataupu, e fesoasoani ai i le sailiina o le mea moni i le mataupu lea ua i luma o le fa’amasinoga.

Na finau le itu tete’e e fa’apea, o tu’uaiga faasaga ia Chand na alia’e mai i le taimi ao i ai le tama’itai na a’afia i le fale a le ua molia. O le tama’ita’i na a’afia e uo ma le afafine a le ua molia.

O iina la lea o loo tu’uaia ai e le tama’ita’i na a’afia ia Chand sa ia faia ai ni uiga mataga ia te ia, e aofia ai le tagofie o ona itutinosa, ma oso ai lagona fefe ia te ia. Na finau atili le itu tete’e e fa’apea, o faamatalaga fou ua latou maua o loo taua ai le naunau o le tamaitai na aafia e alu ese mai le fale a le ua molia i le leva o le po, e fia alu e feiloa’i i lana uo tama, peita’i sa otegia e le ua molia ma le mafai ai ona alu ese o ia ma le fale.

O le faafinauga ua taoto atu nei i se faaiuga a le fa’amasinoga. Na pau le faafinauga na teena e le fa’amasinoga, o le taumafai lea o le malo e valaau se foma’i e avea ma a latou molimau, ina ia faamanino i le vaega iloilo iuga natura ma amioga o tagata e a’afia i faia o ituaiga solitulafono faapenei.

Na finau le itu tete’e e fa’apea, o le molimau lea ua sauni le malo e valaau, o le molimau na fa’atoa latou iloaina i le vaiaso na te’a nei, ma ua le mafai ai ona tapena le itu tete’e mo le sailia o ni fa’amatalaga e fa’afetaui ai faamatalaga o le a tuuina atu e lea molimau.

Na talia e Patea le talosaga a le itu tete’e, ma poloaina ai loa le malo e le fa’atagaina le valaauina o le latou molimau lea.