Molia se tagata faigaluega Ofisa o Aoga umia fualaau fa’asaina

Ua molia e le malo i le vaiaso na te’a nei se tagata faigaluega mai le Matagaluega o Aoga a le malo, ina ua maua i totonu o se afifi na fa’atuatusi mai i lona igoa vaega o le pauta fa’asaina o le aisa (methamphetamine).

E 3 moliaga mamafa ua molia ai e le malo le susuga a Sonny Tui. O ia moliaga e aofia ai lona umia fa’asolitulafono o vaega o le pauta fa’asaina o le aisa, o le moliaga o le umia faasolitulafono o le aisa ma le fa’amoemoe e tulei ma fa’atau atu i isi tagata, atoa ai ma lona taumafai e aumai faasolitulafono vaega o fualaau faasaina i le atunu’u.

O le aso Tofi o le vaiaso na te’a nei na tula’i ai Tui i luma o le Fa’amasinoga Fa’aitumalo mo le ulua’i taimi, ma ua toe fa’atulaga lana mataupu e toe fofogaina i le itula e 8:30 i le taeao nei i luma lava o le Fa’amasinoga Fa’aitumalo, mo le fa’atulagaina ai o le taimi ma le aso e faia ai lana iloiloga faapitoa.

Na teena e le afioga i le ali’i fa’amasino ia Fiti Sunia le talosaga a le loia a Tui ia Ryan Anderson, mo se avanoa e fa’aitiitia ai i le $20,000 le tupe e tatala ai le ua molia mai le aofaiga e $40,000 lea ua uma ona fa’atulaga e le malo.

Na taua e Anderson e fa’apea, o Tui o se tagata e nofomau lava i Amerika Samoa, ua tele tausaga o galue i lana galuega tumau o lo o i ai nei i le Ofisa o Aoga, e le o se tagata fo’i e masalomia lona sola ese ma le atunu’u.

Ae na finau le loia a le malo ia Christy Dunn e fa’apea, e le talitonu le malo i le faafinauga a le itu tete’e, ona o Tui ua leva ona aumau i fafo i Amerika, o lona aiga fo’i o lo o i ai i Amerika, ma e tele le avanoa e sola ese ai o ia.

E $40,000 le tupe lea ua fa’atulaga e totogi ona fa’atoa mafai lea ona tatala Tui i tua, i lalo o tuutuuga e tatau ona tuu atu i le itu a le malo ona pepa malaga e taofi ai, ina ia mautinoa ai na te le tuua le atunu’u. Ua faatonuina fo’i o ia ina ia auai i soo sana iloiloga pe afai ae tatala o ia i tua, ma ia aua ne’i ona toe taumafai e fa’afesootai molimau a le malo.

O le mataupu e pei ona tu’uaia ai Tui na alia’e mai i le aso Gafua o le vaiaso na te’a nei, ina ua alu o ia e piki mai lana afifi na aumai i le va’a meli i le malaeva’alele i Tafuna, ae tu’uaia le maua ai o aisa i totonu o le afifi.

Ina ua tatala e sui o le Ofisa o Tiute le afifi, sa latou maua ai i totonu o sipika, i totonu o le sipika na maua i ai vaega o le pauta oona o le aisa, lea e lata i le 7 aunese lona mamafa. Na faailoa e Tui i ofisa o le Tiute, o le afifi o lo o aumai ai le meaalofa a lona to’alua mo le kerisimasi.