Tala I Vaifanua

FA'AMALO KOVANA LOLO MOLIGA TAUSALA LALELEI O LE ATUMOTU PASEFIKA

O le aso ananafi na malele ai le fa'amanuiaga ma le fa'amalo a le afioga le Kovana sili i le Tausala Lalelei o le Atumotu o le Pasefika 2017 - Tausala Lalelei fo'i o Amerika Samoa; Matau'aina Gwendolyn To'omalatai, ona o lana taumafaiga ua fa'aea ai le atunu’u, talu mai le 15 tausaga a'o lea fa'ato'a toe maua lenei pale.

I lana tusitusiga fa’amalo ma faamanuia, na saunoa Lolo, “E le tu'umamaina e le Malo o Tutuila ma Manu'a lona aiaiuli ma fa'amalo i faiva o tausala lalelei e autova'a atu mo tausinioga fa'apenei i le tatou Alamoana, aua e fa'amata e faigofie, ae le fa'amaulaloina so'o se faiva e tausinio ai pelega a lo tatou Malo. O outou o fulu e mamae e aiaiuli ai le atunu'u ma fa'amemelo i lo outou tula'i mai oni fugala'au matagofie ma le manogi sasala e fa'afiafiaina ma teuteu ai lo tatou atun'u la'ititii i le atuvasa ma malo tetele i faiva fa'atauva fa'apenei."

"E ui ina fita le ala i le manumalo,  ae a outou tula'i mai ma le manumalo, e pati taoto lava Fe'epo ma fa'apea ane, fa'afetai i le Atua i lana fa'asoa mai i lo outou gapatia ma tausaili, a'o le tapua'iga fo'i e le avea a matua, aiga ma lo outou malo i lona lautelega."

Sa fa'aauau lana tusi, "Pe outou tula'i mai ua a'e manumalo, o se fa'ailo lea sa outou tapena fa'afafine to'aga i mea uma, e le'i va'ai maulalo fo'i i so'o se vaipanoa o le tapenaga, lele ua malele lau ti'a, fa'afetai ua mapuea fo'i lou atunu'u ma sa'a i ma'a o malie. O lou manumalo, o le manumalo fo'i lena a lou malo!”

Ua fa'atasi atu nei le Tausala Lalelei o le Pasefika e fa'atino ona tiute fa'ale-atuvasa, e auai i le Fa'atasiga o Ta'aloga a le Pasefika i Vanuatu.

I ana toe upu sa ia fa'amanuia atu ai, "Tau ina ia avea lou tula'i mai i lenei tofi taua, ia mafai ona tatala ai nisi avanoa lelei mo le tatou Malo e atina'e ma tupu tele ai so tatou manuia fa'atasi ma isi atumotu uma o le tatou atuvasa, ma ia avea fo'i lenei avanoa matagofie e fa'atuputeleina ai lou iloa, lou atamai ma lou fiafia i lenei suiga tele olou olaga talavou, ua e aga atu i ai!"

Fa'ato'a taliu mai o ia fa'atasi ma le aumalaga a Amerika Samoa i ta'aloga a le Pasefika i le fa'aiuga o lenei vaiaso.

POLOKALAMA KERISIMASI - AOGA MANULELE TAUSALA

O le aso Tofi na laei uma ai e le vasega o Faia'oga, Fanau Aoga, fa'atasi ai ma le Pulega o le A'oga Tulaga Muamua a le Manulele Tausala la'ei papa'e, ae faatino le polokalama fa'ataoto e fa'amanuia ai le Kerisimasi i le mamalu o matua ma le PTA sa auai e maimoaina latou fa'afiafiaga.

Mai le Level K4 & K5 se'ia o'o i le Level 8, fa'apea ma le SPED, sa fa'atino le polokalama ua mae'a fa'ataoto mo vasega ta'itasi.

O le skid i le amataga, tauloto, pesega o le Kerisimasi ma le Taualuga.

Mai le vaiaso atoa, sa amata ai ona la'ei mai lanu eseese ua patino lava i lenei vaitau o le Kerisimasi. O le lanumoana sa la'eia i le aso Gafua, ona soso'o lea ma le lanu meamata, ae o'o ane i le aso Lulu ua lanu mumu, ae aso tofi ua lanu pa'epa'e, ua foliga mai o le Lotu a Tamaiti ua toe o'o mai.

I le latou folasaga sa matua mata'ina le fa'afiafiaga a le vasega Level K4 po'o le ECE lea e to'a 34 i latou o lo'o aofia ai.

E ui ina foliga mai ua le toe usita'i le fanau i faia'oga ona o lo ua fa'atasi atu latou tina, ae na matua sasa'a fo'i le fafao a matua ma foa'i le tupe latou aua le Kerisimasi mulimuli a le fanau i le aso. E $180. le mea aofai o le lima foa'i o matua o lenei to'a 34 i le toe fiafia o le tausaga.

Soso'o mai loa le Level K5 tatala pusa o pesega matagofie matua liu suavaia ai fo'i ma lagona o matua fa'aova le foa'i ma maua ai le $220+mai le fola ma meaalofa foa'i i le laulau.

O le fa'afiafiaga a le Vasega o Tamaiti e i ai mana'oga fa'apitoa sa soso'o ai, na matua maofa ai le to'atele i le matagofie o le pesega e le fanau e tauaso e to'atolu o lo'o a'oa'oina fa'apitoa i Manulele Tausala. O le vi'iga na latou solo ta'itoatasi ai i ona fuaiupu ae usu faatasi le tali, "Le Po Pa'ia!"

Matagofie le tapenaga a nai faia'oga i mea uma sa fa'atulaga, ma e iloga fo'i le matagofie o tauloto a vasega ta'itasi. Ua matauina e maua lelei o le tauloto a le vasega 1, matagofie le fetalia'i e tamaiti o le Isaia 5:9.

Na fa'asolo lava se'ia o'o i le vasega 8 ua amata fo'i ona va'aia ituaiga faafiafiaga ua masani ai tatou, peita'i sa faia lava ele fanau le mea sili e fa'afiafiaina o latou matua ma tali atu ai fo'i i Faia'oga i lo latou tautiga e a'oa'o i latou.

O le toe aso o a'oga o le aso, Tesema 15, 2017 ae fa'ato'a toe a'e mai i le aso Ianuari 3, 2018.

TAPUNIA OFISA KONESULA SAMOA TESEMA 22, 2017 - IANUARI 02, 2018

Ua fa'alauiloa o le a tapunia le Ofisa o le Konesula Samoa i le teritori nei i le taimi o aso fiafia.

Ona o pemita e ao ina ulufale ai tagatanu'u o Amerika Samoa i Samoa e ao lava ina talosagaina i lea Ofisa, ua fa'alauiloa aloa'ia ai lenei taimi e tapunia ai le auaunaga iinei, peita'i ua fa'ailoa mai fo'i, e i ai lava le avanoa e fa'aaoga mai ai le Ofisa i Samoa pe afai o le a mana'omia ona malaga se tasi i Samoa i lea vaitau ao tapunia lea Ofisa.

Ua mafai i le taimi nei ona tapena mamao le talosagaina o sou pemita pe afai o fuafua e fai Kerisimasi po'o le Tausaga fou i Samoa.

Afai ae fa'ato'a tutupu ni mafuaga tatau e ala ai ona toe malaga fa'afuase'i se tasi i Samoa e ao ina talosaga se pemita, o numera telefoni i Samoa ma le sui mamalu e talanoa sa'o i ai mo se pemita: To'alepai Valhalla Siaopo Pese - 685-771-2166, po'o Tailaoa Falaniko Lesa 685-777-4504.

O le isi fuafuaga ua fa'alauiloa mai, ua suia le taimi e tatala ma tapunia ai le Ofisa e afua mai i le aso muamua o Tesema se'ia o'o atu i le aso 22, Tesema, 2017. Sa masani ona tapunia i le 3:00 i le afiafi, peita'i o le a tapunia nei i le itula e 3:30 i le afiafi ina ia mafai ona talosaga ai pemita e fa'atatau i le taimi lea e tapunia a'ia'i ai lea Ofisa mai ia Tesema 22, 2017  se'ia o'o ia  Ianuari 02, 2018.

FAIAINA FA'ALUA AMERIKA SAMOA TA'ALOGA BASKETBALL 3X3 VANUATU

E ese mai le matagofie o le manumalo o le tatou 'au Basketball 3X3 lea sa masi'i atu i Vanuatu i sailiga siamupini a le Pacific Mini Games, ua faia'ina fa'alua nei talu mai ona mae'a ona manumalo i le 'au a Fiti, lea na malolo ia i latou i 'ai e 10 i le 6.

O latou ta'aloga na mulimuli mai na fetaui ai ma CNMI ma sa malo ai CNMI i le latou 'ai e 18-5 a Amerika Samoa. Soso'o lea ma le latou ta'aloga fo'i ma Solomon Islands ma malo ai fo'i Solomona i 'ai e 12-11. Peita'i ua fa'ailoa mai, toe lua lava ni malo o Amerika Samoa mautinoa e ulu atu i le ta'aloga to'afa maualuga i lenei ta'amilosaga.

Tatou tapua'ia faiva o le fanau, tau ina alofagia fa'aauau le malosi ma la tomai i le fa'agatama ia maua ni tatou malo se lua, e mautinoa ai se tatou pine i lea fo'i fa'agatama.