Faila e le malo moliaga fa’aopoopo fa’asaga i le ave ta’avale

O le vaiaso nei lea na faila ai e le malo a latou moliaga faaopoopo faasaga i le ali’i ave ta’avale o le ta’avale lea o lo o tu’uaia na manunu’a ai ni tagata se to’alua i Pago Pago i le vaiaso na te’a nei, ma i’u ina taofia ai se Tina ma se ali’i i le falema’i ona o manu’a i o la tino.

O moliaga faaopoopo ua faila fa’asaga ia Falaniko Fetoai e aofia ai le moliaga mamafa o le fa’ao’olima i le tulaga lua, atoa ai ma le moliaga mama o le faaoolima i le tulaga tolu. O lo o i ai fa’atasi ma ulua’i moliaga sa tu’uaia ai lenei ali’i, lea e aofia ai le moliaga o le fa’atupu vevesi i nofoaga faitele, fa’apea ai ma pepa sala i lona le usisita o tulafono o le alatele.

O le aso 5 Ianuari 2018 lea ua faatulaga e toe tula’i ai le ua molia i luma o le Fa’amasinoga Maualuga, i le mae’a ai lea o lona teena o tu’uaiga fa’asaga ia te ia i le aso Lulu na te’a nei. E $3,000 le tinoitupe lea ua fa’atulaga e le Fa’amasinoga e totogi ona fa’atoa mafai lea ona tatala Fetoai i tua e fa’atali ai taualumaga o lana fa’amasinoga.

E to’atele molimau na fesiligia e le malo e tusa ai o se fa’alavelave na tula’i mai i Pago Pago i le po o le aso 28 Novema pe tusa o le 7:30 i le afiafi, o le tau sailia o fa’amatalaga e uiga i le fa’alavelave sa tula’i mai.

O se ali’i Leoleo sa ofu savili i le taimi na tula’i mai ai le fa’alavelave, na ia fa’afesootaiina le Ofisa o Leoleo i Fagatogo mo se fesoasoani, ina ua pasi atu lana ta’avale ma lona aiga ae vaaia ai le tumu tumu o tagata i luma o le fale o le au aiga o Foster i Pago Pago na tula’i mai ai le fa’alavelave.

Na taua e le ali’i Leoleo ofu savili i Leoleo lona vaaia o le taimi na solomuli saoasaoa ai e le ave ta’avale lana ta’avale, ma aga’i ese atu ai loa i se saoasaoa uiga ese, ae o le taimi lea o loo ia fa’alogoina ai leo o tagata o lo o feei ma fetagisi. Na taua e le ali’i leoleo ofu savili lona iloaina lelei o le tagata sa ia aveina le ta’avale, o ia lea o “Niko” poo Falaniko Fetoai foi e pei ona taua i le pepa molimau a le malo.

O le isi molimau sa ia faamatala i Leoleo le vaaiga na ia molimauina, i le taimi na oso ai le ua molia i totonu o lana ta’avale ma fa’aola, ma fa’afuase’i ai ona alu atu ma so’a lona tausoga tama’ita’i na lavea, ma aga’i ese atu ai i se saoasaoa uiga ese i le itu i Sasa’e.

Ae o le isi molimau sa ia taua le taimi na ia vaaia ai le aga’i atu o le ta’avale a le ua molia, ma taia ai ni isi o lona aiga sa tutu mai i le isi itu, ona fa’aauau ai lava lea ona alu ese atu o lana ta’avale e lei toe tu.

Na taunu’u Leoleo pe tusa o le 10 minute talu ona tuana’i le fa’alavelave, ma latou vaaia ai se tama’ita’i o loo ta’atia, lea na mulimuli ane iloa, o ia e to’alua ai tagata o loo tuuaia na lavevea i le ta’avale.

Na aga’i atu Leoleo i le fale a le ua molia i Leloaloa ma fa’atalatalanoa o ia e uiga i le fa’alavelave na tula’i mai, ma i’u ina taofia fa’apagota ai loa o ia i le po lava lea. Na taua e Leoleo lo latou fa’alogoina o le manogi ‘ava malosi mai le tino o le ua moila.

O le Tina sa manu’a na taofia o ia i le potu e faia ai togafitiga i le falema’i i Fagaalu. Na taua e ni isi o lona aiga i le Samoa News, o le vaiaso nei na te’a ai o ia i tua mai le falema’i.