Talosaga le ali’i solitulafono e fa’afo’i o ia i Samoa

O le ali’i e 24 tausaga le matua mai Samoa lea na ulufale mai i se pemita e 30 aso ma nofo fa’asolitulafono ai lava i le atunu’u, ua ia talosaga i le Fa’amasinoga Maualuga ina ia toe fa’afo’i o ia i Samoa, ona e le o i ai sona I.D e fa’ataga ai o ia ona nofo i le atunu’u.

Ae na fa’amanino i ai e le afioga i le ali’i Fa’amasino Sili lagolago le tumau ia Elvis P. Patea ia Ashley Afamasaga, e le mafai ona vave fa’afoia o ia i lona atunu’u, se’i vagana ua tuli muamua lana fa’asalaga e mafua mai i le solitulafono lea ua ta’usala ai o ia e le Fa’amasinoga a le malo o Amerika Samoa, i lona faia lea o ni uiga mataga i se teineititi e 15 tausaga le matua.

Na ulua’i tu’uaia e le malo le ali’i o Afamasaga i moliaga mamafa e 8, lea e aofia ai moliaga e 2 o lona fai’aiga fa’amalosi i se teineititi laititi; 2 moliaga o lona faia o amioga faasotoma i se teineititi, fa’apea ai ma moliaga e 4 o lona tagofia lea o itutinosa o se teineititi.

Ae i lalo o se maliliega na sainia e Afamasaga ma le malo, lea fo’i na talia e le Fa’amasinoga Maualuga, ua malie ai le ua molia e tali ioe i moliaga e lua, ae solofua e le malo moliaga e 6 o lo o totoe ai i le pepa o tagi sa latou fa’aulu fa’asaga i le ua molia.

O moliaga mamafa e 2 lea ua tali ioe i ai Afamasaga, o moliaga o lona tagofia lea o itutinosa o se teineititi, o se solitulafono D lea i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, poo le fa’asala i le salatupe e le silia i le $5,000, poo le fa’asala fo’i i fa’asalaga uma ia e lua.

I le talia ai e le fa’amasinoga maualuga o le tali ioe a Afamasaga, na aloaia ai loa le solofua o moliaga e 6 o lo o totoe ai i le pepa o le tagi sa fa’aulu, lea e aofia ai moliaga pito sili na mamafa e lua o le fai’aiga fa’amalosi ma se teineititi e laititi i lalo o le tulafono, lea e mafai ona fa’asala ai se tasi i le toese mai le 5 tausaga e o o atu i le 15 tausaga.

I le tali ioe ai o Afamasaga i moliaga e pei ona ta’usala ai o ia e le fa’amasinoga maualuga, sa ia ta’utino ai e fa’apea, i se taimi o le aso 24 Mati e oo atu i le aso 24 Aokuso o le tausaga nei, sa ia faia ai ni uiga mataga i se teineititi e 15 tausaga le matua. O ia uiga mataga e aofia ai lona tagofia o ona itutinosa, pule i lona tino, atoa ai ma le feusua’i ma ia i se auala fa’asolitulafono.

Na ta’utino le ua molia e fa’apea, o lana gaioiga sa faia i lea aso, sa le tusa lea ma ala o le tulafono, ae na mafua ona ia faia, ona o le manatu e fa’amalie ai ona lagona tu’inanau na oso ane i lea taimi.

Ina ua fesili le afioga i le ali’i Fa’amasino ia Afamasaga pe ua malamalama i ona aia tatau atoa ai ma lana tali ioe ua tuuina atu i le Fa’amasinoga, na tali le ua molia e fa’apea, ua ia malamalama, peita’i o le fa’afitauli o lo o i ai, e le o i ai sona I.D mai le Ofisa o Femalagaaiga e fa’ataga ai ona nofo pea o ia i Amerika Samoa, ma ua tatau fo’i ona toe fa’afo’i o ia i lona atunu’u.

Ae na fa’amanino i ai e Patea e fa’apea, afai o lea ua ta’usala o ia e le fa’amasinoga i lana solitulafono sa faia, e tatau lava ona fa’atali se fa’aiuga e tuuina atu e le fa’amasinoga, e aofia ai se fa’asalaga talafeagai e tusa ai o lana solitulafono, tusa lava pe i ai sona I.D pe leai, e ta’usala lava o ia e le fa’amasinoga.

Ua toe taofia nei i le falepuipui le ali’i o Afamasaga e fa’atali ai le aso 21 Tesema lea ua fa’atulaga e lau ai lana fa’asalaga.