Tala I Vaifanua

MATAFAO ELEMENTARY FOA'I MO AIGA MOTUSIA GALUEGA

O le fa'ataua a Matafao Elementary i lenei Aso Fa'afetai, ua fa'atino lea i le foa'i mo Aiga uma o fanau a'oga i Matafao o lo'o a'afia o latou aiga i le motusia o galuega i le StarKist Samoa lea sa galulue ai latou matua.

E to'a 130 fanau i totonu o lea Laumua, peita'i ina ia tofusia lelei i le fa'asoa i le aotelega o mea uma sa taua'aoina e le fanau a'oga mai le Level K5 e o'o i le Level 8, ua toe taga'i toto'a le vasega o le Komiti Fa'afoe o le Social Studies i le aofai o aiga ta'itasi e o mai ai nei fanau.

"Ua le faia se fa'aaliga tele e pei ona masani ai isi a'oga tulaga muamua i lenei tausaga mo le aso Fa'afetai, peita'i, ua le manatu i matou ina ia fa'amaumauina atoa le aso o fanau i lena faiga, ae ua tuu tasi i le Komiti o le Social Studies latou te fa'atinoa le tu'ufa'atasiga o mea uma ua taua'ao e le fanau aoga, ona fa'avasega ai fo'i lea o fa'amomoli alofa i nai aiga o lo'o a'afia i le motusia o galuega,” o se finagalo fa'aalia lea o le tama'ita'i pule a'oga Dr. Tino Roberts.

“Ua taumafai pea e ave le fa'amuamua i a'oa'oga a le fanau i potu a'oga, ia fa'aleleia atili togi o le fanau, ae ia maua fo'i e i latou uma le agaga fa'afetai i lenei tausaga, lea e ala i le latou foa'i ma le loto alofa i nai aiga o pagatia le fa'asoa ona o le motusia o galuega.”

O i latou ua aofia i lenei tu'ufa'atasiga o le foa'i e aofia ai le tama'ita'i Taitaifono o le Social Studies: Sootaga Tua'au, Faufautua o le Komiti: Aitofu Lomu, Failautusi Fa'aui Vaitautolu, ma sui iloga uma lava e aofia ai: Tupou, Jewel, Gina, Maryangie, Eleni, Vinnie ma Anne Posala.

FOA'I FAGAITUA JROTC TAGATA MOTUSIA GALUEGA

Ua mae'a ona taua'ao le tele o foa'i na fa'atautaia e le Vasega o Faia'oga a le Polokalama JROTC i Fagaitua High mai le aotelega o afio'aga i le Falelima i sasa'e. Ina ua tu'ufa'atasia foa'i i le lua vaiaso ua te'a i le malae o le Suiagaula a le Atuvasa i Utulei, sa le'i tu'ufa'atasia i ai ma lea sao mai le itu i sasa'e o le motu.

Lea ua fa'ailoa mai o lea sao, mo le "Alofa i lou tuaoi” o lo'o fa'atautaia e le susuga Tapumanaia Galu Satele Jr, na fa'afeso'ota'ia e Sgt Fiso, ma latou fa'ailoa ane ai, "O le Love Thy Neighbor" o le a avea ma fa'alapotopotoga e auina atu i ai le latou sao mo lenei Aso Fa'afetai, e fa'auia atu ai fesaosoani i aiga uma o motusia galuega i lenei vaitau."

E le gata la i le sao mai le falelima i sasa'e lea na saunia mai e Faia'oga uma o le JROTC Fagaitua, ae ua tu'ufa'atasia fo'i ma isi meaalofa na tuai ona fa'ao'o mai ona sa fa'alavelavetia nisi o fa'alapotopotoga ma Ekalesia i le aso na atofa mo le taua'aoina atu o foa'i muamua a le "ALofa i Lou Tuaoi".

Ua aofia i lenei tu'ufa'atasiga o le Ekalesia Aso Fitu, ona sa auai i latou i sauniga o le Sapati i le aso na tu'ufaatasia ai le isi meaalofa muamua, o le isi vaega o le to'a 50 Tagata Faigaluega a le Talofa Samoa, le sao o le Vasega Political Science, le vasega Social Science ma le Vasega History a le tatou Kolisi Tu'ufa'atasi o Amerika Samoa.

Ua fa'ailoa mai o le anoanoa'i o mea'ai tu'uapa, ma le tele o ituaiga mea e gaosia ai mea taumafa, o fa'atasi ai mea mata na foa'ia mai e nisi o aiga faifa'ato'aga.

"O le fa'afetai e fa'afo'i i le Atua atoa ma so'o se tasi na foa'i i le alofa i e o pagatia ona ua motusia galuega sa maua ai le tamaoaiga tausi o latou aiga i lenei vaitau o le tausaga,” o se tala lea a Tapumanaia.

LAVEA LIMA AVELOLI PUSA OLOA LUGA O LE UAFU

Ua fa'ailoa mai o lo'o taoto i le falema'i o le LBJ i Faga'alu se tasi o aveloli Pusa Oloa tetele a le Peter Reid Stevedoring ina ua afaina lona alofilima ua pa'u tonu i ai le Pusa Oloa tele, [container] ona ua vave ona tu'u atu e le ave lifi le pusaoloa i luga o lana loli toso pusa oloa.

Ua mae'a ona va'aia e le ali'i foma'i o Dr Ladua le lima o lenei sui, ma ua fa'ailoa mai, "E mafai ona toe fa'aleleia lona lima matua ma le lima tusi o lo'o manu'a i le esikegi. E mafai lava ona toe fa'aleleia  ivi uma aua e toe tupu lelei lava, ae o le taotoga afai e mana'omia se auai o se tasi o ali'i fomai fa'apitoa o le ponaivi lea e malaga mai i Shriners, ua fa'afetai fo'i le auai mai i le fa'aiuga o lenei vaiaso."

O le fa'alavelave na tupu i le aoauli o le aso Lua, ma sa molimauina fo'i e sui o le Samoa News, le tele o le pa'o i le taimi tonu na tupu ai lea esikegi.

“Ua le va'ai mai fo'i le ali'i ave lifi ia te a'u, ua vave ona ia tu'uina i lalo le pusa oloa, ae le'i avatua la'u fa'ailo ua lelei mea uma i la'u loli. Fa'afetai e le o tele se afaina o lo'u lima, ae ua tele fo'i le toto masa'a ma le tiga o ivi. O lea ua fa'ailoa mai e toe mafai ona fa'aleleia, e fa'afetaia ai lea tulaga! O aga lava o le galuega,” o se tala lea a le sui na manu’a i lona aiga sa auai atu ia te ia i le falema'i.

Ua mae'a asia fo'i e le ali'i pule sili o le Kamupani le sui ua afaina, ma ua fa'ailoa ia te ia, o lo'o lelei mea uma e tausia ai o ia i le falema'i fa'atasi ma lona aiga ona ua fa'amanu'alia a'o faia tiute e ao ina fa'atino.

Afai na fa'ataunu'u i le aso Lulu ona faia le taotoga o le a'ao o lea sui, ua fa'ailoa mai e Dr. Ladua, "E mafai lava ona te'a i tua i le aso Gafua, pe a sologa lelei lona taotoga. Ae lelei fo'i o le a asia lava e i latou ma foma'i Shriners le taotoga na faia mo se latou tala mai, po'o atoatoa ona lelei."