E LE O OE O SE SULI MONI

Vaega 95

Na ona taunu’u atu lava o le ta’avale i luma tonu o le faitoto’a tele lea e ulufale atu ai ta’avale, ona vaaia loa lea o se ali’i Leoleo talavou ua savali mai ma tu i tafatafa o le faitoto’a o le ave ta’avale, ona vili lea e le tamaloa o Meki o le fa’amalama o lana faitoto’a i lalo, ae fa’atalofa atu i le ali’i Leoleo, lea o lo o tu mai i ona tafatafa ma ona foliga fiafia. “Talofa lava, e mafai ona tuu mai la outou tusli valaaulia fa’amolemole,” o le talosaga ane lea a le ali’i Leoleo ia Meki, ona aapa atu lea o Meki ma aumai le tusi valaaulia o loo ta’atia i ona luma ma tu’u atu i le Leoleo. O le taimi lava na tilotilo ai le Leoleo i le tusi valaaulia, na vaaia ai e le aiga le suia o ona foliga, e foliga mai ua i ai se mea ua fa’ateia ai o ia. Na ona uma lava ona faitau e le ali’i Leoleo o le tusi valaaulia, ma ia tau atu ai i le igoa o Ianeta, ona ia valaau loa lea i isi ona soa o loo i totonu o le Ofisa ina ia sauni mo le tula’i fa’aaloalo. I lona si’ufofoga lemu ma le fa’aaloalo, sa ia talosaga atu ai ia Meki ina ia aga’i atu lana ta’avale e paka i luma tonu lava o le Ofisa o Leoleo o loo tumau mai i le isi itu o le lotoa e le mamao. “Fa’amolemole lava lau susuga, e i ai se mea ua fa’aletonu i le matou ta’avale,” o le fesili fia iloa lea a Meki, ae sa na o le ata o le ali’i Leoleo ma fa’apea mai, “Lau susuga, e leai, o loo lelei mea uma, ae fa’amolemole lava, avatu loa lau ta’avale e paka mai i le vaega e pei ona fa’ailoa atu,” e fai lava tala a le Leoleo ma savali aga’i atu i le isi itu o le lotoa ma tu mai ai. Na ona uma lava ona paka o le ta’avale a le aiga, ae fetaui ma le tau fai tofu o Leoleo ma faitoto’a o le ta’avale ma tatala, ona vaaia lea o le ulufafo mai o le ulugali’i ma le tama’ita’i o Ianeta. “Fa’afetai lava mo le auaunaga, ua lagona fo’i lota fa’aaloalogia i lenei aso,” e fai lava tala a Ianeta ma ata, ae o ali’i Leoleo i le taimi lea, e leai se isi e ata, ae ua na o le tutu fa’amalo ma fa’atali se isi fa’atonuga e tu’uina atu e le tamaloa o Meki.

“Fa’amolemole, o matou e fia aga’i atu i le vaega lea o loo fa’ataunu’u ai la matou feiloaiga ma le aiga o Laneselota,” o le musumusu atu lea a le tamaloa o Meki i le ail’i Leoleo o loo pito atu i ona tafatafa, ae o le Leoleo i le taimi lea, ua ata ma musumusu atu fo’i ia Meki, “Afai o lou finagalo lea, o le a tatou aga’i sa’o atu loa i le vaega o lo o fa’atali mai ai Laneselota ma lona aigaa.” Ua aga’i atu le aiga i totonu o le pito i luma o le fale’aiga tele lenei. O se vaaiga na matua maofa ai le ulugali’i aemaise ai fo’i o le teineititi o Ianeta, i le matagofie ma le felanulanua’i o ma’a taua eseese o loo fausia ai lenei faleaiga tele. E fai o le to’atele o tagata faigaluega ae o le to’atele fo’i o Leoleo o lo o tiute solo ai. O le tosina o le vaai a le tama’ita’i o Ianeta i se tasi o fugalaau matagofie lava o loo matala mai lona fua i le tulimanu o le pa laau, na mafua ai loa ona ia fai i lona Tina e fa’atali atu, ae se’i tamo’e e matamata i le fugalaau lea. E tamo’e le tama’ita’i ae vaaia ai fo’i le tamomo’e o Leoleo e to’a fa sa latou fa’afeoaina atu o ia. O Meki ma Lucy i le taimi lea, ua na o le tutu ma maofa i le auala lea o loo auauna atu ai Leoleo nei ia tei latou.

O le fia malamalama tele o Meki i le mafua’aga ua ala ai ona auauna atu Leoleo nei ia tei latou, na mafua ai ona ia musumusu atu i le ali’i Leoleo o loo tu fa’amalo i ona tafatafa, “O le a le uiga o lenei auaunaga ua outou faia mo a’u ma lo’u aiga, ae le o i matou o ni tagata taualoa, o i maua ma si a maua tama, ua na o ni tagata fa’atauva’a lava e le taualoa.” Na ata le Leoleo ona ia musumusu atu lea i le tamaloa o Meki ma fai atu i ai, “Vaai oe Tama, o le fa’atonuga sa tuuina mai e lo matou ta’ita’i, ia matou faia soo se mea e finagalo i ai Ianeta ma ona matua pe afai ae taunu’u mai i le lotoa, ma ia ofo atu ia tei latou le auaunaga pito sili ona maualuga.” E fetaui le mae’a atu o le tala a le Leoleo ia Meki, ae vaaia loa le toe fo’i mai o le tama’ita’i o Ianeta ma le fugalaau ua uma ona ia tauina mai, ma latou aga’i atu loa i totonu o le nofoaga e faia ai le taligasua tele.