Fautuaina Ofisa malo ina ia fa’amalosi tulafono o le Fa’alapisi

Ua fautuaina e le afioga i le ali’i Kovana ia Lolo Matalasi Moliga, ofisa eseese a le malo o lo o galulue e fa’amalosia le tulafono o le Fa’alapisi, ina ia fa’amaoni i le fa’atinoina o latou tiute, e ala i le fa’asala o i latou e maua o lo o soli le tulafono.

Na taua e le Kovana i le fonotaga a le Kapeneta i le masina na te’a nei e fa’apea, ua maitauina le fa’atupulaia o le fa’a lapisi i totonu o le atunu’u, ae foliga mai e le o galulue ofisa o le malo e fa’amalosi le tulafono.

Mo se fa’ata’ita’iga e pei ona taua e Lolo, o le tele o taimi e alu ai ana asiasiga fa’ata’amilo i le atunu’u, na te molimauina ai le tele o kalone lapisi o lo o i luma o ni isi o faleoloa, e le gata ua tumu ae ua paepae solo fo’i lapisi i lalo, ona o atu lea o ta’ifau ma toso solo lapisi nei, ma avea ai ma itu e mataga ai i le vaavaai a tagata.

E le gata i kalone lapisi i faleoloa, ae ua oo lava fo’i i ni isi o afioga i le atunu’u, ua matua maitauina lava le vaoa ma faulala’i ai le tele o lapisi, ae leai lava ni galuega a Pulenu’u o faia i ai.

“O le fautuaga mo Ofisa uma a le malo ua tuu atu i ai le malosi e fa’atino ai le tulafono, ua tatau ona vaaia se suiga i le atunu’u talu ona pasia lenei tulafono, ae foliga mai e le o i ai lava se suiga o tula’i mai, ae ua fa’ateteleina ai le fa’aotaota o tagata, afai fo’i e le o galulue Pulenu’u e fa’atino a latou tiute, ave i ai ni sala i Pulenu’u,” o le saunoaga lea a le ali’i kovana.

O le masina na te’a nei na malaga atu ai le ali’i kovana mo fonotaga i Amerika, ma le fa’amoemoe e toe taliu mai i le atunu’u i le fa’aiuga o le vaiaso nei.

Na fa’amanino e le Loia Sili ia Talauega Eleasalo Ale i luma o le Kapeneta e fa’apea, ua leva ona i ai le tulafono, ma ua amata fa’amalosia fo’i e le malo. O Ofisa uma lava o lo o tu’u atu i ai le malosi latou te fa’amalosia ai le tulafono, ua amata ona galulue i latou, ma ua i ai fo’i tagata ua mae’a ona fa’asala e le Fa’amasinoga Fa’aitumalo, i le mae’a ai lea ona fa’amaonia o lo latou le usitaia o le tulafono e fa’asa ai le fa’aotaota i totonu o le atunu’u.

O se tasi o itu sa maitauina o lo o tula’i mai ai si fa’aletonu laititi i le fa’amalosia o le tulafono, o le leai lea o ni tusi e mafai ai ona fai pepa sala mo tagata solitulafono (ticket book).

Na taua e le Faatonusili o le Ofisa o le Puipuiga o le Siosiomaga (AS-EPA), susuga Ameko Pato, o lo lo o fa’atali le tusi lisiti fou lea ua mae’a ona tuuina atu i le Faamasinoga Faaitumalo le talosaga mo le okaina mai, ona o iina lea e aumai ai le fa’asoasoaina o api.

O le isi laasaga lea ua fuafua le kovana ma le malo e tatau ona toe fa’atinoina, o le toe fa’aauauina lea o aoaoga mo Pulenu’u atoa ai ma tagata faigaluega o Ofisa o lo o faia le galuega, ina ia toe faamanatu ma faamasani i latou i le auala e fa’atinoina ai le galuega.

Saunoa le ali’i kovana e fa’apea, afai e fa’atalale le malo i le fa’atinoina o lana pito laau, tusa lava pe pasia tulafono, e tumau pea le fa’afitauli o le fa’aotaota i totonu o le atunu’u, ona e le o i ai se malosi e mafai ai ona unaia tagata e taofia ai le faalapisi.