Tala otooto mai le Fa’amasinoga

TETE’E SE FAFINE I TU’UAIGA O LE GAOI

O le aso 29 Tesema lea ua fa’atulaga e faia ai le ulua’i iloiloga o le mataupu o lo o tu’uaia ai se Tina i le moliaga o le gaoi, i le mae’a ai lea ona ia teena i tu’uaiga a le malo fa’asaga ia te ia i luma o le Fa’amasinoga Maualuga i le vaiaso na te’a nei.

O lo o tu’uaia e le malo ia Oketi Polevia i le moliaga mamafa e tasi o le gaoi, o se solitulafono C i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

O le ali’i loia fautua ia Michael White lea o lo o tula’i mo Polevia, na fa’aleoina le tali tete’e a le ua molia i luma o le Fa’amasinoga Maualuga, ina ua tula’i i le vaiaso na te’a nei mo lana ulua’i iloiloga.

O le moliaga e pei ona tu’uaia ai Polevia, na afua mai i se fa’alavelave na alia’e mai i ni nai masina e le i mamao atu, lea o lo o tu’uaia ai o ia e le malo i lona gaoia mai o ni oloa mai se faleoloa ma le fa’amoemoe e fa’aaoga mo ia lava.

E pei ona taua e le malo i le latou tagi, e silia i le $1,000 le tau aofa’i o oloa sa gaoia mai le faleoloa na a’afia, o le vaega tupe fo’i lea o lo o fa’amoemoe le malo e finau i le fa’amasinoga ina ia toe totogi e le ua molia, pe afai ae taunu’u atu lana mataupu i le fa’aiuga.

E $5,000 le aofa’i o le tupe na fa’atulaga e le afioga i le ali’i Fa’amasino ia Fiti Sunia e tatala ai i tua Polevia, ae i le mae’a ai o le fa’amasinoga i le talosaga a le ali’i loia fautua ia Ryan Nelson, lea sa avea ma loia a Polevia i luma o le fa’amasinoga fa’aitumalo, na faia ai loa e le afioga a Sunia le fa’aiuga ina ia fa’aitiitia le tupe e tatala ai le ua molia i le $2,500.

O se tasi o itu na fa’amamafa e Nelson i lana talosaga, o le mana’omia lea o Polevia i lona aiga mo le fa’asusuina o lana pepe o lo o i ai. Na taua e le ali’i loia e fa’apea, talu lava ona taofia Polevia i le toese, o lo o fa’aauau pea ona faia e le Tama o le aiga le galuega matua, o le pu’e o le pasi e o ai ma le pepe i le falepuipui ina ia fafaga ma fa’asusu e lona Tina.

O lo o taofia pea Polevia i le toese i Tafuna i le taimi nei, ina ua le mafai ona ia totogiina le $2,500 na fa’atulaga e le fa’amasinoga. Ae afai e mafai ona tatala o ia i tua, ua matua fa’asa o ia ona toe tuvae i le faleoloa na a’afia i lana solitulafono, le faleoloa o le Vaiala Store.

IOE LE ALI’I INISINIA I ONA MOLIAGA

O le ali’i Inisinia lea na tu’uaia e le malo i lona sainia fa’agaoi o se siaki a se faleoloa e aunoa ma se fa’atanaga a le Pule o le faleoloa, sosoo ai ma lona sola ina ua aga’i atu Leoleo e pu’e fa’apagota o ia, ua ia ta’utino i luma o le Fa’amasinoga Maualuga i le vaiaso na te’a nei, e moni ma fa’amaoni tu’uaiga uma fa’asaga ia te ia.

E 2 tagi na fa’aulu e le malo fa’asaga i le ali’i o Suauupaia Amituana’i. I le tagi muamua, sa tu’uaia ai o ia i moliaga mamafa e 3 e aofia ai le gaoi, faia o fa’amaumauga tau fa’asese, atoa ai ma le faia o fa’amaumauga tau fa’avalea.

I le tagi lona lua, na tu’uaia ai o ia i moliaga mamafa e 2 e aofia ai le taumafai e gaoi, sola ese mai leoleo, fa’apea ai ma moliaga mama e 2 o le fa’aoolima i le tulaga tolu.

Ae i lalo o se maliliega na sainia e Amituana’i ma le malo, lea fo’i ua talia e le fa’amasinoga maualuga, ua ia tali ioe ai i le moliaga mamafa o le faia o fa’amaumauga tau fa’asese mai le tagi muamua, ma le moliaga o le sola ese ma Leoleo mai le tagi lona lua.

I le tali ioe ai o Amituana’i i le moliaga o le faia o fa’amaumauga tau fa’asese, sa ia ta’utino ai e fa’apea, i se taimi o le aso 28 Me i Amerika Samoa, sa ia sainia fa’agaoi ai le saini a le ali’i Pule o le faleoloa a le Gold Conda i luga o se siaki a le faleoloa sa ia gaoia, ma ia alu ua tala e aunoa ma se fa’atanaga mai le ali’i pule.

Ae mo le moliaga o lona sola ese mai Leoleo, sa ia ta’utino ai fo’i e fa’apea, i se taimi o le aso 11 Iulai i Amerika Samoa, ina ua ia iloa o lo o aga’i atu Leoleo e pu’e faapagota o ia, na ia sola ese ai mai lana ta’avale i se saoasaoa uiga ese, ma le fa’amoemoe ia aua ne’i maua o ia e Leoleo.

Ae na avea lona sola ese i lana ta’avale i se saoasaoa uiga ese ma itu na toeititi ai lava fetoai lana ta’avale ma isi ta’avale i luga o le auala, atoa ai ma le tau lavevea ai o tagata savavali.

Na ta’utino Amituana’i e fa’apea, o lana gaioiga sa faia i aso e pei ona taua, sa le tusa lea ma ala o le tulafono.  O lo o taofia pea o ia i le toese i Tafuna e fa’atali ai le aso 28 Novema lea ua fa’atulaga e lau ai lana fa’asalaga.