Tala I Vaifanua

AOTELEGA FOA'I MO I LATOU AFAINA I AFA TETELE MA LOLOGA:

O lo ua tula'i mai le aofaiga o le seleni ua tu'ufa'atasia i le taimi nei mo le Fesoasoani a Amerika Samoa i e uma sa afatia ma mafatia i lologa ma afa i setete ma teritori o Amerika i lenei vaitau, ua silia teisi i le $113,000. i le taimi nei.

O se tu'ufa'atasiga vave lea ua mafai ona fa'amaonia mai e i latou i le Ofisa o le Matagaluega o le Puipuiga o le Saogalemu Fa'alotoifale a le tatou malo, o i latou fo'i ia o loo nafa vavalalata ma le taumafaiga atoa lenei, e afua mai lava i le aso Faraile na te'a nei.

Ina ua fesiligia se taimi e fa'amuta ai ona faia nei foa'i, e fa'ailoa mai, "Ou te iloa pe toe lua ni aso atoatoa e tu'uina mo le fa'amoemoe e fa'ao'o ane ai foa'i a nisi o aiga ta'itoatasi, kamupani ma fa'alapotopotoga po'o Ekalesia fo'i, ona tapunia aloa'ia ai lea o lea taumafaiga."

Mai le aso To'ona'i na te'a i lona itula e 8:00 i le afiafi na fa'amauina ai le $94,000. o le tinoitupe ma siaki na taua'aoina.

Peita'i, afai ae toe tu'ufa'atasia ma le aotelega o foa'i na ofo atu ae le'i o'o atu i le Ofisa e maua ai le $107,000. i lena lava taimi. O le tama'ita'i o Lisa Tuato'o Tagoa'i o le Ofisa o le ASHLS lea fo'i sa avea ma se tasi o le Komiti e Tu'ufa'atasia lea foa'i a le atunu'u, sa ia fa'ailoa mai, "Ua maofa lava i matou i le lima foa'i o le atunu'u. Ua foa'i mai nu'u, ekalesia, fa'alapotopotoga, pisinisi ma tagata ta'ito'atasi fa'apea aiga. O le alofa tula'i lava lea o tagata Samoa e iloga ai, e taua ia i latou o latou aiga ae maise o fanau o aumau i na atunu'u ua a'afia mai ona o fa'alavelave fa'anatura fa'apenei."

E o'o mai lava i le taeao o le aso Lua, sa talia ai fo'i le foa'i mai nisi o Ekalesia. E le o misia lava se aso ma le to'ia o le laulau lea, ma ua sili ai ona vi'ia le Atua i le agaga foa'i o Amerika Samoa.

O le meaalofa sili ua fa'amauina mai se pisinisi e fa'atautaia e se aiga Samoa o le meaalofa lea a le Morris Scanlan Gas Station lea na fa'ao'o mai ai le $5,000. ae o le tele lava o foa'i mai nu'u ma ekalesia e ta'i $1,000. lava. E o'o fo'i i matagaluega ta'itasi ma ofisa ua latou foa'i mai le tele o meaalofa e afua i le $500. e aga'i atu i le $1,000. i nisi.

O i latou na ofo mai a latou meaalofa tupe, ua talosagaina nei e le Komiti o le Foa'i le fa'ao'o mai o latou foa'i na ofo i le aso To'ona'i, ina ia vave ona tapunia ai le foa'i ma fa'ao'o atu loa i fafo i nofoaga o lo'o fa'amautu i ai fesoasoani mo e o mafatia ona o nei fa'alavelave le ma'alofia.

O nei foa'i uma, ua fa'alisiti lo latou faiga. A taua'ao atu lau foa'i e faia mai e le sui o le Ofisa o Tupe a le tatou Malo. Ua fa'apea fo'i ona faia nei foa'i o totoe e le'i fa'ao'o atu, ia ave sa'o lava i le vaega a le Treasury,mo le taua'aoina ane o sau lisiti.

 O lenei vaega tupe o le a aotelega, o lona afa e fa'ao'o i fafo, ae o le isi afa e nofo i le tatou Koluse Mumu i Tafuna ina ia fesaosoani fo'i i le tatou Koluse Mumu e fa'asoasoa mai mo aiga e pagatia i ni faaletonu e talitutusa lava i latou i fafo i le taimi nei.

MANA'OMIA ONA FA'AFO'I TINO MALIU O LE ALII FAGOTA:

Ua taumafai pea le ali'i Kapeteni, Alphonso Llawa, mai le Potukale ina ia fa'amae'a suesuega ma sailiiliga o lo'o faia a le vaega o Leoleo, vaega a le US Coast Guard ae maise le vaega a le OSHA lea e ao ina kilia muamua fa'ato'a mafai ai ona ave le tino maliu o lona uso i lo la'ua aiga.

Ua fa'ailoa e i latou e le mafai ona tu'uina mai le igoa, ona o lea e le'i mae'a nei sailiiliga uma.

Ua ia fa'ailoa mai fo'i, o le vaiaso lenei e ao ina mae'a ai, ma ua usita'ia uma fo'i e ia ma lona va'a fagota tulafono uma, ina ia ave loa le tino o lona uso e 44 tausaga le matua, i le latou atunu'u.

E lei tele ni tala sa ia fa'ailoa ai le mea na tupu, na'o na lulu lava o lona ulu ma fa'ailoa mai, "O se fa'alavelave fa'afuase'i ma na lavea ai le ulu o lona uso i maea. Ina ua lavea o ia, e na'o le tolu lava itula na ola ai ae maliu loa, na maliu fo'i ae le'i taula mai le latou va'a i le Uafu i Pago Pago nei.

Ia Alphonso ma lana auva'a, sa na'o na fa'ailoa mai, "ua matou misia lava o ia!"

FALELAUASI FITAFITA TUI - LONA AIGA I PAGO PAGO:

Ua mae'a ona falelauasi le tama matua o Fitafita Tui mai le afio'aga o Pago Pago i le aso Tofi na te'a nei. Sa umi ona taoto lona tino maliu i le Falemaliu a le Maota Gasegase ae se'i fa'amautu se nofoaga e lagomau ai.

O lea Tama ua molimauina e le afioga Pulu Ae Ae Jr., "O se tama e le taitai ona fo'i i se fa'alavelave e ono tupu mai i totonu o lona aiga, i tulaga o misa ma mea fa'apena, e fa'aigoaina fo'i o Tavita aua e a fusu e pei o se tasi o oli e ta lana ma'ata lana fusu. Petia'i ua matua ma ua leai se tasi e fa'alagolago i ai le tausiga o ia, aua e le'i faia sona to'alua. Ona molita'i ai lea e nofo mau i le Hope House i Fatuoaiga."

O le agaga fa'afetai tele sa molio'o i le afioga Patele ma le Pulega ae maise le Aufaigaluega a le Hope House sa latou osiosia lona Sa, ma ona toe sauniga. O le afioga Pulu Ae Ae Jr ma le afioga le Senatoa mai Tualatai  Satele Galumalemana Teutusi sa auai ai, fa'atasi ma sui mamalu o le Komiti Fa'afoe o le Hope House Larry Sanitoa, ua atoa ai Samoa i lona oliolisaga tumau.

O nisi sa alofagia o lona tu'ua o le Malo, sa saunia ai lona va'a matagofie e le Skyview i Aua ma Faga'alu, o le atali'i fo'i o lona uso o Tony Tui sa ia fa'amomoli maia le seleni e fesoasoani i lona pili ma le afioga le Sa'o o lona aiga Pulu Ae Jr. aemaise le aiga pele o lo'o ua ofo mai le laufanua e lagomau ai nei Fitafita "Fika" Tui. Ia manuia lau malaga!