Atugalu Faipule tulaga ua i ai le polokalame o le ROTC i le Kolisi

E ui o lea ua tapunia aloaia galuega a le Fono Faitulafono, i le mae’a ai lea o lana tauaofiaga lona lua i le vaiaso na te’a nei, peita’i e le o malolo ai afioga i Faipule mai lo latou taumafai pea e su’esu’e le tulaga ua i ai le mataupu o le ROTC i totonu o le Kolisi Tuufa’atasi a le malo (ASCC).

O le salalau ai o ripoti i le tulaga fa’aletonu ua i ai le polokalame a le ROTC i le Kolisi, na finau ai loa ni isi o afioga i Faipule i totonu o le maota o sui i le vaiaso na te’a nei, aemaise ai lava i latou sa tautua i vaega ‘au a le malo tele, ina ia fa’atulaga se iloiloga ma le Peresetene o le Kolisi mo le fa’amaninoina o lenei mataupu.

Saunoa le afioga i le ali’i faipule mai Saole ia Kitara Vaiau e fa’apea, e tatau i le maota o sui ona fa’atulaga se iloiloga e suesue ai le tulaga faaletonu ua aafia ai le polokalame a le ROTC i le Kolisi, lea sa masani ona maua ai e fanau a le atunu’u le avanoa e ulufale atu ai i vaega ‘au a le malo tele ma tautua ai i soo se lala.

“Pau fa’amatalaga ua ou maua mai le Kolisi, ua le o toe i ai le polokalame o le ROTC, ma o se tulaga e lagona ai le fa’anoanoa pe afai e fa’amaonia lea ripoti, ona ua atagia mai ai le tapunia o le faitoto’a mo fanau a le atunu’u e ulufale atu ai i le isi la’asaga o le olaga manuia i totonu o vaega ‘au a le malo tele,” o le saunoaga lea a Vaiau na lagolago e le afioga i le ali’i faipule ia Faimealelei Anthony Fu’e Allen.

Saunoa Faimealelei e fa’apea, o le polokalame o le ROTC na mafai ai ona tatala faitoto’a mo nisi o fanau a le atunu’u, lea ua latou maua ina ai tulaga lelei i totonu o vaega ‘au a le malo tele, e aofia ai tulaga ta’ita’i.

Sa toe faatepa e Faimealelei ni isi o fanau o le atunu’u e aofia ai ma se alo o lona afioaga i Aua, lea na ui atu i polokalame faapenei, ma ua ia umia nei se tulaga maualuga i totonu o le Fuava’a a le malo tele.

I lona talitonuga, e le tatau ona nofonofo le maota ma ta’ita’i o le atunu’u, ae tatau ona saili le mafua’aga ua ala ai ona tapunia lea polokalame, pe afai e moni ripoti e pei ona folasia i luma o le maota.

Na lagolagoina e le afioga a Vesi Talalelei Fautanu Jr finagalo fa’aaliga o Faimealelei ma Vaiau.

I le avea uma ai o afioga i ali’i faipule ia e to’atolu o ni isi sa tautua i vaega ‘au a le malo tele, na saunoa ai Vesi e fa’apea, e eseese le polokalame o le ROTC ma le JROTC. O le ROTC o lo o fa’atautaia e le Iunivesite a Hawaii, ae o le JROTC o lo o fa’atautaia e le Matagaluega o Aoga a le malo.

Saunoa le Fofoga Fetalai ia Savali Talavou Ale e fa’apea, o le ROTC o lo o mafai ai ona fa’amanuiaina fanau aoga, aemaise ai i latou ua ulufale atu i kolisi ma aoga maualuluga atu, ma o se tulaga lelei pe afai ae fa’ataunu’u se iloiloga e fesiligia ai lea tulaga.

Na taua e le Peresetene o le Kolisi ia Dr. Rosevonne Pato i le Samoa News i le vaiaso nei, o le a se’i maua se isi feiloaiga i se taimi o i luma ona fa’amanino mai ai lea o le tulaga e fa’atatau i lenei mataupu.